Vlach Western Arli: Open Bible Stories

Updated ? hours ago # views See on DCS

41. O Devel vazdela e Isuse taro mule

Frame 41-01

Palo adava so čhivđe ko krsto e Isuse, e jevrejengere neverna vođe phenđe e Pilatese: "Okova xovavno o Isus phenđa da ka uštel taro mule palo trin dive. Neko valjani te pazini o grobo te našti lesere učenici te čoren lesoro telo i onda te phenen da uštino taro mule."

Frame 41-02

O Pilat phenđa lenđe: "Len nekobore vojnikonen hem šukar osigurinen o grobo." I ađahar, čhivđe o bar ko ulaz e grobosoro hem čhivđe e vojnikonen te osigurinen te našti niko te čorel o telo.

Frame 41-03

Dive palo adava so o Isus inele parume inele savato, a e Jevrejenđe na inele muklo ko adava dive te džan ko grobo. Adalese, rano sabajle palo savato, nekobor đuvlja spreminđe pe te džan e Isusese ko grobo te čhiven pana mirisija upro lesoro telo.

Frame 41-04

Otojekhvar ulo baro potres. O anđeo kova sijajinđa sar i munja, iklilo taro nebo. Cidinđa o bar savo učhari ine o grobo hem beštino upro leste. O vojnici kola pazinena ine o grobo, but darandile hem pele ki phuv sar mule.

Frame 41-05

Ked o đuvlja resle ko grobo, o anđeo phenđa lenđe: "Ma daran. O Isus nane akate. Ov uštino taro mule, baš sar so phenđa! Aven hem korkore dikhen ano grobo!" O đuvlja dikhlje ano grobo hem dikhlje o than kote e Isusesoro telo inele pašljardo. Lesoro telo na inele adari!

Frame 41-06

Tegani o anđeo phenđa e đuvljenđe: "Džan hem vaćeren e učenikonenđe: 'O Isus uštino taro mule hem ka džal ki Galileja angla tumende.'"

Frame 41-07

O đuvlja darandile, ali inolen bari radost. Prastandile te vaćeren e učenikonenđe o šukar lafi.

Frame 41-08

Sar o đuvlja pana ine džana dromeja nakoro učenici te vaćeren lenđe o šukar lafi, o Isus iklilo anglo lende, a on pele anglo leste ko kočija. O Isus phenđa lenđe: "Ma daran. Džan hem vaćeren mle učenikonenđe te džan ki Galileja. Adari ka dikhen man."

E biblijakiri paramiz taro Matej 27,62–28,15; Marko 16,1–11; Luka 24,1–12; Jovan 20,1–18