Vlach Western Arli: Open Bible Stories

Updated ? hours ago # views See on DCS

17. E Devlesoro savez e Davideja

Frame 17-01

O Saul inele prvo caro e Izraelesoro. Inele učo hem šužo, inele baš esavko sar so manglja o narodo. O Saul inele šukar caro prva nekobor berša. Ali kasnije ulo bišukar hem na inele poslušno e Devlese, i o Devel birinđa jekhe avere manuše kova jekh dive ka ovel caro olese ko than.

Frame 17-02

O Devel birinđa jekhe terne Izraelco palo anav David te ovel caro palo Saul. O David inele pastiri tari diz Vitlejem. Ko različita prilike, sar ine arakhi pe dadesere bakren, o David mudarđa hem lave hem medvede save napadinđe e bakren. O David inele ponizno hem pravedno manuš, kova verujinđa e Devlese hem ine lese poslušno.

Frame 17-03

O David ulo zoralo vojniko hem kapetani. Sar inele pana terno, marđa pe jekhe but bare manušeja palo anav Golijat. O Golijat inele trenirime vojniko, but zoralo hem učo sar đi trin metarija. Ali o Devel pomožinđa e Davidese te mudari e Golijate hem te spasini e Izraelconen. Palo adava, o David pobedinđa bute e Izraelesere neprijateljen, i adalese o narodo volinđa le.

Frame 17-04

O Saul ulo ljubomorno adalese so o narodo volinđa e Davide. But puti manglja te mudari le, i o David garaj pe ine olestar. Jekh dive o Saul rodinđa e Davide te mudari le. Đerdinđa ki isto pećina kote o David garavđa pe olestar, ali na dikhlja le. O David tegani inele lese but paše i šaj ine te mudari e Saule, ali na manglja. Umesto adava, čhinđa jekh kotor e Saulesere šejendar sar te mothoj lese da na ka mudari le sar te šaj ovel caro.

Frame 17-05

Ko kraj o Saul mulo ano mariba, a o David ulo caro upro Izrael. Ov inele šukar caro, a o narodo volinđa le. O Devel blagoslovinđa e Davide hem ćerđa le te ovel but uspešno. O David marđa pe ano but mariba hem o Devel pomožinđa lese te pobedini e Izraelesere neprijateljen. O David osvojinđa o Jerusalim hem ćerđa le te ovel glavno diz pese ano carstvo. Zako e Davidesoro carujiba, o Izrael ulo zoralo hem barvalo.

Frame 17-06

O David manglja te ćerel hram kote o Izraelci ka šaj te slavinen e Devle hem te anen lese žrtve. Đi sar 400 berša, o narodo slavinđa e Devle hem anđa lese žrtve ano Šatori zako sastanko savo ćerđa o Mojsije.

Frame 17-07

Ali, o Devel bičhalđa koro David e proroko e Natane akale lafeja: "Adalese so tu injan manuš kova marela pe ano mariba, na ka ćere maje Hram. To čhavo ka ćerel le. Ali, me ka blagoslovinav tut but. Jekh te potomkonendar zauvek ka vladini sar caro upro mlo narodo!" Jedinoi potomko e Davidesoro kova šaj vladini zauvek o Mesija. O Mesijai e Devlesoro Izabraniko kova ka spasini akale phuvjakere manušen lengere grejonendar.

Frame 17-08

Ked šunđa o David adala lafija, odmah zahvalinđa e Devlese hem slavinđa le adalese so obećinđa e Davidese esavki bari čast hem but blagoslovija. O David na džanđa ked o Devel ka ispunini pe obećanja. Ali, sar so ulo, o Izraelci pana but berša valjanđe te adžićeren e Mesijasoro aviba, đi sar 1.000 berša.

Frame 17-09

O David vladinđa pravedno hem verno but berša, a o Devel blagoslovinđa le. Ali, ked purandilo, ćerđa baro greh anglo Devel.

Frame 17-10

Jekh dive, sar lesere vojnici ine marena pe ano mariba dur pumare čherendar, o David taro po dvorco dikhlja jekha šuža đuvlja sar nanđola. Lakoro anav inele Vitsaveja.

Frame 17-11

So te irini po šero ki aver strana te na dikhel, o David bičhalđa nekas te anen la koro leste. Suća olaja hem bičhalđa la čhere. Na nakhino but palo adava, i Vitsaveja bičhalđa poruka e Davidese dai khamni.

Frame 17-12

E Vitsavejakoro rom, palo anav Urija, inele jekh oto e Davidesere najšukar vojnici. O David vičinđa e Urija te irini pe taro mariba hem phenđa lese te džal čhere hem te ovel pe romnjaja sar te mislinen o manuša da i Vitsaveja akhari e Urijasere čhave ano vođi. Ali o Urija na manglja te džal čhere adalese so sa o vojnici inele ano mariba. Adalese o David bičhalđa e Urija palal ano mariba hem phenđa e generalese te čhivel e Urija adari kaj o neprijatelji inele najzoralo, te mudarđol.

Frame 17-13

Palo adava so o Urija inele mudardo, o David lelja romnjaće e Vitsaveja. Palo nesavo vreme oj bijanđa čhave e Davidese. O Devel but xoljanđa zbog adava so o David ćerđa, i bičhalđa e proroko e Natane te vaćeri e Davidese kobor bišukar inele lesoro greh. O David pokajinđa pe zako po greh hem o Devel oprostinđa lese. Palo adava, sa po dživdipe o David inele poslušno e Devlese, čak hem ano phare vremenija.

Frame 17-14

Ali, sar kazna zako e Davidesoro greh, lesoro čhavoro mulo. Ađahar da, ko sa lesoro dživdipe savo ačhilo le, lesiri porodica marela pe ine maškara peste, i ađahar e Davidesoro moć slabonđa. Iako o David na inele verno e Devlese, o Devel inele verno zako pe obećanja. Kasnije, e Davide hem e Vitsaveja inele pana jekh čhavo. Dinđe le anav Solomon.

E biblijakiri paramiz taro 1. Lil e Samuilesoro 10; 15-19; 24; 31; 2. Lil e Samuilesoro 5; 7; 11-12