20. Progonstvo hem iriba
E Izraelesoro hem e Judejakoro carstvo grešinđe anglo Devel. Phagle o savez savo o Devel ćerđa olencar ki Sinaj. O Devel bičhalđa prorokonen te upozorini len te pokajinen pe hem te len palem te slavinen e Jahve, a na avere devlen. Ali on na mangle te šunen.
Adalese o Devel kazninđa soduj carstvija ađahar so muklja lengere neprijateljenđe te uništinen len. O carstvo e Asirijakoro, jekh zoralo, bišukar narodo, uništinđa e Izraelesere carstvo. O Asirci mudarđe bute manušen ano Izrael, čorđe sa so inele vredno, hem tharđe but dizja hem gava ani phuv.
O Asirci čedinđe sa e vođen, e barvalen hem e bućarne manušen hem legarde len ani Asirija. Ano e Izraelesoro carstvo ačhavđe samo okolen kola ačhile ko životi, a inele but čorore.
Tegani o Asirci ande abanđijen te živinen ani phuv kote angleder inele e Izraelesoro carstvo. Adala abanđije palem vazdinđe dizja, hem lelje pe e Izraelconencar kola ačhile adari. O potomci e izraelesere kola lelje pe e abanđijencar vičinđe pe Samarijanci.
O manuša kola živinđe ano e Judejakoro carstvo dikhlje sar o Devel kazninđa e manušen e Izraelesere carstvostar adalese so na inele verna hem poslušna e Devlese. Ali na ačhavđe te slavinen idolen, maškaro kolende inele hem o develja e Hanaanconengere. O Devel bičhalđa prorokonen te upozorinen len, ali on na mangle te šunen.
Ked nakhle đi ko šel berša palo adava ked o Asirci uništinđe e Izraelesere carstvo, o Devel bičhalđa e Navuhodonozore, e vavilonskone caro, te napadini e judejakoro carstvo. O Vavilon inele zoralo carstvo. E judejakoro caro ulo e Navuhodonozoresoro sluga hem platinđa lese but love đijekh berš.
Ali, palo nekobor berša e judejakoro caro pobunisalo protiv o Vavilon. Adalese o Vavilonci irinđe pe hem napadinđe e judejakoro carstvo. Prelelje i diz Jerusalim, uništinđe o Hram hem lelje sa o blago e dizjakoro hem e Hramesoro.
E Navuhodonozoresere vojnici kazninđe e judejskone caro, adalese so pobunisalo, ađahar so mudarđe lesere čhaven anglo leste i palo adava ćerđe le te ovel kororo. Palo adava, legarđe le te merel ano phandlipe ano Vavilon.
O Navuhodonozor hem lesiri vojska legarđe skoro sa e narodo taro e judejakoro carstvo ano Vavilon. Ani Judeja ačhavđe samo e but čorore manušen te frden seme ko njive. O vreme ked e Devlesoro narodo inele terime te ačhaven i Obećime phuv vičini pe Progonstvo.
Iako o Devel kazninđa pe narodo zbog olengere greja ađahar so legarđa len ano progonstvo, na bisterđa ni olen ni ple obećanja. O Devel na ačhavđa te pazini upro plo narodo hem te vaćeri lenđe prekalo ple proroci. Obećinđa da, palo eftavardeš berš, on palem ka irinen pe ani Obećime phuv.
Sar đi ko eftavardeš berš palo adava, e persijakoro caro o Kir osvojinđa o Vavilon, i e persijakoro carstvo zameninđa e vavilonskone carstvo. O Izraelci akana vičinđe pe Jevreja, a but đene olendar sa pumaro životi inele ano Vavilon. Samo nekobor but purane Jevreja setinena pe ine zaki Judeja.
E persijakoro carstvo inele but zoralo, ali milosrdno premalo narodija kola pokorinđe pe. Na nakhlo but palo adava ked o Kir ulo caro e persijanconengoro, naredinđa đijekh Jevrejco, kova mangela te irini pe ani Judeja, da šaj te džal tari Persija ki Judeja. Čak dinđa len love palem te vazden o Hram! I ađahar, palo adava so eftavardeš berš inele ano progonstvo, tikori grupa oto Jevrejci irinđa pe ani diz Jerusalim ani Judeja.
Ked o manuša resle ano Jerusalim, palem vazdinđe o Hram hem o duvarija uzali diz. Iako pana inele tali vlast avere narodosiri, palem živinđe ani Obećime phuv hem slavinđe e Devle ano Hram savo palem vazdinđe.
E biblijakiri paramiz taro 2. lil e caronendar 17; 24-25; 2. lil e dnevnikosoro 36; Lil e Jezdrasoro 1-10; Lil e Nemijasoro 1-13