Vlach Western Arli: Open Bible Stories

Updated ? hours ago # views See on DCS

27. I paramiz e šukare Samarijancostar

Frame 27-01

Jekh dive, jekh manuš kova šukar džanđa e jevrejengoro zakoni alo koro Isus te kušini le. Pučlja le: "Učitelju, so valjani te ćerav te šaj ovel man večno dživdipe?" O Isus phenđa lese: "So pisini adalestar ano zakoni e Devlesoro?"

Frame 27-02

O manuš kova šukar džanđa o zakoni phenđa da o zakoni e Devlesoro vaćeri: "Čumudin e Gospode, te Devle, sa te vileja, sa te dušaja, te zoralipnaja hem te gođaja. Hem mang te pašutne sar korkore tut." O Isus phenđa lese: "Oja, ađahari! Ćer ađahar hem ka živine."

Frame 27-03

Ali o manuš manglja te mothoj dai pravedno, i pučlja e Isuse: "A koi mlo pašutno?"

Frame 27-04

Ko adava, o Isus vaćerđa lese akaja paramiz: "Inele jekh Jevrejco kova džala ine dromeja tari diz Jerusalim ki diz Jerihon."

Frame 27-05

"Sar o manuš džala ine dromeja, napadinđe le o čora. Lelje lestar sa so inole hem edobor marđe le da o manuš samo so na ine te merel. Tegani dželefse."

Frame 27-06

"Na nakhino but, jekh svešteniko e jevrejengoro phirela ine adale dromeja. Ked adava vođa e verakoro dikhlja e manuše kole čorđe hem marđe, nakhino ki aver strana e dromesiri, na pomožinđa e manušese hem dželo pe dromeja."

Frame 27-07

"Na nakhino but palo adava, adale dromeja nakhino jekh levit. (O levitija inele pleme e jevrejengoro savo pomožini ine e sveštenikonenđe ano hram.) O levit da nakhino ki aver strana e dromesiri hem na manglja te pomožini e manušese kole čorđe hem marđe."

Frame 27-08

"Aver manuš kova nakhino adale dromeja inele Samarijanco. (O Samarijanci inele potomci e Jevrejengere kola lena pe ine e manušencar oto avera nacije. O Samarijanci hem o Jevreja mrzinđe pe.) Ali, ked o Samarijanco dikhlja e Jevrejco, but inolese phare olese. Adalese pobrininđa pe olese hem paćarđa lesere rane."

Frame 27-09

"Tegani o Samarijanco vazdinđa e manuše upro po xer hem legarđa le ko čher kote lovenđe šaj te xal pe hem te sovel pe, i adari brininđa pe olestar."

Frame 27-10

"Aver dive, o Samarijanco valjanđa te nastavini po drom. Dinđa nekobor love e čherutnese hem phenđa lese: "Pobrinin tut olese, a te trošinđan buderi akale lovendar, me ka irinav će ked ka irinav oto drom."

Frame 27-11

Tegani o Isus pučlja e manuše kova šukar džanđa o zakoni: "So mislineja? Kova akale trinendar inele pašutno e manušese kole čorđe hem marđe?" A ov phenđa: "Okova kova inolese milosrdno." O Isus phenđa lese: "Dža hem tu ćer ađahar."

E biblijakiri paramiz taro Luka 10,25–37