12.

Ha pabekah, inomalih hilaynay Israelita ha Ehipto. Ket angkaaliket hilan tobat, ta napalihway hilayna ha pagkaipoh la. Boy angkaaliket hila ta makalakew hilayna ha logal a impangako nan Apo Dioh kanla. Ket hilay Egipsio, namyay hilan didigalo a ginto boy metal kanlan Israelita. Main met nangaanon Egipsio a nakilakew kanla ta namteg hila met kanan Apo Dioh.

No mangaamot ye pangomodang la, hiyay Apo Dioh a anti ha owep ye ampangibagnoh kanla. Ket no madeglem ana met, ampag-ilyadi yan apoy a ampangona kanla omen ya mamahnag kanla.

Noba ha nakaalih hilaynay Israelita, naoman a naman ye ihip nan Poon Paraon, ta labay na hilayna man paodongen ye Israelita a pag-ipoh na. Nalyadi yati ta-omen na ipakit Apo Dioh a igit yan makapalyadiyan dinan kanan Poon Paraon boy ha diohdiohan ha Egipto.

Haanin, hiyay Poon Paraon, kalamo na hilay hohondaloh na, kinamat la hilay Israelita. Ket ha natamolaw lan Israelita ye hohondaloh a ampangamat kanla, nalimwan hilan tobat. Napatokok hila, ta ha adapan la ket dagat anan Matibya, ket ha golotan la, hilay hohondalon ampangamat kanla. Kaya-bay tinomangih hila a wanla, “Inomalih kitawo nayi ha Egipto ta-omen kitawo matey ihti?”

Hiyay Apo Dioh, hinabi na kanan Moises, a wana, “Makew kawoyna ha gilid nin Dagat a Matibya, ta ipakit koy kapalyadiyan ko.”

Ket hiyay Apo Dioh a anti ha owep, nakew ya ha pietan lan Egipsio boy Israelita. Kaya-bay hilay Ehipsio a ampangamat, ahe la hilayna makit ye Israelita.

Pangayadi, hinabi nan Apo Dioh kanan Moises, a wana, “Itawo moy teken mo ha dagat ta-omen yan madakay.” Dinyag nan Moises ye hinabi nan Apo Dioh. Ket hiyay Apo Dioh, namaangin yan mak-haw. Ket nagbenga ye dagat.

Ket hilay Israelita, kinomodang hila ha mamalan lota a linomipay ha Dagat Matibya.

Haanin, ha ahe yaynay owep, nakit lan Egipsio a antomakah hilaynay Israelita. Kaya-bay kinamat la hila.

Ket hilay Ehipsio, hinombong la hilay Israelita ha dinanan la. Noba hiyay lota a namala, pinapita’ na yan Apo Dioh. Kaya-bay ihtew hilayna nangaitahek ye Egipsio.

Ha nakalipay hilaynay Israelita, hinabi nan Apo Dioh kanan Moises, a wana, “Itawo moyna man ye teken mo ha dagat.” Ket dinyag na met Moises. Ket niaep ye lanom. Kaya-bay hilay kaganaan a hohondalon Egipsio a nangamat, nangamatey hilan nangalimeh.

Ha nakit lan Israelita ye nalyadi kanlan Ehipsio, namteg hilayna kanan Apo Dioh. Boy namteg hilayna met a hiyay Moises ye propita nan Apo Dioh.

Naaliket hilan tobat ye Israelita, oli ha pangiligtah nan Apo Dioh kanla ta ahe hila nangamatey boy ahe hilaynan ipoh. Malihway hilaynan manggalang kanan Apo Dioh. Nagkanta hilan panggalang kanan Apo Dioh oli ha pangiligtah na kanla.

Imbilin nan Apo Dioh kanlan Israelita, a wana, “Tepe taon wanabay a bowan, hayaghagen yoy pangiligtah ko kanyo. Mangiiyaw kawon topan maligha ket ikakan yo ya ha tinapay a homain pampalbag. Diyagen yo yati bilang pangihipan yo nin pangiligtah ko kanyo ha Egipto.

//A Bible story from: Exodus 12:33-15:21//====== 13. Hiyay Kahondoan nan Apo Dioh kanlan Israelita ======