۱۰ - ده بلا

خدا بِه موسی و هارون گف که حَواستون بُووَه فرعون آدَمِ سَرخودیَه. موسی و هارون اَلا فِرعون رَفتِن و گفتِن: «ای بُنگَه خدایِ اسروئیل به تو داس: "قومِ مُنَه هِل رُووِن".» فرعون مَحَل وَرشون نَوَند و اَ جا ایان‌کِه بنی اسروئیلَه هِلَه رُووِن، مجبورِشون کُورد بیشتر کار کُنِن.

فرعون هَنی نَم‌هِشت کِه بنی اسروئیل رُووِن. سی‌ایان خُدا دَه بلای گَپ سَرِ مصر اُووُورد. پِی او بلاها، خُدا به فرعون نشون دا کِه زورِش اَ فرعون و هَمِه خُدایونِ مصر بیشتَرَه.

خُدا اُو روخُونِه نیلَه خین کُورد. اما فرعون هَنی، بنی اسروئیلَه نَم‌هِشت رُووِن.

خُدا کُلِّ سرزِمینِ مِصرَ پُرِ بَق کُورد. فرعون اَ موسی مَخاس کِه بقونَه اَ مِی ولاتِشون دیر کُنَه،اما بعدَ اِیان‌کِه بقون اَ بین رَفتِن، دِل فرعون سِنگ‌تر بی‌یِس و نَهِشت اَ مِی مصر رُووِن.

بَعدِش خُدا بَلا پَخشون و بلا پَخشَه کُورکونَه نازل کورد. فرعون به موسی و هارون گف: اَر ای بَلانَه دیر کُنِن، بِ‌هِلَشون کِه اَ مِی مصر رُووِن. بعدِ دعا موسی، خُدا اِی بَلانَه هَم دیر کُورد، اما فرعون دِلِش سِنگ‌تر بی‌یِس و اندو هم نَهِشت اَ مِی مِصر رُووِن.

بَعد خُدا کاری کورد که هَمِه حیوِنُون مصری مریض بُووِن و میرن. اما فرعون کِه دِلِش اَ سِنگ بید اِی‌رَه هَم نَهِشت کِه رُووِن.

خدا به موسی گف: که چَپِه اَ خاکِشتَر می دَسِش پُر کُنَه و نُها فرعون به هوا تیچِنَه. مُعادِی که موسی ای‌کارَه کُورد، کُلّ مصریون بجز اسروئیلیون دون دِروُوردِن. اَما خدا دلِ فرعونَ سنگ‌تر کُورد و فرعون نَهِشتْ که اسروئیلیون رُووِن.

بعدِش خدا بَلا تِگِرگَه نازِل کُورد و بیشتَرِ زراعَتا و هر جونِوَری کِه زیر آسمون بیدِنْ اَ بین بورد. بعد فرعون، موسی و هارونَ بُنگ کُورد و گف: «مو اِی‌رَه گناه بارُم، شُمون آزادِی که رُووِی.» بعدِش موسی دعا کُورد و تِگِرگ وِیسید.

اما فرعون ای‌رَه هَم گناه کورد و دِلِش سِنگ‌تر بی‌یِس و نَهِشتْ کِه اسروئیلیون آزاد بُووِن.

دُماش خُدا بافِی اَ کُلُّو اَلا سرزِمین مصر فِرِسنید. کُلُّو‌وونْ هر زِراعَتِی کِه اَ بلا تِگِرگ مُوند بید، خُوَردِن.

بَعد خدا بَلا توریکیَه فِرِسنید کِه سو روز طول کَشید. همَه جا توریک بی‌یِس طوری کِه هیچ مصری‌یِ نَتَرِس اَ مِی خونَش آیَه در. اَما جایِی که اسروئیلیون بیدِن، رُووش‌نُویی بید.

حتّا بعدِ ای نو بَلا هم فرعون نَهِشتْ اسروئیلیون رُووِن. اَ اُونجون کِه فرعون گوشِ شنوا نداشت، خُدا بناوند که آخِرین بَلانَه فِرِسنَه. ای بَلا نَظَر فرعونَ عَوض کُورد.

مَتَلِی اَ کتابِ مقدس: کتاب خروج ۵ – ۱۰