۳۰- عیسی مَسیح بِه پِنْ هَزار نَفَر غذا بِدَهَه
عیسی رسولونِشَه سی بشارَت و یاد دایَن بِه داهاتا زیادِی فِرِسنید .بَعدِ وِرگَشتَن، اوشون عیسانَ اَ کارایِی کِه کُوردِن بید با خبَر کُوردِن. بَعد عیسی اوشونَه جا خَلوَتِی نِهِنگِ دریاچَه بُورد تا کَمِی مَندی وَنِن. پَه هَمَهشون داخِلِ یَه قایُقِی بیسِن و اَلا اودَس روخونَه رَفتِن.
مُعادِی کِه مَردم دیدِن عیسی و شاگِردونِش سُوارِ قایُق بیسِنَه و دارِن بِرووِن، کِنارِ دَریا بَنا بِه دووِسسَن وَندِنْ تا نُها اوشون بِه او دَس دریا رَسِن. هموگِری وَقتِی کِه عیسی و شاگِردونِش اونجون رَسیدِن، جَمِی اَ مردم اونجون بندیرشون بیدِن و ازِشون استقبالِ کُوردِن.
جَمعیَّتشون بجز زنون و بَچون نِهِنگِ پِنْ هَزار پیا بید. دِلِ عیسی مَسیح سیشون سُخت، چون لِفِ بَرونِ بی چوپون بیدِن. پَه بَنا بِه یادْ دایَنِشون وَند و کَسونیَه کِه مَرِیض بیدِن، شفا دا.
شو کِه بییِس، شاگِردون پیشِ عیسی اومِّن و گفتِن: «ای اُسّا، مَردُمَه فِرِسنِشون سی خوشون تَهیِی نون کُنِن، چون اینجون جا دیرییَه و چِی سی خُوردَن پِیدا نَمبووَه.»
اما عیسی بِه شاگِردونِش گف: «خوتون بِه ایشون نون دِهِی.» اوشون جُواب دان: «چِطور تَرِسسَه بُووِیم ای هَمَه مردُمَه سِیر کُنِیم؟ امون تینا پِن نون و دو موهی کُچُک دارِیم و بَس.»
عیسی بِه شاگِردونِش فرمایِش کُورد تا بِه مَردُم گُووِن کِه مِی دَسا پَنجا نَفَری ری عَلُفا نِشینِن.
بَعد عیسا پِن نون و دو موهییَه مِی دَسِش گِرُفت، بِه آسمون سیل کُورد و خدانَه سی غَذا شُکر کُورد و اوانَه بَرکَت دا.
بَعد عیسا نونا و موهیونَ تیکه تیکَه کورد و هُنونَ بِ شاگِردونِش دا تا بینِ مردُم بَرِ بَخش کُنِن. شاگِردون بِ مَردم چِی بِدان و هَمَ خُوَردِن و سِیر بیسِن، اَما چِی اَ او غَذاها کَسر نَم بی یِس.
بَعد شاگِردونْ تَهموندِه غَذاهانَه گِرد کُوردِن و ایطور اَ باقِیْ او پِن نون و دو موهی، دوزَه سَلَه پُر بییِس.
مَتَلِی اَ کِتابِ مقدس: انجیل متی فصل ۱۴ آیه های ۱۳ تا ۲۱ ، انجیل مرقس فصل ۶ آیه های ۳۱ تا ۴۴، انجیل لوقا فصل ۹ آیه های ۱۰ تا ۱۷، انجیل یوحنا فصل ۶ آیه های ۵ تا ۱۵