Vlach Western Arli: Open Bible Stories

Updated ? hours ago # views See on DCS

43. I Khanđiri počini

Frame 43-01

Palo adava so o Isus irinđa pe ko nebo, o učenici ačhile ano Jerusalim sar so phenđa lenđe o Isus te ćeren. O vernici stalno čedena pe ine adari ki molitva.

Frame 43-02

Đijekh berš, pinda dive pali Pasha, o Jevreja slavinena ine bitno dive vičime Pindato dive. O Pindato dive inele vreme ked o Jevreja zahvalinena ine e Devlese zako čediba e đivesoro. O Jevreja avena ine taro sa o phuvja ko Jerusalim zajedno te slavinen o Pindato dive. Adava berš, o vreme zako Pindato dive alo kurko dive palo adava so o Isus dželo ko nebo.

Frame 43-03

Sar o vernici inele zajedno, otojekhvar o čher ano savo inele pherdilo zvukoja save ćerđa i zorali barval. Tegani nešto so dičhilo sar tikore jaga mothovđa pe upro sa e vernikonengere šere. Sare on pherdile e Svetone Duhoja hem lelje te vaćeren avere čhibjencar.

Frame 43-04

Ked o manuša ano Jerusalim šunđe galama, but đene ale te dikhen soi adava. Ked šunđe e vernikonen sar vaćerena adalestar so o Devel ćerđa, inele začudime so šunđe sa adava pumenđe ko čhibja.

Frame 43-05

Nesave adale manušendar phenđe dai o učenici mate. Ali, o Petar uštino hem phenđa lenđe: "Šunen man! Akala manuša nane mate! Akaleja ispuninđa pe o proroštvo e prorokosoro e Joilesoro, ano savo o Devel vaćeri: 'Ano poslednja dive, ka čhorav mle Duho.'"

Frame 43-06

"Manušalen taro Izrael, o Isus inele manuš kova ćerđa but zorale znakija hem čudesija ano e Devlesoro zoralipe, sar so dikhljen hem sar so džanen. Ali, tumen čhivđen le ko krsto!"

Frame 43-07

"Iako o Isus mulo, o Devel vazdinđa le taro mule. Adava ispuninđa o proroštvo savo phenela: 'Na ka muke to Sveco te čirnjol ano grobo.' Amen injam svedoci adalestar da o Devel e Isuse vazdinđa taro mule hem da irinđa le ko dživdipe."

Frame 43-08

"Akanai o Isus vazdime hem bešela e Devlese e Dadese ki desno strana. Hem o Isus bičhalđa e Svetone Duho sar so obećinđa da ka ćerel. O Sveto Duho ćerela sa akava so akana dikhena hem šunena."

Frame 43-09

"Tumen čhivđen ko krsto akale manuše, e Isuse. Ali, oven sigurna da o Devel ćerđa e Isuse te ovel Gospod hem Mesija."

Frame 43-10

O manuša kola šunena ine e Petre inele but dotaknime adaleja so šunđe. Adalese pučle e Petre hem e učenikonen: "Phraljalen, so te ćera?"

Frame 43-11

O Petar phenđa lenđe: "Đijekh tumendar te pokajini pe hem te krstini pe ano anav e Isusesoro e Hristesoro, te šaj o Devel te oprostini tumenđe o greja. Tegani ka del tumen hem e Svetone Duho sar daro."

Frame 43-12

Đi sar 3.000 manuša verujinđe ano adava so phenđa o Petar hem ule e Isusesere učenici. Inele krstime hem ule deo e khanđirjakoro ano Jerusalim.

Frame 43-13

O učenici stalno šunena ine e apostolengoro sikaviba, ovena ine zajedno, xana zajedno, hem molinena pe ine jekh avereja. Uživinđe ano zajedničko slaviba e Devle hem sa so inolen, ulavena ine jekh avereja. Sarijen inele šukar mišljenje olendar. Taro dive ko dive sa više manuša ovena ine vernici.

E biblijakiri paramiz taro Ćeriba e apostolengoro 2