Vlach Western Arli: Open Bible Stories

Updated ? hours ago # views See on DCS

2. O greh đerdini ki phuv

Frame 02-01

O Adam hem lesiri romni inele but bahtale adalese so živinđe ano but šužo vrt savo inele ćerdo e Devlestar olenđe. Nijekh olendar na akharđa šeja, ali na lađandile, adalese so ko sveto na inele greh. But puti phirena ine ano vrt hem vaćerena e Devleja.

Frame 02-02

A ano vrt inele jekh lukavo sap. Pučlja e đuvlja: "Čače li o Devel phenđa tumenđe te na xan o plodovija nijekhe kaštestar ano vrt?"

Frame 02-03

I đuvli phenđa: "O Devel phenđa amenđe da šaj te xa bilo save kaštestar, sem e kaštestar savo dela sposobnost te pendžari pe o šukar hem o bišukar. O Devel phenđa: 'Te xaljen ili samo te pipinđen lesoro plodo, ka meren.'"

Frame 02-04

O sap phenđa e đuvljaće: "Adava nane čače! Na ka meren. Nego, o Devel džanel da, samo so ka xan adava plodo, ka oven sar o Devel hem ka xaljoven o šukar hem o bišukar sar Ov so xaljola."

Frame 02-05

I đuvli dikhlja dai o plodo šužo hem dičhilo laće dai gudlo. Oj manglja te ovel džandi, i dolinđa o plodo adale kaštestar hem xalja le. Tegani dinđa hem ple romese, kova inele olaja, i ov da xalja.

Frame 02-06

Otojekhvar phravdile lengere jaćha hem dikhle soi nange. Mangle te učharen pe ađahar so oto listovija ćerdefse šeja.

Frame 02-07

Tegani o murš hem i đuvli šunđe e Devle sar phirela ano vrt, i garavđe pe olestar. Tegani o Devel vičinđa e murše: "Kaj injan?" O Adam phenđa: "Šunđum tut sar phireja ano vrt, i darandiljum, adalese so injum nango. Adalese garavđum man."

Frame 02-08

Tegani o Devel pučlja le: "Ko phenđa će da injan nango? Na li xaljan o plodo savo phenđum će te na xas?" O murš phenđa: "Tu dinđan man akala đuvlja, a oj dinđa man adava plodo." Tegani o Devel pučlja e đuvlja: "Sose ćerđan adava?" I đuvli phenđa: "O sap xovavđa man."

Frame 02-09

O Devel phenđa e sapese: "Prokleto te ove! Ka lazine vođeja hem phuv ka xas. Tu hem i đuvli ka mrzinen tumen, hem te čhave hem lakere čhave ka mrzinen pe. E đuvljakoro potomko ka zdrobini to šero, a tu ka ranine lesiri patum."

Frame 02-10

Tegani o Devel phenđa e đuvljaće: "Ka ćerav te oven tut bare dukha ked ka bijane. Ka mange te rome, a ov ka vladini tuja.

Frame 02-11

O Devel phenđa e muršese: "Šunđan te romnja, a man na šunđan. Akanai i phuv prokleto, a tuće but pharo ka ovel ked ćereja buti te šaj barjol će xajbnase. Palo adava ka mere, a to telo ka irini pe ki phuv." O murš pe romnjaće dinđa anav ''Eva'' so značini ''okoja-koja-dela-dživdipe', adalese so ka ovel daj sa e manušengiri. A o Devel hurjavđa e Adame hem e Eva ani koža e životinjakiri.

Frame 02-12

Palo adava, o Devel phenđa: "Akana ked o manuša ule sar amende ađahar so džanen o šukar hem o bišukar, našti muka lenđe te xan e kaštestar savo dela dživdipe i te živinen zauvek." Ađahar o Devel ispudinđa e Adame hem e Eva taro but šužo vrt. O Devel čhivđa zorale anđelen ko udar oto vrt te na muken nikase te xal e kaštestar savo dela dživdipe.

E biblijakiri paramiz taro 1. lil e Mojsijasoro 3