Vlach Western Arli: Open Bible Stories

Updated ? hours ago # views See on DCS

19. O Proroci

Frame 19-01

O Devel bičhalđa prorokonen e izraelesere narodose pana od ked postaninđe narodo. O proroci šunena ine o lafi e Devlestar, i vaćerena le ine e narodose.

Frame 19-02

O Ilija inele proroko zako vreme ked o Ahav inele caro upro e izraelesoro carstvo. O Ahav na inele šukar manuš hem ohrabrini ine e manušen te slavinen e xovavne devle palo anav Vaal. O Ilija phenđa e Ahavese: "Na ka perel bršin ano e izraelesoro carstvo đikote me na phenava." Adava but xoljanćerđa e Ahave.

Frame 19-03

O Devel phenđa e Ilijase te džal đi ko jekh potok ani pustinja hem adari te garaj pe e Ahavestar, kova manglja te mudari le. Đijekh sabajle hem đijekh rat, o čiriklja anena lese ine maro hem mas. O Ahav hem lesiri vojska rodinđe e Ilija, ali našti ine arakhen le. Adalese so but vreme na pelo bršin, hem adava potok da šućilo.

Frame 19-04

Adalese o Ilija dželo ki pašutni phuv. Ani adaja phuv živinđa jekh udovica hem lakoro čhavo, a skoro na ačhilo len ništa zako xajba adalese so inele bokhalipe adalese so na pelo bršin. Ali, on priminđe e Ilija pese ko čher hem dinđe le te xal i o Devel brininđa pe olendar ađahar so ćerđa lengoro čaro e vareja hem lengiri flaša e uljeja niked te na oven čuče. Sa đikote inele o bokhalipe, olen inele so te xan. O Ilija ačhilo adari nekobor berša.

Frame 19-05

Ked nakhle trintekvaš berš, o Devel phenđa e Ilijase te irini pe e izraelese ano carstvo hem te vaćeri e Ahavese da palem ka bičhali bršin. Ked o Ahav dikhlja e Ilija, phenđa lese: "Adathe injan, tu kova ćereja problemija!" O Ilija phenđa lese: "Tu injan adava kova ćerela problemija! Ačhavđan e Jahve, e čačimasere Devle, a slavineja e Vaale. Ana sa e narodo oto carstvo Izrael ki planina Karmel."

Frame 19-06

Sa o manuša oto carstvo Izrael, đi o 450 proroci e Vaalesere, ale ki planina Karmel. O Ilija phenđa e manušenđe: "Odlučinen tumen više kas ka slavinen. Tei o Jahve Devel, kanden ole, tei o Vaal Devel, kanden ole!"

Frame 19-07

Tegani o Ilija phenđa e Vaalesere prorokonenđe: "Čhinen jekhe guruve hem čhiven le sar žrtva, ali ma te tharen i jag. Hem me ka ćerav ađahar. Čačimasoroi Devel okova kova ka bičhali jag te tharel e žrtven." I ađahar, e Vaalesere proroci čhivđe e žrtva, ali na tharđe i jag.

Frame 19-08

Tegani e Vaalesere proroci molinđe pe e Vaalese: "Šun amen, Vaale!" Sa o dive molinena pe ine hem vičinena, čhinena pe da ine čhurjencar, ali na dobinđe nisavo odgovor hem na ali i jag te tharel e žrtva.

Frame 19-09

Ked nakhlo o dive, o Ilija čhivđa e žrtva e Devlese. Tegani phenđa e manušenđe te čhoren dešuduj bare čare pani upri žrtva đikote o mas, o kaš, hem i phuv uzalo žrtveniko na ovena skroz sapane.

Frame 19-10

Tegani o Ilija molinđa pe: "Jahve, Devla e Avraamesereja, e Isakesereja hem e Jakovesereja, mothov amenđe avdive da tu injan o Devel e Izraelesoro hem da me injum to sluga. Odgovorin maje ki molitva te dikhen akala manuša da tu injan čačimasoro Devel.

Frame 19-11

Odmah peli i jag taro nebo hem tharđa o mas, o kašta, o bara, i phuv, čak hem o pani savo inele uzalo žrtveniko. Ked o manuša dikhle adava, pele ki phuv hem phenđe: "O Jahvei Devel! O Jahvei Devel!"

Frame 19-12

Tegani o Ilija phenđa: "Ma te muken nijekhe e Vaalesere proroko te našel." I ađahar, o manuša dolinđe e Vaalesere prorokonen, legarđe len adathar hem mudarđe len.

Frame 19-13

Tegani o Ilija phenđa e carose e Ahavese: "Odmah irin tut ani diz, adalese so avela o bršin." I o nebo kalilo hem lelja te perel bršin. O Jahve adaleja mothovđa dai ov čačimasoro Devel.

Frame 19-14

Angleder so te nakhel e Ilijasoro vreme, o Devel birinđa jekhe manuše palo anav Elisej te ovel proroko. O Devel ćerđa but čudesija prekalo Elisej. Jekh oto adala čudesija ulo upro Naaman, kova inele kapetani e neprijateljengoro, kole inele kožno nambormipe. Šunđa zako Elisej, i dželo te zamolini le te sasljari le. O Elisej phenđa e Naamanese efta puti te frdel pe ani len Jordan.

Frame 19-15

O Naaman prvo xoljanđa hem na manglja te ćerel adava, adalese so džanđa da o nanđojba našti korkoro pestar te legari o nambormipe. Ali kasnije odlučinđa te ćerel adava so terinđa le o Elisej hem frdinđa pe efta puti ani len Jordan. Ked o zadnjo puti iklilo taro pani, lesiri koža inele sasljardi! O Devel sasljarđa le.

Frame 19-16

O Devel bičhalđa bute avre prorokonen. On e narodose vaćerđe te na slavinen e idolen hem te len te oven pravedna hem milosrdna premalo avera. O proroci upozorinena ine e manušen da o Devel, te na ačhavđe te ćeren bišukaripe hem te na lelje te slavinen le, ka osudini len hem ka kaznini len.

Frame 19-17

Ali o manuša na šunđe e Devle. Često na postupinđe šukar e prorokonencar, a but puti mudarena len ine. Jekhvar o proroko o Jeremija inele frdime ano šuko bunari hem inele ačhavdo adari te merel. Propelo ani čik savi inele ano bunari, ali tegani o caro smilujinđa pe lese hem naredinđa pe slugenđe te ikalen le taro bunari angleder so ka merel.

Frame 19-18

O proroci na ačhavđe te prenosinen e Devlesere lafija iako o manuša mrzinđe len. Upozorinena ine e manušen da o Devel ka mudari len te na pokajinđe pe. Ađahar da, podsetinena ine e manušen upro e Devlesoro obećanje da ka bičhali ple Mesija.

E biblijakiri paramiz taro 1. lil e caronendar 16-18; 2. lil e caronendar 5; Jeremija 38