28. O barvalo terno
Jekh dive, jekh barvalo terno manuš alo koro Isus hem pučlja le: "Učitelju šukareja, so te ćerav te šaj ovel man večno dživdipe?" O Isus phenđa lese: "Sose vičineja man 'Šukareja'? Isi samo jekh kovai šukar, a adavai o Devel. Ali, te mangljan te ovel tut večno dživdipe, ov poslušno e Devlesere zakonenđe."
O terno pučlja le: "Zako save zapovedija olendar valjani te ovav poslušno?" O Isus phenđa: "Ma mudar. Ma ćer preljuba. Ma čor. Ma xovav. Poštujin te dade hem te daja, hem mang te pašutne sar korkore tut."
Ali o terno phenđa lese: "Taro tikvarila injum poslušno adale zakonenđe. So pana valjani te ćerav te šaj živinav večno?" O Isus dikhlja le hem osetinđa saosećanje premalo leste.
O Isus phenđa lese: "Te mangljan te ove savršeno, dža biknin sa so isi tut hem de o love e čororenđe, i ka ovel tut barvalipe ano nebo. Tegani ava hem phir pala mande."
Ked o terno šunđa so phenđa o Isus, but rastužisalo, adalese so inele but barvalo hem na manglja te del sa so inole. Irinđa pe hem dželo e Isusestar.
Tegani o Isus phenđa pe učenikonenđe: "Pharoi but e barvalenđe te đerdinen ano carstvo e Devlesoro! Čače, po lokhei e kamilaće te nakhel maškaro kan e suvjakoro nego e barvalese te đerdini ano carstvo e Devlesoro."
Ked šunđe o učenici so phenđa o Isus, ule začudime hem pučle: "Ko onda šaj te spasini pe?"
O Isus dikhlja ano pe učenici hem phenđa: "E manušenđe adava nane moguće, ali e Devlese sai moguće."
O Petar phenđa e Isusese: "Amen ačhavđam sa hem phiraja pala tute. So ka ovel amari nagrada?"
O Isus phenđa lese: "Sare kola ačhavđe po čher, pe phraljen, pe phenjen, pe dade, pe daja, pe čhaven ili po imanje zbog maje, ka priminen šel puti više hem ka ovel len večno dživdipe. Ali, but kolai prva ka oven poslednja, a but kolai poslednja ka oven prva."
E biblijakiri paramiz taro Matej 19,16–30; Marko 10,17–31; Luka 18,18–30