Gussa 42 : Issa samiya dro tèr

1. Yom ay Allah Issar noussour djirou dro, madjira Issa tchou niya kolo taganditchikki, mara inna ara Issar wakkayinna daha yeyenditchikki, mara noukou kantammayr Issa massi tiksigré didi, tchirou meré ounnou ogonni aryay nini yintou. Agou moura ini ngayntigaa hanayndre bey.

1. Issa moura koulo rini gui tagandou. Tchirou mouray harayintiré bey. Issa marar wourou ini daa yeyentitchikou. Maray ini Issa daha wakkayinna guinna fattou. Ama Issa gordi harayintiré bey anw kouri guissi diri.

1. Tékénèr Issay wassa tchenou méra Allanga. Anour béba fattigré; amma zountay Issar kizzey tchentig ni tchittig ni. Tchirou néba fattigré: meré saga rigui diguissa nagouzoungar.

1. Loko moura ny ay tourtouga goubtchintour bou touway édintchi, Issangar kouliyintou moura gui bozzougrére. Agou moura gui tèr bouzzou. Kétèr achayintigrére boussou. Issa dippo addi ngoulli godji ni Allah chokourtchi ni guir. Kétèr madjira ama Issa gordi harayintou. Tchirou kétèr mourar fouchinné tiguissou.

1. Amma tchouwa gourou-gourour ayré Issa yintou! tèr djillandou noukou key miréy mera Allanga tafssirtchi djentiga, tara bour kannay djittrè! koumayindre mara yertchindini saga goudouss tourtou, koy goudouss riddoure, madjira Issangar fattou, Issa nini yintou! tinda mérére douttour yintou.

1. Wokkide madjiraye yeyentitchikkirou, yaga moura tchikou dro Issa fouchi. Miré fadou: wassara yi! madjira marou guissou didi, tchirou Issa mourar farou: n'djan nara awoussa, n'djan tani ama Issa gordi gantouma? Kaa noura yé diga nourayé rantou. Maar kissar tangou kè danni. Miré maar hinené gordi wasa tchingrére, mourarou ini tiyou brayi bossi trone goyintou tchentou ni woui.

1. Issay far: ini tangar law Allay fadda guinna reké waccaynga tani nifatire. Agou Issay marar méra Allah gallir fahamchère. Marar fariguiré: annourdé néba rouyintou tani dè massi kizeyarigayé dounoussouga yé ogoni ya agouzou tisso amma yourssa dro yerdriga yé.

1. Néba rouyintou madjira tinta labra Allaya balag-tchintig. Amma guinnar fattigré toubtchintè. Toubtchinto Allay biga hounta gofourtchingui. Madjira tangan ballaguintigui ny goudouzzour. Nara ini tani guenirou yé fadrou yé ina daha tangou da wakkayinna yé guinna nara chahada.

1. Diguissa mourta touzowa dro Issa madjira sounar mountour fouchi amma koura kadra for na ngoulli canaan fouchi mirey nimma madjira sounar accate tchi-tchenne. Ina mounta koura ni kara chère.

1. Issay madjira sounar farigré: tangar Allay douna djenni, inna sama yé boussammayé da tchikka, hokoumniri gui. Agounni noufattrigui ; sourtouna amma guinna karatchettou. Terou bara amangna sourou ruhal khoudouss ngaro yiou dro tintig. Inna noufattrou guinna dillirou gastiguero na lantou. Yantou didou, tani nara gui dimanro dji.

1. Issa noussour yertchinner bara diguissa mourta touzzo tiguissou, mieéy madjira sounar farou: goudouss dro n'djikir rabouyi douna tchendè, belkè rouhoul goudouss nara daha nagui, ter bara, Issa ngouli samiya dro tèr! kira na merére tchakkindou.

Gussa mine kitab al moukhadass: mine indjil mattah soura 28: mine aya 16 ila 20; mine indjil markhouss soura 16: mine aya 12 ila 20; mine indjil loukka soura 24: mine aya 13 ila 53; mine indjil youhanna soura20: mine aya 19 ila 23