Vlach Western Arli: Open Bible Stories

Updated ? hours ago # views See on DCS

14. O narodo lutini ki pustinja

Frame 14-01

Palo adava so o Devel e Izraelconenđe dinđa o zakonja savenđe manglja te oven poslušna sar kotor oto lesoro savez olencar, džele tari planina Sinaj. O Devel lelja te legari len nakori Obećime phuv, savi vičinđa pe Hanaan. O stubo oto oblako džala ine anglo lende nakoro Hanaan, a on džana ine palo leste.

Frame 14-02

O Devel e Avraamese e Isakese hem e Jakovese dinđa po lafi da lengere potomkonenđe ka del i Obećime phuv, ali akana adari živinđe but nacije. Vičinđe pe Hanaanci. On ni na slavinđe ni na šunđe e Devle. Slavinđe xovavne develjen hem ćerđe but bišukar buća.

Frame 14-03

O Devel phenđa e Izraelconenđe: "Valjani te jurinen sa e Hanaanconen tari Obećime phuv. Ma olencar te ćeren mir hem ma len tumenđe rome ili romnja olendar. Valjani te uništinen sa lengere idolen. Te na šunđen man, ka slavinen lengere idolen umesto man."

Frame 14-04

Kad o Izraelci resle đi ki granica oto Hanaan, o Mojsije birinđa dešuduje muršen, po jekhe taro đijekh pleme e izraelesoro. Sikavđa len sar te džan hem garandoj te dikhen savi i phuv. Ađahar da valjanđe garandoj te dikhen kobor bari e hanaanconengiri vojska.

Frame 14-05

Dešuduj murša phirđe maškaro Hanaan saranda dive, i irinđe pe. Phenđe e manušenđe: "I phuv but šaj te bijani hem but šuži." Ali deš murša phenđe: "O dizjai but zorale hem adalai manuša po uče hem po zorale amendar! Te napadinđam len, sigurno ka pobedinen amen hem ka mudaren amen!"

Frame 14-06

Ali avera duj murša, o Kalev hem o Isus Navin, tegani phenđe: "Čačei o Hanaanci uče hem zorale, ali amen sigurno ka pobedina len adalese so o Devel ka marel pe amenđe!"

Frame 14-07

Ali o manuša na šunđe e Kaleve hem e Isus Navine. Xoljanđe upro Mojsije hem upro Aron hem phenđe: "Sose anđen amen ko akava opasno than? Po šukar ka ovel amenđe ine ano Egipat, a akana, ače, ka mudarđova ano mariba, a amare romnja hem amare čhavore ka oven robovija." O manuša mangle te birinen nekas avere te ovel lengoro vođa kova ka legari len palal ko Egipat.

Frame 14-08

O Devel but xoljanđa hem alo ano Šatori zako sastanko. Phenđa: "Adalese so na mangljen te ćeren sar so phenđum tumenđe, sa o narodo ka lutini ki pustinja. Sem o Isus Navin hem o Kalev, sarijen kolen isi biš berš ili više ka meren akate hem niked na ka đerdinen ki Obećime phuv."

Frame 14-09

Ked šunđa o narodo adava, ine lenđe žao so grešinđe. Lelje pumaro oružje hem džele te maren pe e Hanaanconencar. O Mojsije phenđa lenđe te na džan adalese so o Devel na inele olencar, ali on na mangle te šunen le.

Frame 14-10

Adalese so o Devel na dželo olencar ko mariba, o Hanaanci pobedinđe len hem buten mudarđe. Palo adava, o Izraelci cidinđe pe taro Hanaan, i saranda berša lutinđe ki pustinja.

Frame 14-11

Ko adala saranda berša sar o narodo e izraelesoro lutini ine ki pustinja, o Devel brininđa pe olendar. Dinđa len maro taro nebo savo vičinđa pe ''mana''. Bičhalđa da bute čirikljen (prepelicen) ko thana kote bešena ine, sar te šaj xan hem mas. Ko sa adava vreme, o Devel ćerđa lengere šeja hem lengere sandale te na pharavđon.

Frame 14-12

O Devel da ko čudno način dinđa len pani tari stena. A palem ko sa adava, e izraelesere narodose o Devel na inele šukar hem mrmljinđe protiv oleste hem protiv o Mojsije. Ali čak i tegani o Devel ačhilo verno zako ple obećanja save dinđa e Avraamese, e Isakese hem e Jakovese.

Frame 14-13

Ko aver nesavo puti ked e manušen na ine pani, o Devel phenđa e Mojsijase: "Vaćer e stenaće hem o pani ka thavdel olatar." Ali o Mojsije na inele poslušno e Devlese. So te vaćeri e stenaće, ov anglo sa o narodo duj puti e štapeja khuvđa ki stena. O pani čače thavdino olatar sar te šaj sare te pijen, ali o Devel inele xoljame upro Mojsije hem phenđa lese: "Tu na ka đerdine ani Obećime phuv."

Frame 14-14

Palo adava so o Izraelci lutinđe ki pustinja saranda berš, sare kola pobunisale protiv o Devel mule. Tegani o Devel palem legarđa e narodo angli Obećime phuv. Tegani o Mojsije inele but purano, i o Devel birinđa e Isus Navine te pomožini lese te legari e narodo. O Devel da obećinđa e Mojsijase da jekh dive ka bičhali avere proroko sar oleste.

Frame 14-15

Palo adava, o Devel phenđa e Mojsijase te džal ko naj učo than e planinakoro sar te šaj dikhel i Obećime phuv. O Mojsije dikhlja i Obećime phuv, ali o Devel na muklja lese te đerdini ano late. Tegani o Mojsije mulo, a o Izraelci runde le trijanda dive. O Isus Navin ulo lengoro nevo vođa. Ov inele šukar vođa, adalese so verujinđa e Devlese hem inele lese poslušno.

E biblijakiri paramiz taro 2. lil e Mojsijasoro 16-17; 4. lil e Mojsijasoro 10-14; 20; 27; 5. lil e Mojsijasoro 34