Vlach Western Arli: Open Bible Stories

Updated ? hours ago # views See on DCS

35. Paramiz e žalostivnone dadestar

Frame 35-01

Jekh dive, o Isus sikaj ine bute carinikonen hem avere grešnikonen kola čedinđe pe te šunen le.

Frame 35-02

Nesave e verakere vođe kola inele adari oleja, dikhlje so o Isus premalo grešnici ponašini pe sar premalo amala, i lelje maškara pumende te kritikujinen le. Adalese o Isus vaćerđa lenđe akaja paramiz.

Frame 35-03

"Inele jekh manuš kole ine duj čhave. O tikneder čhavo phenđa ple dadese: 'Dade, mangava odmah te de man mlo kotor oto barvalipe klo!' I ađahar, o dad ulavđa plo barvalipe ple duje čhavenđe."

Frame 35-04

"O tikneder čhavo čedinđa sa so inole, dželo ki durutni phuv hem xalja sa ple love živindoj grešno."

Frame 35-05

"Palo adava, ki phuv kote živinđa o tikneder čhavo alo baro bokhalipe, a ole na inele love te činel xajbnase. Adalese lelja te ćerel jedino buti savi šaj ine te arakhi: parvarđa e balen. Edobor inele napatime hem bokhalo, da manglja te xal adava so xana o bale."

Frame 35-06

"Konačno, o tikneder čhavo vaćerđa korkoro pese: 'So ćerava me adava? Sa o sluge mle dadesere isi len sa edobor xajbnase, a me akate merava bokhatar. Ka irinav man mle dadese hem ka molinav le te lel man sar jekhe ple slugendar.'"

Frame 35-07

"I ađahar o tikneder čhavo lelja te irini pe ple dadesere čhereste. Sar pana inele dur, o dad dikhlja le hem pelo lese žal olese. Prastandilo nakoro čhavo, zagrlinđa le hem čumudinđa le."

Frame 35-08

"O čhavo phenđa: 'Dade, grešinđum anglo Devel hem angla tute. Na injum više dostojno te ovav to čhavo.'"

Frame 35-09

"Ali, lesoro dad phenđa jekhese ple slugendar: 'Siđar dža hem ana o najšuže šeja hem hurjav mle čhave! Čhiv lese i angrustik ko naj hem o sandale ko pre. Tegani čhinen e najšuže telco te šaj te xa hem te slavina, adalese so mlo čhavo inele mulo, ali akanai dživdo! Inele našaldo, ali akanai arakhlo!'"

Frame 35-10

"I ađahar, o manuša lelje te slavinen. Na nakhino but, o phureder čhavo alo čhere tari buti savi ćerđa ki njiva. Šunđa bašaliba hem čheliba, i pučlja pe so šaj te ovel adava."

Frame 35-11

"Ked o phureder čhavo šunđa so slavinena adalese so lesoro phral irinđa pe čhere, but xoljanđa i na manglja te đerdini ko čher. Lesoro dad iklilo hem molinđa le te đerdini te slavini olencar, ali ov na manglja."

Frame 35-12

"O phureder čhavo phenđa ple dadese: 'Sa akala berša kandava tut! Niked na injumle će neposlušno, a tu na dinđan man ni buzore te šaj te veselinav man mle amalencar. A ked akava to čhavo, kova xalja sa te love živindoj grešno, irinđa pe čhere, tu čhinđan lese e najšukare telco!'"

Frame 35-13

"O dad phenđa lese: 'Mlo čhavo, tu stalno injan mancar. I sa soi mlo-kloi. Ali, avela ano redo te slavina, adalese so to phral inele mulo, ali akanai dživdo, inele našaldo, ali akanai arakhlo!'"

E biblijakiri paramiz taro Luka 15,11–32