1. Hiyay Pamalhowa

Wanae ye pandogi nin kaganaan. Hiyay onan pinalhowa nan Apo Dioh ket babe-lota. Ket ha babe-lota, homain po hinyaman a makit o angkabi-ay, ta pawa lanom po boy maliteh. Ket hiyay Ihpiditon Dioh, ampagtige ya ha babe lanom. (Gen 1:1-2)

Hinabi nan Apo Dioh a, “Magkamain henag.” Ket nagkamain yan peteg. Ket naaliket yay Apo Dioh ha dinyag na. Ket pinayngilbo nay mahnag boy maliteh. Hiyay mahnag, pinangalanan na yan “mangaamot”. Hiyay maliteh, pinangalanan na yan madeglem. Hilayati ye pinalhowa na ha onan mangaamot.

Ha ikalwan mangaamot, hinabi nan Apo Dioh, “Magkamain yay pietan nin lanom.” Ket nagkamain nin pietan. Hiyay kagitna, nipatagay ya a nag-ilyadin owep. Hiyay dapit aypa, nag-ilyadin dagat.”

Ha ikatlon mangaamot, pinayngilbo nan Apo Dioh ye lota boy lanom. Hiyay namal-an, pinangalanan na yan “lota”. Ket hiyay lanom, pinangalanan na yan “dagat”. Naaliket yay Apo Dioh ha dinyag na. (Gen. 1:9-10).

Pangayadi, hinabi nan Apo Dioh, a, “Tomobo ha lota ye kaganaan a kalahin kakayo boy iilamon.” Ket tinomobo bay. Naaliket yay Apo Dioh ha dinyag na. (Gen. 1:11-13)

Ha ikaapat a mangaamot, hinabi nan Apo Dioh, “Magkamain mangaamot, bowan, boy bitoen ha langit a mamahnag nin babe-lota.” Ket nagkamainbay. Makaoli kanlan hilain, matandaan tawo ye panlomabah nin mangaamot o madeglem, bowan o taon. Naaliket yay Apo Dioh ha dinyag na.. (Gen. 1: 14-19.)

Ha ikaliman mangaamot, hinabi nan Apo Dioh, a wana, “Magkamain nin nakahinadi a angkabi-ay ha dagat. Boy magkamain met nin kaganaan a kalahin mamanokmanok ha lowang.” Ket nagkamainbay. Naaliket yay Apo Dioh ha dinyag na. Ket in-inged na hila boy hinabi na a, “Magpakalabong kawo, ta pon-en yoy babe-lota.”

Ha ikaanem a mangaamot, hinabi nan Apo Dioh, a wana, “Magkamain nin kaganaan a kalahin aayop ha lota.” Ket nagkamainbay. Naaliket yay Apo Dioh ha dinyag na. (Gen. 1:24-25.)

Haanin, hinabi nan Apo Dioh, a wana, “Manyag kitawon tao. Diyagen tawo yan kawangih tawo. Hiyabay ye mamaala ha babe-lota boy kaganaan a aayop.”(Gen. 1:26-27)

Hiyay dinyag nan Apo Dioh, nangwa yan lota ket dinimeng na ya a kadih laki. Pangayadi, ineyepan nay balongoh na, ket nagkamain yan bi-ay. Pinangalanan na yan Adan boy nanyag yay Apo Dioh nin maghan logal a pananamanan. Ket hiyay Adan ye pinabaala na ha pananamanan.. (Gen. 2:7.)

Ha bonak nin pananamanan, main yan intanem ye Apo Dioh a loway poon kayon nakidoma. Hiyay magha, poon kayon makaibyay bi-ay. Ket hiyay ikalwa, poon kayon makaibyay nin tinanda tongkol ha manged boy maloke. Imbilin nan Apo Dioh kanan Adan, a wana, “Malyadi mon kanen ye kaganaan a dawan kayo ihtibay, powida tanay dawan poon kayon makaibyay tinanda tongkol ha manged boy maloke. Ta no kanen mo yatew, matey ka.” (Gen. 2:16-17.)

Haanin, hinabi nan Apo Dioh, a wana, "Aliwan manged a hiyay tao, ket bobokod na.” Hinabi na yatew, ta homain yan mapagkalamo ye Adan. ( Gen. 2:18.)

Haanin, hiyay Adan, pinakatoloy na yan Apo Dioh nin maiplek, haka ya nangoyoh nin maghay tagyang na. Ket dinyag na ya a babayi. Ha nimokat yaynay Adan, nakit na a main yaynan kalamo. (Gen. 2:21.)

Ha nakit nayan Adan ye babayi, nimata yan angkaaliket, a wana, “Hah-ha! Halamat, ta main akoynan mapagkalamo. Pangalanan ko yan ‘babayi’.” Yati ye hangkan a lakwanan nayan laki ye totoa na, ta maylamo hilaynan miahawa boy mag-ilyadi hilaynan mamagha (Gen.2: 23-24.)

Dinyag nan Apo Dioh ye laki boy babayi a kawangih na. Ket in-inged na hilan lowa boy hinabi na kanla, a wana, “Magpakalabong kawo boy pon-en yon aanak yo ye babe-lota!” Naaliket yay Apo Dioh ha kaganaan a dinyag na. Ket nalyadi yati ha ikaanem a mangaamot.

Ha ikapiton mangaamot, nayadi naynan Apo Dioh ye kaganaan a pamalhowa na. Kaya-bay nagpainawa ya. In-inged nay ikapiton mangaamot boy dinyag na yan nahantowan. Wanabay ye pamalhowa nan Apo Dioh ha kaganaan a babagay.

//A Bible story from: Genesis 1-2//