۲۱- خُدا وَعدِه اومِّییَنِ مسیحَ بِدَهَه
اَ هَمو اول، اَ سَربَندِی کِه خُدا دُیُنانَه آفِریدْ، دونِس کِه بعدِ مُدّت زیادِی مسیحِ موعودَه بِفِرِسنَه. او بِه آدم و حوّا وَعدَه دا بید کِه ای کارَه اِلْلَن بِکُنَه. خُدا وَعدَه دا کِه اَ نَسلِ حوّا کَسِی میا کِه سَرِ مارَه بِه تیچِنَه. مارِی کِه حوّانَه فِرِیبْنید همو شیطان بید. عَهد هَم ایان بید کِه مسیح، شیطانه اَ بینِ بَرَه.
خُدا بِه ابراهیم وَعدَه دا بید کِه پِی او هَمِه مَردُمِ دُیُنا برکَتِ بینِن .خُدا ای وعدَنَه بعدِ مدّتِی پِی فِرِسنیدَنِ مسیح عَمَلی کُورد .مَسیح واسکِی مَردُمِ دُیُنانَه اَ هَر تیرِ طایُفِی که بُووِن اَ گناه نِجات دَهَه.
خُدا بِه موسی گفْ بید کِه پیغَمبَرِی لِفِ او بِفِرسنَه .ای پِیغَمبَر هموگِری مَسیحِ موعود بید. ایطور بید کِه خُدا اَندو وَعدِه اومییَنِ مَسیحَ دا.
خُدا داوودَ گفْ بیدْ کِه کَسِی اَ نَسلِش پاتِشا بِبُووَه و تا اَبَد سَرِ قومِ خُدا سلطَنَتِه کُنَه. ایان یعنِی کِه مَسیح اَ نَسلِ داوود عَمَلِه میا.
پِی ارمیایِ نَبی خُدا وَعدَه دا بیدْ کِه عَهدِ جَدیدی بَنا بِوَنَه، اَما نَه مِلثِ عَهدِی کِه خُدا پِه مَردُم مِی کُهِ سینا بَسْ بید .مِی ای عهدِ جدید، خُدا شریعَتِشَه سرِ دِلِ مَردُم بِنِویسَه. مَردُم خوشون اووَه بِاِشناسِن و وَرِش محبَّتِ کُنِن و اَ شریعَتِش فرمونبَری بِکُنِن. مَسیح کَسی بید کِه ای عهد جدیدَه پِی مَردُمِ بَندَه. ایشون قومِ او بِبُووِن و خُدا گناهاشونَه بِبَخشَه.
پیغَمبَرونِ خُدا هَم گُفتِن کِه مَسِیح موعود، نَبی، کاهن و پاتِشا بِبُووَه. پیغَمبَر کَسییَه کِه کلُومِ خُدانَه بِفَـمَه و سی مردُم بِگُووَش .مَسیحِ موعودِ خُدا، پیغَمبَرِ کاملِی هِی سیایان کِه پیاما خُدانَه کامِل بِفَـمَه وَ هُنونَه سی مردُم طورِی کِه کُلْلَن فَـمِن بِگُووَه.
کاهنونِ یَهودی اَ جانُبِ مردم سی خُدا قربانی بِکُنِن کِه هموگِری اَ کَمِ مجازاتِ گناهایِی بید کِه کُوردِن بید. همیطور کاهنون سی مردُم پیشِ خُدا دُعا بِکُوردِن. اما بَنا بید کِه مسیحِ موعودْ کاهِنِ گَپِی بُووَه کِه خوشَه لِفِ قربانی کامِلِی تقدیمِ خُدا بِکُنَه. یَعنِی او اصلَن گناه نَمکُنَه و مُعادِی کِه خوشَه اَ کَمِ قربانی تقدیمِ کُنَه، احتیاجِی وَر قربانییِه دِگِه سی گناه نِی.
پاتِشاهون و رَییسونْ سَرِ جَمعِی اَ مردُم حکومَتِ کُنِن و بَعضِی وَقتا خِنگ هَم بِزَنِن. داوودِ پاتِشا تینا سَرِ اسروئیلیون حکومَتْ کُورد. اما مَسیحِ موعود کِه اَ نَسلِ داوودِ میا، سَرِ کُلِ دُیُنا تا اَبد حکومَتِ کُنَه. او عادِلانَه حکومَتِ کُنَه و تصمیما صافِی بِگِرَه.
