Vlach Western Arli: Open Bible Stories

Updated ? hours ago # views See on DCS

39. O Isus ko sudo

Frame 39-01

Ki ekvaš i rat o vojnici legarđe e Isuse e bare sveštenikose ko čher sar te šaj o baro svešteniko te ispitujini le. O Petar džala ine palo lende odural. Ked anđe e Isuse ano čher, o Petar ačhilo avri hem tačola ine uzali jag.

Frame 39-02

Ano čher e jevrejengere vođe sudinena ine e Isusese. Anđe bute xovavne svedokonen kola xovavena ine olestar. Ali, lengere izjave na složinđe pe jekh averaja, i e jevrejengere vođe našti ine te dokažinen da ćerđa nešto krivo. O Isus ništa na vaćerđa.

Frame 39-03

Ko kraj o baro svešteniko dikhlja ano Isus hem pučlja le: "Vaćer amenđe tu li injan o Mesija, o Čhavo e dživde Devlesoro?"

Frame 39-04

O Isus phenđa: "Oja, me injum, a tumen ka dikhen sar vladinava e Devleja hem avava taro nebo." O baro svešteniko xoljanđa hem pharavđa ple šeja, hem vičindoj phenđa avere verakere vođenđe: "Na valjanena amenđe više svedoci! Šunđen so phenđa dai o Čhavo e Devlesoro. Savi tumari odluka?"

Frame 39-05

Sa e jevrejengere vođe phenđe e bare sveštenikose: "Ov zaslužini meriba!" Tegani učharđe e Isusesere jaćha, čhungarđe le, khuvđe le hem marđe leja muj.

Frame 39-06

Sar o Petar adžićeri ine anglo čher, dikhlja le nesavi sluškinja hem phenđa lese: "Tu da injanle e Isuseja!" O Petar xovavđa da na inele. Na nakhino but, aver sluškinja phenđa isto, a o Petar palem xovavđa. Ko kraj o manuša phenđe lese: "Džanaja so tu injanle e Isuseja, adalese so soduj đene injen tari Galileja."

Frame 39-07

Tegani o Petar phenđa: "Nek o Devel kaznini man te pendžarava adale manuše!" Odmah đilabđa o bašno, a o Isus irinđa pe hem dikhlja ano Petar.

Frame 39-08

O Petar dželo hem zorale runđa. A ko adava vreme o Juda, o izdajica, dikhlja so e jevrejengere vođe osudinđe e Isuse ko meriba. E Judase but inele žao, dželo hem mudarđa pe.

Frame 39-09

Rano sabajle, e jevrejengere vođe anđe e Isuse anglo Pilat, e rimesoro upravniko. Nadisale da o Pilat ka osudini e Isuse sar krivone hem da ka kaznini le meribnaja. O Pilat pučlja e Isuse: "Tu li injan e jevrejengoro caro?"

Frame 39-10

O Isus phenđa: "Korkoro adava phenđan, ali mlo carstvo nane e phuvjakoro carstvo. Te ovel ine ađahar, mle sluge ka maren pe ine maje. Aljum ki phuv te vaćerav o čačipe e Devlestar. Đijekh kova mangela o čačipe, ovi poslušno mle lafese." O Pilat pučlja: "Soi o čačipe?"

Frame 39-11

Palo adava so vaćerđa e Isuseja, o Pilat iklilo anglo narodo hem phenđa: "Na arakhava nisavi krivica upro akava manuš." Ali, e jevrejengere vođe hem avera manuša vičinđe: "Čhiv le ko krsto!" O Pilat phenđa: "Nane krivo." Ali, on po bare glasoja vičinđe. Tegani o Pilat trito puti phenđa: "Nane krivo!"

Frame 39-12

O Pilat darandilo da o narodo ka pobunini pe, i pristaninđa lesere vojnici te čhiven ko krsto e Isuse. E rimesere vojnici šibinđe e Isuse hem čhivđe upro leste carsko ogrtači hem kruna ćerdi oto kare. Marđe muj oleja vaćerindoj: "Ače, o caro e jevrejengoro!"

E biblijakiri paramiz taro Matej 26,57–27,26; Marko 14,53–15,15; Luka 22,54–23,25; Jovan 18,12–19,16