Vlach Western Arli: Open Bible Stories

Updated ? hours ago # views See on DCS

50. O Isus irini pe

Frame 50-01

Skoro sar 2.000 berš, sa više hem više o manuša taro sa o krajevija e phuvjakere šunena o šukar lafi e Isusestar e Mesijastar. I Khanđiri barjola. O Isus obećinđa da ka irini pe ked ka avel o kraj akala phuvjakoro. Iako pana na irinđa pe, ov ka ispunini plo obećanje.

Frame 50-02

Sar pana adžićeraja e Isuse te irini pe, o Devel mangela te živina ko način savoi sveto hem savo dela lese slava. Ov da mangela te vaćera averenđe lesere carstvostar. Ked o Isus živinđa ki phuv, phenđa: "Mle učenici ka propovedinen o šukar lafi e Devlesere carstvostar ko sa o krajevija e phuvjakere, i tegani ka avel o kraj."

Frame 50-03

Isi but manuša kola pana na šunđe e Isusese. Angleder so irinđa pe ano nebo, o Isus phenđa e hrišćanenđe te vaćeren o šukar lafi e manušenđe kola niked na šunđe le. Phenđa: "Džan hem ćeren sa e manušen te oven mle učenici!" Phenđa hem akava: "O njivei spremna zaki žetva!"

Frame 50-04

O Isus phenđa hem akava: "O sluga nane po baro ple gospodarestar. Sar so o manuša ko vlast mrzinđe man, ađahar hem tumen ka mučinen hem ka mudaren zbog mande. Iako ka trpinen ki akaja phuv, oven ohrabrime adalese so me pobedinđum e Sotone, kova vladini upri akaja phuv. Te ačhiljen verna đi o kraj, tegani o Devel ka spasini tumen!"

Frame 50-05

O Isus ple učenikonenđe vaćerđa akaja paramiz te objasnini lenđe so ka ovel e manušencar ked ka ovel kraj e phuvjakoro. Phenđa: "Nesavo manuš sadinđa šukar seme pese ki njiva. Sar ine sovela, alo lesoro neprijatelj hem sadinđa šuki čar maškaro điv i dželo."

Frame 50-06

"Ked o biljke iklile, o sluge adale manušesere phenđe: 'Gospodarona, tu sadinđan šukar seme ki akaja njiva. Sose onda isi šuki čar upro late?' O Gospodari phenđa: 'Verovatno o neprijatelj sadinđa la'".

Frame 50-07

"O sluge phenđe ple gospodarese: 'Te ikala i šuki čar?' O Gospodari phenđa: 'Na. Te ćerđen adava, ka ikalen hem kotor oto điv. Adžićeren o vreme e čedibnasoro, i tegani čeden i šuki čar ki kupa te tharel pe, a o điv čhiven maje ki šupa.'"

Frame 50-08

O učenici na xalile o značenje akala paramizakoro, i pučle e Isuse te objasnini lenđe. O Isus phenđa: "O manuš kova sadinđa o šukar seme predstavini e Mesija. I njiva predstavini i phuv. O šukar seme predstavini e manušen e Devlese ano carstvo."

Frame 50-09

"I šuki čar predstavini e manušen kolencar vladini o Bišukar. O Neprijatelj kova sadinđa i šuki čar predstavini e benge. O vreme e čedibnasoro predstavini o kraj e phuvjakoro, a o manuša kola čedena predstavinena e Devlesere anđelen."

Frame 50-10

Ko kraj e phuvjakoro, o anđelja ka čeden sa e manušen kolencar vladini o beng hem ka frdel len ani jag, kote ka roven hem ka krcinen dandencar ani bari patnja. Tegani o pravednici ka svetlinen sar o kham ano carstvo e Devlesoro, lengere Dadesoro.

Frame 50-11

O Isus phenđa hem akava, da ka irini pe ki phuv angleder so ka ovel kraj e phuvjakoro. Ka irini pe ko isto način sar so dželo, adava značini da ka ovel le fizičko telo hem ka avel upro oblaci e nebosere. Ked ka irini pe o Isus, đijekh hrišćanin kova mulo ka uštel taro mule hem ka resel pe oleja ano nebo.

Frame 50-12

Tegani o hrišćanja kolai pana dživde ka džan ko nebo hem ka pridružinen pe e hrišćanenđe kola uštine taro mule. Sare ka oven adari e Isuseja. Palo adava, o Isus ka živini ple narodoja ano savršeno mir hem ano jedinstvo, zauvek.

Frame 50-13

O Isus obećinđa da ka del kruna đijekhese kova verujini ano leste. On zauvek ka živinen hem ka vladinen e Devleja ano savršeno mir.

Frame 50-14

Ali, o Devel ka sudini đijekhe kova na verujini ano Isus. Ka frdel len ano pakao, kote zauvek ka roven hem ka krcinen dandencar ani patnja. I jag savi niked na ka ačhol, stalno ka tharel len, a o čirme stalno ka xan len.

Frame 50-15

Ked ka irini pe o Isus, skroz ka uništini e Sotone hem lesoro carstvo. Ka frdel e Sotone ano pakao, kote zauvek ka thabljol, zajedno sarijencar okolencar kola odlučinđe te sledinen ole umesto te oven poslušna e Devlese.

Frame 50-16

Adalese so o Adam hem i Eva inele neposlušna e Devlese hem anđe o greh ani akaja phuv, o Devel prokletinđa i phuv hem odlučinđa te uništini la. Ali, jekh dive o Devel ka ćerel nevo nebo hem nevi phuv, save ka oven savršena.

Frame 50-17

O Isus hem lesoro narodo ka živinen ki nevi phuv, a ov zauvek ka vladini upro sa so postojini. Ka kosel đijekh asvi hem na ka oven više patnje, ni tugujiba, ni rojba, ni bišukaripe, ni dukha, ni meriba. O Isus ka vladini upro plo carstvo ano mir hem ani pravda, hem zauvek ka ačhol ple narodoja.

E biblijakiri paramiz taro Matej 24,14; 28,18; Jovan 15,20; 16,33; Otkrivenje 2,10; Matej 13,24–30, 36-42; 1. lil e Solunjanenđe 4,13–5,11; Lil e Jakovesoro 1,12; Matej 22,13; Otkrivenje 20,10; 21,1–22,21