7. In-inged na yan Apo Dioh ye Jacob

Ha linomake hilaynay kambal. Hiyay Isaac, ampakaadoen na yay makaagat. Noba hiyay Rebekah, hiyay makaydeng met ye ampakaadoen na. Hiyay Esau, māngakal ya. Noba hiyay Jacob, māngomponi ya ha baey.

Ha maghay mangaamot a ampoli yay Esau a ibat ha panganopan, mabitil yaynan tobat. Kaya-bay hinabi na kanan Jacob, a wana, “Katongno ko, byan mo ko man nin kanen ha inloto mo!” Nakibat yay Jacob a,“Katongno ko, biyan katan kanen, dapot tanay ibyay mo kangko ye katolidan nin pagkamakaagat mo.” Ket hiyay Esau, in-ibyay na met, ta mabitil yaynan tobat. Kaya-bay hiyay Jacob, binyanan na yayna met nin kanen ye Esau.

Ha matoa yaynay Isaac, labay na yaynan ibyay kanan makaagat ye kangedan nan Apo Dioh kana. Noba ha natandaan nan Rebekah a hiyay makaagat ye labay nan Isaac a pamyayan, dinandali na yan inopitan ye makaydeng.

Ket hiyay Isaac, tinalingo la ya, ta labay nan Rebekah a hiyay makaydeng ye pamyayan nan Isaac nin kangedan na.

Ha natandaan nan Esau a tinalingo la yan mitaindo ye bapa na, napoot yan tobat. Ket inihip nan Esau a, “No matey yaynay bapa mi, ket pateyen ko yay ali ko.”

Noba ha natandaan nan Rebekah boy Isaac ye an-ihipen nan makaagat, hinabi nan Rebekah kanan makaydeng a, “Anak ko, manandali kaynan makew kanlan papaltido ko, ta labay na kan pateyen kaka mo.”

Ha anti yaynay Jacob ihtew ha logal nin papaltido nan indo na, nangahawa yayna ihtew, ket nagkaanak hilan labinloway lālaki boy maghay babayi. Ket binomatnang yan tobat ihtew.

Ha main yaynan lowampo a taon ye Jacob ihtew ha logal lan papaltido nan indo na, noli hilayna ha Canaan a logal a impangako nan Apo Dioh kanla, lamo na hilay papamilya na, iipoh boy aayop na.

Ha anti hilayna ha dān, angkalimo ya. Ta naihipan na ye inihip nan kaka na hatew a patyen na ya. Kaya-bay hiyay dinyag na, nangipaona yan malabong a kambing boy totopa. Lowanggatoh boy lowampo ye bilang nin kambing. Wanabay met ye bilang nin totopa. Hilati ye pagkamolta na kanan kaka na.

Noba hiyay kaka na, alan na yaynan pinatawad ye ali na. Ket ha napayngingikit hilayna, napaytipontipon hilan mahayaghag. Ket hiyay Jacob, nagkamain yaynan katanaan. Ket kinomonin yayna ha logal a impangako nan Apo Dioh kanla. Ket ha natey yaynay Isaac a bapa la, hiyay papangako nan Apo Dioh kana, naipalakew ya met kanan Jacob.

//A Bible story from: Genesis 25:27-33:20//