Vlach Western Arli: Open Bible Stories

Updated ? hours ago # views See on DCS

26. O Isus lela te ćerel pli služba

Frame 26-01

Palo adava so na pelo e Sotonese ko kušnje, o Isus irinđa pe ano zoralipe e Svetone Duhosoro ano krajo e Galilejakoro kaj živinđa. O Isus džala ine taro than ko than hem sikaj e manušen. Sare vaćerena ine šukar olestar.

Frame 26-02

O Isus dželo ani diz Nazaret, kaj živinđa ked inele čhavoro. Ko savato dželo ko than kote slavini pe e Devle. Dinđe le o lil e prorokosoro e Isaijasoro te čitini adathar. O Isus phravđa o lil hem čitinđa o odlomko e manušenđe.

Frame 26-03

O Isus čitinđa akava: "O Devel dinđa man pe Duho te šaj vaćerav o šukar lafi e čororenđe, da o phandle šaj te oven slobodna, da o korore šaj te dikhen, da o mučime šaj te oven slobodna. Akavai berš oti e Devlesiri milost."

Frame 26-04

Tegani o Isus beštino. Sare dikhlje ano leste. Džanđe da adava odlomko oto lil savo šunđe vaćeri e Mesijastar. O Isus phenđa: "O lafija save čitinđum pherđona akana." O manuša inele iznenadime. Phenđe: "Nane li akava e Josifesoro čhavo?"

Frame 26-05

Tegani o Isus phenđa: "Čačei adava da nijekh proroko nane prihvatime pese ani bijandi diz. E Ilijase ko vreme inele but udovice ano Izrael. Ali ked trin berš na pelo bršin, o Devel na bičhalđa e Ilija te pomožini nesava udovicaće ano Izrael, nego e udovicaće oto aver narodo."

Frame 26-06

O Isus phenđa hem akava: "Ađahar da, ko vreme e Elisejesoro ano Izrael inele but manuša e kožakere nambormipaja. Ali o Elisej na sasljarđa nijekhe olendar. Sasljarđa samo e kožakoro nambormipe savo inele e Naamane, e Izraelesere neprijateljesere naredniko." O manuša kola šunena ine e Isuse inele Jevreja. Ked šunđe so vaćeri, but inele xoljame upro leste.

Frame 26-07

O dizutne taro Nazaret ikalde e Isuse taro than kote slavini pe e Devle hem legarde le upre ko brego kotar mangle te frden le te mudaren le. Ali, o Isus nakhino maškar olende hem cidinđa pe tari diz Nazaret.

Frame 26-08

Tegani o Isus nakhino maškaro krajo e Galilejakoro, a but đene ale koro leste. Anena ine koro leste bute manušen kola inele namborme ili sakatime, hem okolen kola na dikhlje, na phirđe, na šunđe ili na vaćerđe, a o Isus sasljari len ine.

Frame 26-09

Anena ine koro Isus bute manušen ano kolende inele demonja. Ked o Isus naredini lenđe ine, o demonja ikljovena e manušendar, hem but puti vičinena ine: "Tu injan o Čhavo e Devlesoro!" But manuša inele zadivime hem slavinena ine Devle.

Frame 26-10

Palo adava, o Isus birinđa dešuduje muršen kolen vičinđa apostolja. O apostolja džana ine dromeja palo Isus hem sikljovena ine olestar.

E biblijakiri paramiz taro Matej 4,12–25; Marko 1,14–15, 35-39; 3,13–21; Luka 4,14–30, 38-44