پیغَمبَرونِی کِه اَ جانُب خُدا فِرِسنیدَه بِه بُووِن، پیشگوییهای زیادِی سی مَسیح کُوردِنْ بید. مِلاکِه نَبی گُف بید کِه نُها ایان کِه مَسیح آیَه، پیغَمبَرِ گَپِ دِگِه میا. اِشعیا گُف بید کِه مَسیحِ موعود اَ دُختَرِی باکِرَه متولدِ بُووَه. میکاه نَبی هَم گُف بید کِه او مِی شَـرِ بیت لحم دُیُنا میا.
اِشعیا نَبی گُف بید کِه مَسیح مِی جلیل خیمَه بْوَنَه. او آدَمونِ دِل اِشکِنیدَنَه آروُومِ کُنَه و اسیرونَه آزودی بِدَهَه. او همیطور پِیش بینی کُورد کِه مَسیحِ موعود، مَریضونْ یعنِی کُورون، شُلون، کَرون و گُنگونَ شفا بِدَهَه.
اشعیای نَبی گف بید کِه مَردُم اَ مَسیحِ موعود خوشِشون نَمیا و قبولِش نَمکُنِن. پیغَمبَرونِی دِگَه هَم پِیش گویی کُوردِن بیدْ یکِی اَ رفیقونِ مَسیح وَرِش خیانَتِ کُنَه. زَکریا پِیش بینی کُورد بید کِه ای رَفیقِ مَسیح سَرِ سی سِکِّه نقرَه وَر مَسیح خیانَتِ کُنَه .پیغَمبَرونِ دِگَه پِیش گویی کُوردِن بید کِه مسیحَ کَسونِی بِکُشِن کِه سَرِ رَختاش قمارِ کُنِن.
همیطور پیغَمبَرونْ سَرِ چِطور بیدَنِ مُردَنِش نَظر دانْ بید .اشعیای نبی گف بید کِه مَردُم سَرِش تُفِ شونِن و کُتَکشِ زَنِن و دَنگِ دِرارِن. بَعد جِسمِ جونِشَه سیلا بِکُنِن تا پِی غَشقِ وِلا میرَه اما دونِن کِه هیچ کارِ زَبینِی نَکُوردَه.
پیغَمبَرون گفتِن بید کِه مَسیحِ موعود وا آدمِ کامل و بِی هیچْ گناهی بُووَه. او وا میرَه اَ کَمِ ایان کِه اووَه خُدا اَ جا گناها کُلِّ مردُمِ دُیُنا مجازاتِ کُنَه. مجازاتِ او باعِثِ بُووَه کِه آخِر سَر بینِ آدمون و خُدا آرامِش و صلح آیَه. سی ایان خُدا مَخاس تا مَسیحْ خینی و کُشتَه بُووَه.
پیغَمبَرون پِیش گویی کُوردِن بید کِه خُدا مَسیحَ بَعدِ مُوردَنْ اَندو بِه وِرسونَه. پَه پِی مُوردَن و وِرسونِیدَنِش بَعدِ مُوردَن، خُدا مَخو کِه برنامِه نجاتِ گناهکارونَه کامِل کُنَه و عَهدِ نُووِی پِه مردم بَنا وَنَه.
خدا چیا گَپِی در موردِ اومِّییَنِ مَسیح به پیغَمبَرون گف. اما مسیح مِی زمونِ هیچ کو اَ ای پیغَمبَرون نَاومَّه بید. بیشتَر اَ چارصد سال اَ آخِریْ پِیش گویی، زَمونِی کِه موعِدِش رَسید، خُدا مَسیحَ به دُیُنا فِرِسنید.
مَتَلِی اَ کِتابِ مقدس: کتاب پیدایش فصل ۳ آیه ۱۵، فصل ۱۲ آیه ۱ تا ۳، کتاب تثنیهفصل ۱۸ آیه ۱۵، کتاب دوم سموئیل فصل ۷، کتاب ارمیا فصل ۳۱، کتاب اشعیا فصل ۵۹ آیه ۱۶، کتاب دانیال فصل ۷، کتاب ملاکی فصل ۴ آیه ۵، کتاب اشعیا فصل ۷ آیه ۱۴، کتاب میکا فصل ۵ آیه ۲، کتاب اشعیا فصل ۹ آیه ۱ تا ۷ و فصل ۳۵ آیه ۳ تا ۵ و فصل ۵۳،کتاب مزامیر فصل ۲۲ آیه ۱۸ و فصل ۳۵ آیه ۱۹ و فصل ۶۹ آیه ۴ و فصل ۴۱ آیه ۹، کتاب زکریا فصل ۱۱ آیه ۱۲ و ۱۳، کتاب اشعیا فصل۵۰ آیه ۶، کتاب مزامیر فصل ۱۶ آیه ۱۰ و ۱۱