۴۰- عیسی مصلوب بییِس
بعدَ ایان که سربازون عیسانَ مَسخِرَه کُوردِن، بُوردنِش در، تا به صلیب کَشِنِش. اُوشون مجبورِش کُوردن تا صلیبِشَ پِی خودش بَرَه.
سربازون عیسانَ بُردن جایی که جُلجُتا (یعنی جمجمِه سر) بِگُفتِنش. دَسْ پاشَه ور صلیب پِی مِیخ کُفتِن. اما عیسی فرمود: «اِی پدر! یِی مردمَه بَخش، سیایان که نَدونِن چِه بِکُنِن». به فَرمونِ پیلاتس بالا سَرِش کتیبه وَندِن که ریِیِش نِوِشتَه بید: ایانَه پاتِشاه یهودَه.
بعدِش سربازون سر جومِه عیسی شرط بَسِن. پِی ای کار پیش بینی کتاب مقدس جور درومهَ که بِگُفت: «جومامَه بینِ خوشون بَـرِ کُنِن و سر عبای مو شرطِ بَندِن».
سربازون همو دَم دو دُز هم مصلوب کُوردِن و عیسانَ پِی صلیب مِنجاشون وَندِن. یکیشون ور عیسی دَنگِ دِروُورد، اما او یکی گف: «تو اَ خدا نَمتَرسی؟ اُومون گناهکارِیم اما ای پیا بِی گناهَه.» اوسون به عیسی گفت: اِی عیسی! مونَه مِی پاتِشوهییِت یاد بیار.» عیسی جُواب داش: «تو همی امروز پِی مو مِی بهشتِ میویِی.»
گپونِ دینی یهود و مردُمِی که اونجون بیدِن عیسانَ مسخِرَه کُوردِن و بِگُفتِن: «اَر تو پسر خدویی اَ صلیب بیو زِیر و خوتَه نجات دِه! اوسون اُمون وَرِت ایمان میارِیم.»
اَر چِه ظُور بید، اما آسُمونِ کُلِ او محل توریک بییِس. ای توریکی چَن سو ساعت طول کَشید.
بعدش عیسی داد زَند: «تموم بییِس. ای پدر، روح خومَه به دَسِ تو بِداهام.» اوسون سرِ خوشَه اُووُورد زِیر و روحِشَه تسلیم کُورد. او دَم که جون دا زمین به لَرزه افتید و پردِه گَپ معبد، که مردمه اَ حضور خدا جدا بِکورد (قدس القداس)، اَ بالا تا زیر دو قَل بییِس.
عیسی پِی مُوردنِش رَهی گُشید تا مردم تَرِسسهَ بُوون پیشِ خدا آیِن. مُعادِی که پاسبونِ رومی ای جریونانَه دید گف: «اَراسینْ که ای پیا بی گناه بید. او پسر خدا بید.»
بعدش دو تا اَ گَپون یهود، نیقودیموس و یوسف کِه ایمان داشتِن عیسی همو مسیحِ موعودَه، پیش پیلاتس رفتن و مَخاسِن جسد عیسانَ تحویل گِرن. اوشون جسدَ پِی پارچِه کتون پِیچِنیدن و مِی مقبَرِه سِنگییِ وندنش و بَردِ گَپی دم درِ قبر وَندِن تا بَسَه بُووَه.
مَتَلِی اَ کِتابِ مقدّس: کتاب انجیل متی باب ۲۷ آیههای ۲۷ تا ۶۱، کتاب انجیل مرقس باب ۱۵ آیههای ۱۶ تا ۴۷، کتاب انجیل لوقا باب ۲۳ آیههای ۲۶ تا ۵۶، کتاب انجیل یوحنا باب ۱۹ آیههای ۱۷ تا ۴۲