۳۸- خیانت وَر عیسی
یهودیون هرسال عید پِسَخَ جشنِ گِرُفتِن. ای جشن سیایان بید که فَمِن چطور خدا صدسال پِیش اجدادشونَه اَ نوکَریِ مصر نجات دا بید. نِهِنگِ سو سال بعدِ ایانکه عیسی موعظه و یادْ داین هَمَنَه بَنا وَند، به شاگِردونِش گف کِه مخو عید پسخ پِی ایشون مِی اورشلیم جشن گِرَهَ. همیطور گف که مِی اونجون کشته بِبُووَه.
یهودا یکی اَ شاگِردونِ عیسی وُ خزینهدارِ جَرگِه شاگِردون بید. خیلی وقتا هَم اَ او پِیل بِدُزید. بعدِ ایان که عیسی و شاگِردونِش به اورشَلیم رَسیدِن، یهودا پیش گَپِ کاهنونِ اعظمِ یهود رفت و پیشنهاد فُرُختن عیسانَ اَ جا گرُفتن پیل به اوشون دا. او دونس که گپون یهود، مسیح بیدن عیسانَ قبول ندارن و مَخِن که او کشته بُووَه.
گپونِ دینی یهود به کایِدییِ کاهن گَپ، سی خیانت یهودا و تحویل دایَنِ عیسی به اوشون، سی سکِّه نقرَه دانِش. مُطابِقِ چِی که پِیغَمبرون پیش بینی کُوردِن بید. یهودا قبول کُورد و پیلَ گرُفت و رفت. اَ اوسون دُما وَقتِی بید تا عیسانَ بِه ایشون تحویل دَهَه.
عیسی مِی اورشلیم، عید پسخَ پِی شاگِردونِش جشن گرُفت. مُعادِ خُوَردَنِ شومِ پِسَخ، عیسی نونَ گرفت، قَلِش کُورد و گف: «گِرِه خُوَرِه، ایان لارِ مُنَه کِه سی شمون دایَه بِبُووَه. ایانَه به یاد مو انجوم دِهِی.» همیطور، عیسی گف که سیشون جونِشَه بِدَهَه و لارِش سی دِلِ اوشون قربانی بِبووَه.
بعدِ ایان عیسی جُومِ شرابَه گرُفت و گفتشون: «اِیانَه خین مو مِی ای عَهدِ جدیدَه که سی بخشیدَنِ گناهاتون رِخته بِبُووَه، اَزش سرکَشِه. و ای کارَه بعدا به یاد مو انجوم دِهِی.»
بعدش عیسی به شاگردونِش گف: «یکی اَ شُمون بِه مو خیانتِ کُنَه.» شاگِردون تعجب کُوردِن و پُرسیدِن کی همچِه کاری بِکُنَه؟ عیسی گف: «اوان که ای تیکَنَه اَ مو بِگِرَه، خائنَه.» بعد نُونَ به یهودا دا.
بعدِ ایانکه یهودا نونَ وَرداشت، شیطان مِی جِلدِش رَفت. او پیشِ گَپون یهود رفت تا اوشونَه سی گرُفتَنِ عیسی کمَک کُنَه. ای جریونا هَمَشون مِی شو پِیش اومَّه.
بعد خَوردن غذا، عیسی و شاگِردونِش اَلا کُهِ زیتون رفتِن. عیسی گف: «اَمشو همِه شُمون مُنَه تینا بِهِلِه. سیایانکِه نوشته بیسه: «چوپونَه بِزَنُم و همِه بَرون تیچِ تاچِ بُووِن.»
پتروس گف: «اَر همه تُنَه ول کنن، مو ای کاره نَمکُنُم.» عیسی گُفتِش: «شیطان مَخُوَه هَمِه شُمونَه اَ خودِش کُنه اما مو سی تو دعا کُوردمه تا ایمانت اَ بین نَرووَه. اما، اَمشو، نُها بُنگِ خروس، تو سو کِتَه حاشا بِکنی که مُونَه بِاِشنوسی.»
پتروس به عیسی گف: «اَر میرُم، تُنَه انکار نمکنم.» باقِی شاگِردونَم همییانَه گُفتِن.
بعدش عیسی و شاگردونِش مِی باغ جتسیمانی رفتِن. عیسی گفتشون دعا کنن تا شیطان نترِسسَه بُووَه ایشونَه وسوسه کنه .پَه ایشونه هِشت و به خلوت رفت تا دعا کنه.
عیسی سُو کِتَه ایطور دعا کورد. «ای پدرِ مو، اَر بِبُووَه، به مو اجازه دِه تا اَ ای جومِ رَنج نَخَورُم. اما اَر رهی دگه سی بخشش گناها بشر نِی، په هر چه تو اراده کُنی سَرِ گِرَه.» عیسی اِقذَه دِلِش اَسَر رَفْ بید که عرقش مِث تُکْکا خین بید. خدا مِلاکِه فِرِسنید کِه اُووَ قُوَه دَهَه.
دُما هر کِتَه دعا، عیسی پیش شاگردونِش بِوِرگشت. اما اوشونَه مِی خُو بِدید. کِتِی سووُّم که وِرگشت، گف: «ورسِه، او شاگِردِ خیانت کار اینجونس.»
یهودا پِی گَپونِ یهود، قشون و جماعتِ گَپی اومَّه. اوشون پیشون شِمشِیل و گُرز داشتِن. یهودا اومه پیش عیسی و گف: «سلام اُسا» و اووَ بوسید. ایان تیرنِشونِی بید تا عیسانَ بِه گپون یهود، سی گرُفتنِش نشونْ دهَه. عیسی گفتِش: «یهودا! چا پِی بوسِی بِه مو خیانَتِ کُنی؟»
مُعادِی که سربازون عیسانَ گِرُفتِن، پترس شِمشِیلِشَ کَشید و گوش نوکر کاهن گَپَه بُرید. عیسی گُفتِش: «شِمشِیلِتَه غلاف کُن. مو ترم اَ پدرُم خاسَه بُووم که دَسِه اَ مِلاکون فرسنَه کمکم. اما وا اَ پدرُم اطاعت کُنُم.» بعدش عیسی گوش او پیانَه شفا دا و کل شاگِردونِشْ جسسِن.
متلی اَ کتاب مقدس : انجیل متی فصل ۲۶ آیه های ۱۴ تا ۵۶، انجیل لوقا فصل ۲۲ آیه های ۱ تا ۵۳، انجیل یوحنا فصل ۱۸ آیه های ۱ تا۱۱