Vlach Western Arli: Open Bible Stories

Updated ? hours ago # views See on DCS

21. O Devel obećini e Mesija

Frame 21-01

Tari samo početka, o Devel planirinđa te bičhali e Mesija. Prvo obećanje e Mesijastar alo e Adamese hem e Evaće. O Devel obećinđa da ka bijanđol e Evakoro potomko, kova ka zdrobini e sapesoro šero. O sap savo xovavđa e Eva inele o Sotoni. O obećanje značinđa da o Mesija ka pobedini e Sotone.

Frame 21-02

O Devel obećinđa e Avraamese da prekalo leste sa o nacije ki phuv ka oven blagoslovime. Akava blagoslov ka pherđol ki budućnost, ked ka avel o Mesija. Ov ka ćerel te šaj spasinen pe o manuša oti đijekh nacija.

Frame 21-03

O Devel obećinđa e Mojsijase da ki budućnost ka vazdel pana jekhe proroko sar oleste. Adava inele pana jekh obećanje e Mesijastar kova ka avel palo nesavo vreme.

Frame 21-04

E carose e Davidese, o Devel obećinđa da jekh oto lesere potomci zauvek ka carujini upro e Devlesoro narodo. Adava značinđa da o Mesija ka ovel e Davidesoro potomko.

Frame 21-05

Prekalo o proroko Jeremija, o Devel obećinđa da ka ćerel Nevo savez, ali na sar o savez savo ćerđa e Izraeleja ko Sinaj. Ko Nevo savez, o Devel ka pisini po zakoni ko vile e manušengere, a o manuša korkore ka pendžaren e Devle, ka oven lesoro narodo, a o Devel ka oprostini lengere greja. O Mesija ka anel o Nevo savez.

Frame 21-06

E Devlesere proroci isto ađahar phenđe da o Mesija ka ovel proroko, svešteniko hem caro. O prorokoi manuš kova šunela e Devlesere lafija hem vaćeri len e narodose. O Mesijai adava savršeno proroko kole o Devel obećinđa te bičhali.

Frame 21-07

E izraelesere sveštenici anena ine žrtve e Devlese ko than e narodose, a sar zamena zaki kazna zbog lengere greja. O sveštenici da molinena pe ine e Devlese zako manuša. O Mesija ka ovel savršeno baro svešteniko, kova korkoro pes ka del sar savršeno žrtva e Devlese.

Frame 21-08

O caroi okova kova vladini upro carstvo hem kova sudini e narodose. O Mesija ka ovel savršeno caro, kova ka bešel ko prestolje pe pradadesoro e Davidesoro. Ka vladini upri sa i phuv zauvek, hem uvek ka sudini pošteno hem ka anel ispravna odluke.

Frame 21-09

Devlesere proroci prorokujinđe pana but so e Mesijastar. O proroko o Malahija prorokujinđa da angleder o Mesija ka avel jekh baro proroko. O proroko o Isaija prorokujinđa da i devica ka bijani e Mesija. O proroko o Mihej phenđa da o Mesija ka bijanđol ani diz Vitlejem.

Frame 21-10

O proroko o Isaija phenđa da o Mesija ka živini ani Galileja, ka tešini e manušen kolen isi phagavde vile, hem ka vaćeri e phandlenđe da šaj te oven slobodna. Ađahar da, prorokujinđa da o Mesija ka sasljari e nambormen hem okolen kola na šunena, na dikhena, na vaćerena ili na phirena.

Frame 21-11

O proroko o Isaija isto ađahar prorokujinđa da e Mesija ka mrzinen hem na ka mangen le iako ništa bišukar na ćerđa. Avera proroci prorokujinđe da okola kola ka mudaren e Mesija ka frden barbuti zako lesere šeja, hem da ka izdajini le o amal. O proroko o Zaharija prorokujinđa da adale amalese ka den trijanda srebrna kovanice adalese so izdajinđa e Mesija.

Frame 21-12

O proroci da phenđe sar o Mesija ka merel. O Isaija prorokujinđa da o manuša ka čhungaren e Mesija, da ka asan lese hem da ka maren le. Ka posaven le, a ov ka merel ani bari patnja hem ano bare dukha, iako ništa bišukar na ćerđa.

Frame 21-13

O proroci isto ađahar phenđe da o Mesija ka ovel savršeno, da niked na ka grešini. Ka merel sar te lel i kazna zako greja avere manušengere. Lesiri kazna ka anel mir maškaro Devel hem o manuša. Adalese e Mesijasoro meriba inele e Devlesiri volja.

Frame 21-14

O proroci prorokujinđe da o Mesija ka merel, ali da o Devel ka vazdel le taro mule. E Mesijasoro meriba hem uštiba taro mule inele način ko savo o Devel ka spasini e grešnikonen hem ko savo ka počini o Nevo savez.

Frame 21-15

O Devel e prorokonenđe mothovđa but so e Mesijastar, ali o Mesija na alo ano vreme nijekhesoro adale prorokonendar. Više oto 400 berš palo adava so dinđa o zadnjo proroštvo, tačno ko pravo vreme, o Devel bičhalđa e Mesija ki akaja phuv.

E biblijakiri paramiz taro 1. lil e Mojsijasoro 3,15; 12,1–3; 5. lil e Mojsijasoro 18,15; 2. lil e Samuelesoro 7; Lil e Jeremijasoro 31; Lil e Isaijasoro 59,16; Lil e Danilosoro 7; Lil e Malahijasoro 4,5; Lil e Isaijasoro 7,14; Lil e Mihejesoro 5,2; Lil e Isaijasoro 9,1–7; 35,3–5; 61; 53; Psalam 22,18; 35,19; 69,4; 41,9; Lil e Zaharijasoro 11,12–13; Lil e Isaijasoro 50,6; Psalam 16,10–11