Vlach Western Arli: Open Bible Stories

Updated ? hours ago # views See on DCS

47. O Pavle hem o Sila ano than Filipe

Frame 47-01

Sar o Savle džala ine dromeja maškaro e rimesoro carstvo, lelja te koristini plo rimljano anav "Pavle". Jekh dive, o Pavle hem lesoro amal o Sila džele ani diz Filipe te vaćeren o šukar lafi e Isusestar. Džele ko than uzali len avri tari diz, kote o manuša čedena pe ine zaki molitva. Adari resle jekha đuvlja koja vičinđa pe Lidija, a koja inele trgovkinja. Oj volinđa hem slavinđa e Devle.

Frame 47-02

O Devel phravđa e Lidijakoro vilo te verujini e lafese e Isusestar, hem oj hem lakere čherutne krstinđe pe. Oj vičinđa e Pavle hem e Sila te ačhon koro late ko čher, i on ačhile olaja hem lakere čherutnencar.

Frame 47-03

O Pavle hem o Sila but puti arakhena pe ine e manušencar ko than zaki molitva. Đijekh dive sar phirena ine đi adari, palo lende dželi jekh ropkinja opsednutime demoneja. Adava demoni ćerela la ine te dikhljari i budućnost e manušenđe, i ađahar ple gospodarenđe zaradini ine but love.

Frame 47-04

Sar on phirena ine, i ropkinja vičini: "Akalai manuša sluge e Devlesere e Najbaresere. Vaćerena tumenđe e Devlesoro plan zako spasenje!" But puti ćerela ine ađahar, i e Pavlese adava dosadinđa pe.

Frame 47-05

I jekh dive, ked i ropkinja lelja te vičini, o Pavle irinđa pe nakoro late hem phenđa e demonese kova inele ano late: "E Isusese ano anav, ikljov olatar." O demoni odmah iklilo olatar.

Frame 47-06

O manuša kolengiri inele i ropkinja but xoljanđe! Xalile so oj bizo demoni više na ka šaj te dikhljari i budućnost e manušenđe. Adava značini da o manuša više na ka den len love te šaj i ropkinja te vaćeri lenđe so ka ovel olencar.

Frame 47-07

Adalese o manuša kolengiri inele i ropkinja legarđe e Pavle hem e Sila koro e rimesere vođe, kola marđe len hem frdinđe len ano phandlipe.

Frame 47-08

Čhivđe e Pavle hem e Sila ko najšukar obezbedime than e phandlipnasoro, đi lengere pre phandlje lanconencar. Palem, ki ekvaš i rat on đilabđe hem slavinđe e Devle.

Frame 47-09

Otojekhvar ulo baro potres! Sa o udara e phandlipnasere phravdile hem pele o lanci sa e manušendar kola inele phandle.

Frame 47-10

O čuvari uštino taro sojba, a ked dikhlja da sa o udara e phandlipnasere inele phravde, but darandilo! Mislinđa da našle sa o manuša kola inele phandle, i manglja te mudari pe. (Džanđa da e rimesere vođe ka mudaren le te muklja e phandlenđe te našen.) Ali, o Pavle dikhlja le hem vičinđa: "Terđov! Ma mudar tut. Sare injam akate."

Frame 47-11

O čuvari tresinđa pe sar avela ine nakoro Pavle hem nakoro Sila, i pučlja len: "So valjani te ćerav te ovav spasime?" O Pavle phenđa: "Verujin ano Isus, ano Gospod, i tu hem te čherutne ka oven spasime." Tegani o čuvari legarđa e Pavle hem e Sila pese ko čher hem thovđa lengere rane. O Pavle propovedinđa o šukar lafi e Isusestar sa lesere čherutnenđe.

Frame 47-12

O čuvari hem sa lesere čherutne verujinđe ano Isus hem krstinđe pe. Tegani o čuvari e Pavlese hem e Silase dinđa nešto te xan hem zajedno radujinđe pe.

Frame 47-13

Tejsato dive, o upravnici e dizjakere mukle e Pavle hem e Sila taro phandlipe hem phenđe lenđe te džan taro Filipe. O Pavle hem o Sila džele te dikhen pe e Lidijaja hem pe nesave avere amalencar, a palo adava džele tari diz. O šukar lafi e Isusestar nastavinđa te širini pe, a i Khanđiri nastavinđa te barjol.

Frame 47-14

O Pavle hem aver vođe e hrišćanengere džana ine ko but dizja, vaćerindoj hem sikavindoj e manušen oto šukar lafi e Isusestar. Isto ađahar, pisinđe but lila savencar ohrabrinđe hem sikavđe e vernikonen ano khanđirja. Nesave adale lilendar ule lila ani Biblija.

E biblijakiri paramiz taro Ćeriba e apostolengoro 16,11–40