Vlach Western Arli: Open Bible Stories

Updated ? hours ago # views See on DCS

9. O Devel vičini e Mojsija

Frame 09-01

Palo e Josifesoro meriba, sa lesoro jeri ačhilo ano Egipat. On hem lengere potomci ačhile te živinen adari pana but berša hem inolen but čhave. On vičinde pe Izraelci.

Frame 09-02

Ked nakhle but berša, sa više hem više inele Izraelcija. O Egipćanja bisterđe više ko inele o Josif hem sa so ćerđa lenđe. Lelje te daran taro Izraelci, adalese so inele but baro narodo. Adalese o faraon kova tegani vladinđa ano Egipat ćerđa o Izraelci te oven robovija e Egipćanenđe.

Frame 09-03

O Egipćanja čhivđe e Izraelconen te ćeren but zgrade hem dizja. I phari buti ćerđa len but te patinen, ali o Devel blagoslovinđa len, ćerđa te ovel len po više čhave.

Frame 09-04

O faraon dikhlja da e Izraelconen isi but čhave, i naredinđa pe manušenđe te mudaren sa lengere bebicen kola inele murša ađahar so ka frden len ani len Nil.

Frame 09-05

Jekh Izraelka bijanđa murše. Oj hem lakoro rom garavđe e čhavore kobor šaj ine.

Frame 09-06

Ked dikhlje da našti više te garaven le, čhivđe le ani jekh korpa savi džala ine e lenjaja Nil. Adava ćerđe te šaj spasinen le e meribnastar. Lesiri phureder phen dikhela ine odural so ka ovel oleja.

Frame 09-07

I čhaj e faraonesiri zadikhlja i korpa hem dikhlja so isi andre. Ked dikhlja e čhavore, lelja le te ovel lakoro čhavo. Platinđa jekha Izraelka te del le te pijel thud, ali na džanđa dai adaja romni adale čhavoresiri daj. Ked o čhavoro inele edobor baro da na valjanđa lese više e dajakoro thud, oj irinđa le e faraonesere čhajate, koja dinđa le anav Mojsije.

Frame 09-08

Jekh dive, ked o Mojsije već inele baro murš, dikhlja da nesavo Egipćanin marela e robo kova inele Izraelco. O Mojsije manglja te spasini e Izraelco adalese so džanđa dai hem ov Izraelco.

Frame 09-09

Ked o Mojsije mislinđa da niko na ka dikhel, mudarđa e Egipćanine hem parunđa le. Ali neko dikhlja adava so ćerđa o Mojsije.

Frame 09-10

Ked o faraon šunđa so ćerđa o Mojsije, manglja te mudari le. O Mojsije naštino taro Egipat ani divljina kote garavđa pe e faraonesere vojnikonendar.

Frame 09-11

O Mojsije ulo pastiri ani divljina dur taro Egipat. Lelja romnja adale thanestar hem inole duj čhave.

Frame 09-12

Jekh dive, sar o Mojsija arakhi ine pe bakren, dikhlja sar jekh grmo thabljola, ali i jag na oštetini le. Nakhino po paše uzalo grmo te šaj dikhel po šukar. Sar nakhela ine po paše, šunđa e Devlesoro glaso: "Mojsije, huljav ti obuća adalese so terđoveja ko sveto than."

Frame 09-13

O Devel phenđa: "Dikhljum sar mo narodo patini. Ka bičhalav tut koro faraon te ikale e Izraelconen taro Egipat te na oven više robovija. Me ka dav len i phuv Hanaan, i phuv savi obećinđum e Avraamese, e Isakese hem e Jakovese."

Frame 09-14

O Mojsije pučlja: "A so te mangle o manuša te džanen ko bičhalđa man, so te phenav lenđe?" O Devel phenđa: "ME INJUM OKOVA KOVA INJUM. Phen lenđe 'o ME INJUM bičhalđa man kora tumende'. Hem akava phen: 'Me injum o Jahve, o Devel tumare pradadengoro e Avraamesoro, e Isakesoro hem e Jakovesoro.' Akavai mlo anav zauvek."

Frame 09-15

O Mojsije darandilo hem na manglja te džal koro faraon, adalese so mislinđa da na ka šaj šukar te vaćeri. Adalese o Devel bičhalđa e Mojsijasere phrale e Arone te pomožini lese. O Devel upozorinđa e Mojsija hem e Arone da o faraon na ka mangel te šunel.

E biblijakiri paramiz taro 2. lil e Mojsijasoro 1-4