42.

Kananyatew met a mangaamot ha bibi-ay yan oman ye Apo Jesus, main lowa kanlan mānombong na ye angkomodang palakew ha domondon a banwa. Legan angkomodang hila, ampaytongtongan lay kaganaan a nalyadi kanan Apo Jesus. Hiyabay ana ye anhigodowen lan mamalihway, noba natey ya met. Kaya-bay ha hinabi nin nangaanon babayi kanla a nabi-ay yan oman ye Apo Jesus, ahe la hila pinamtegan. (Luk 24:13a-14)

Legan ampaytongtongan lay nalyadi, hiyay Apo Jesus, hinomaley ya kanla, ket nakiadaad ya ha pangomodang la. Noba agya ampay-adaad hilayna, ahe na palobohan nin Apo Dioh a mabalayan laya. Haanin, tinepet na hilan Apo Jesus, “Hinyay ampaytotongtongan yo?” Ket hinabi layan kana ye kaganaan a nalyadi kanan Apo Jesus. Nibaan la maghan dayohan. Kaya-bay ahe tanda ye nangalyadi ha banwan Jerusalem. (Luk 24:15-24)

Haanin, hiyay Apo Jesus, impalinaw na kanla ye kaganaan a impaholat nan Apo Dioh a tongkol ha Messias. Impaihip na kanla ye inholat lan kaganaan a popodopita a katapolan yan magdiha nin pamaidap bayo yan matey ye Apo Jesus. Noba mabi-ay ya met ha ikatlon mangaamot. Andodomeglem ana ha linomateng hilayna ha badyo a lakwen la. (Luk 24:25-28)

Kaya-bay hilay loway apohtol, kinatongtong layay Apo Jesus, a wanla, “Ihti kayna kammi matoloy, ta andomeglem ana.” Kaya-bay, hiyay Apo Jesus, nakilakew yayna kanla. Ha dinomongo hilaynan mangan, hiyay Apo Jesus, nangwa yan tinapay, ket pinahalamatan na ya kanan Apo Dioh. Pangayadi, binih-il-bih-il na ya haka na inggawang kanla. Ha wanabay a dinyag na, nabalayan la yaynay Apo Jesus, noba naplak ya ha pamilew la. (Luk 24:29-31)

Hinabi la a, “Hiyay Apo Jesus met manayti. Kaya-bay angkaaliket kita legan ampakitongtong ya kanta ha dān boy an-ipalinaw na kantay impaholat nan Apo Dioh!” Ket kananyatew met ateed, hilay loway apohtol na, nanige hilaynan paodong ha banwan Jerusalem. Panlomateng la ihtew, hinabi la kanlan kanayon a aapohtol a, "Angkabi-ay yay Apo Jesus! Nakit miya!' (Luk 24:32,33-34a,35)

Legan ampaytotongtongan la po ye nalyadi, hiyay Apo Jesus, ket tampol yan napakit kanla a nideng ha bonak la. Ket hinabi na kanla, “Matanggap yo dayi ye katanaan.” Naigat hila boy nalimowan, a wanla, “Ah! Hinyati? Anito?” Haanin, hinabi nan Apo Jesus kanla, “Taket ta angkalimo kawo boy ampaglowa-lowa? Hiko yati! Bilewen yoy gagamet ko boy bibitih ko. Kimpaan yoko. Hiyay anito, homain yan laman boy bot-o noba hiko, main.” (Luk 24:36-39, 41-43)

Haanin, hinabi nan Apo Jesus kanla, “Ha ampaylamo kitawo po ha hatew, hinabi koyna kanyo a katapolan yan matopad ye kaganaan a impaholat kanan Moises boy hiyay inholat lan kanayon a popodopita boy hilay nakaholat ha liblon Kakanta a tongkol kangko.” Haanin, binyan na hilan pagkataloh ta-omen la matalohan ye impaholat nan Apo Dioh. Hinabi na kanla, “Yati ye nakaholat, ‘Hiyay Cristo a impangako nin Dioh, ket katapolan yan magdiha nin pamaidap boy matey. Noba ha ikatlon mangaamot, mabi-ay yan oman.’ (Luk 24:44-46)

Boy naiholat po a katapolan maipatanda paibat ha Jerusalem anggan ha kaganaan a lologal ihti ha babe-lota a makaoli kangko, ket patawaden nan Apo Dioh ye kaganaan a ampaghehe ha kakahalanan la.” Hinabi na po nin Apo Jesus, “Ket hikawoynabay met ye nakakit nin kaganaan a nalyadi kangko. Kaya-bay ipatanda yoyna yati kanlan tatao. (Luk 24:47-48)

Malabong a okdo a napakit yay Apo Jesus kanlan aapohtol na ha loob nin apatapo a mangaamot. Minghan, napakit ya kanlan maigit limanggatoh a katao. Malabong a okdo a pinaptegan na kanlan aapohtol na a angkabi-ay ya. In-adal na met kanla ye tongkol ha panakopan nan Apo Dioh. (Acts 1:3a)

Haanin, hiyay Apo Jesus hinabi na kanlan aapohtol na a, “In-ibyay na kangkon Bapa ko ye kaganaan a kapalyadiyan ha langit boy ihti ha babe-lota. Kaya-bay lakwen yo hilay tatao ha kaganaan a lologal, ket diyagen yo hilan mānombong ko. Bawtihmowan yo hila ha ngalan nan Bapa, Anak, boy Ihpiditon Dioh. Adalan yo hilan manombong ha kaganaan a imbilin ko kanyo. Pakaihipen yo yati. Lanang yo kon kalamo angga ha kalampohan nin babe-lota.” (Mat 28:18-20a)

Pangalabah nin apatapo a mangaamot, hinabi nan Apo Jesus kanlan aapohtol a, “Adi kawo po an-omalih ihti ha Jerusalem. Agaden yo po ye Ihpiditon Dioh a impangako nan Bapa ko a itobol na kanyo a omen ha hinabi koyna kanyo hatew. Pangahabi nan Apo Jesus yatew, ket nipatagay yaynan palakew ha langit. Legan ambilewen la ya, napahanipan yan owep, ket ahe la yaynan nakit. Nipanik yayna ha langit ket ihtew ya nikno ha dapit-wanan nan Apo Dioh ta-omen pamaalaan ya kaganaan a babagay. (Mat 28:20b, Acts 1:4,9)

//A Bible story from: Matthew 28:16-20; Mark 16:12-20; Luke 24:13-53; John 20:19-23; Acts 1:1-11//====== 43. Nandogi yaynay paytipon lan māmteg nan Apo Jesus ======