۱۸- دو شـِلاق بیسَنِ پاتِشوهی اسروئیل
داوودِ پاتِشا چِل سال حکومَت کُورد. بَعدِ مُوردَنِش کُووَکِش سلیمون به پاتِشوهی قومِ اسرائیل رَسید. خُدا پِی سُلیمون قِصَّه کُورد و اَزِش پرسید: «اَ مو چِه مَخی تا داهامت؟» سلیمون اَ خدا خاس تا بِه او دُونویی دَهَه. ای چِی کِه سلیمون مَخاس باعث خوشحولی خُدا بییِس و اووَه دُوناتَرین پیا ری زِمین کُورد. سلیمون چیا زیادِی یاد گِرُفت و پاتِشاهِ فَـمیدِه بید. خدا هَم سلیمونَ پیلدار کُورد.
سلیمون مِی اورشلیم معبَدِی بَناوَند کِه داوود مِی فِکرِش بید و نَقشَشَه کَشیدْ بید و مِصالِحِشَه گِرد کُورد بید. ایسون مَردُم تَرِسْسِن اَ جا خیمِه ملاقات، اُونجون خُدانَه پِرَستِن و قربانی سییِش کُنِن. خُدا بِه مَعبَد نازِل بییِس و اُونجون حاضِر بید و پِی قومِش زِندی بِکورد.
اَما سلیمون بِه زَنونِ طایُفا دِگَه دِل دا بید و اَ اوشون زُونَه اوسوند. او نِزیکِ هَزار زُونَه اوسوند و ایطور اَ خُدا وِرگَشتْ بید. خِیلِی اَ او زَنون، اَ وِلاتا غریب اومِن بید و پِی خوشون بُت داشتِن تا پِرَستِن. مُعادِی کِه سلیمون پِیا گَپْسالِی بییِس، او هَم بُتا زنونِشَه بِپِرَستید.
ایطور بید کِه خُدا اَ دَسِ سلیمون جِر اومَّه وَ گُف کِه اَ کَمِ ای نافَرمونییِش، پاتِشوهی اسروئیلَه بَعدِ مُوردَنِ سلیمون دو شِلاقِ کُنَه.
بعدِ سلیمون کُوَکِش رِحُبعام اَ جاش نِشِس. کل قومِ اسروئیل گِرد بیْسِن تا اووَه به عنوان پاتِشا قبول کُنِن. اوشون بِه رِحُبعام شکایت بُوردِن کِه سلیمون اَ ایشون زیاد کار کَشیدَه و مَجبور بیدِنَ مالیات زیادِی دِهِن. اوشون اَ رحبعام مَخاسِن کِه لِف بُووَش وَرشون سَخت نَگِرَه.
اما رِحُبعام جوابِ احمقانِی داشون و گف: «شُمون مَرِی بُووَم سلیمون سخت بِگِرُفت، اما مو اَ شمون بیشتر کارِ کَشوم و بیشتَرَ او عاجِزِتونِ کُنُم.»
بَعدِ ای قِصّاش، دو بَرِ مَردُم نُهاش وِرسیدِن. دَه قبیلَه اَ اسروئیل جِدا بییِس. اما دو قبیلَه مُطیعِش موندِن و نومِ خوشونَه یَهودا وَندِن.
او دَه قبیلَه پیایِی بِه نومِ یِرُبعامَه پاتِشا کُوردِن. اوشون شمالِ اسروئیل زِندی بْکوردِن و خوشونَه پاتِشوهی اسروئیل، نوم وَندِن.
یرُبعام مطیعِ خُدا نبید و ایطور بییِس کِه مَردُم ری بِه گناه اُووُوردِن. او دو بت ساخت و اَ مَردُم مَخاس کِه بُتونَه پِرَستِن .اوشون دِگَه سی دُعا به اورشلیم کِه مِی حکومَتِ یَهودا بید نَمرَفتِن.
پاتِشوهیِ یهودا و اسروئیل دِشمِنِ یَک بیدِن و هِی پِی یَک جنگ داشتِن.
مِی ای پاتِشوهی جدیدِ اسروئیل، کُلِ پاتِشاهون زَبین بیدِن .خِیلِی اَ پاتِشاهون بِه دَسِ کَسونِی کِه مَخاسِن پاتِشوهییَه واگِر کُنِن کُشتَه بیسِن.
هَمِه او پاتِشاهون و بیشتَرِ مردُمِ اسروئیل به پِرستیدَنِ بُتون ری کُوردِن. اوشون مُعادِی کِه بُتونَ بِپِرَستیدِن پِی زَنونِ خراب بِخُفتیدِن و بَچونِشونَه هَم سی بُتون قربانی بِکوردِن.
پاتِشاهونِ یَهودا اَ نَسلِ داوود بیدِن. بَعضِی اَ ای پاتِشاهون آدمونِ خوبِی بیدِن و با انصاف حکومَتِ کُوردن، و خُدانَه بِپِرَستیدِن .اَما دوبَـرِه پاتِشاهونِ یَهودا زَبین بیدِن. بَعضیاشون بَچونِ خوشونَه هَم سی بُتون قربانی بِکوردِن. دو بَـرِ مَردُمِ یهودا نُها خدا ویسیدِن و خُداهونِ دِگِهیَه بِپِرَستیدِن.
مَتَلِی اَ کِتابِ مقدس: کتاب اول پادشاهان فصل ۱ تا ۶ و ۱۱ و ۱۲