6.

Ha matoa yaynay Abraham boy bayon tao yayna met ye Isaac, hiyay Abraham, nangitobol yan ipoh na a makew ha logal lan totoa na. Ta makew yan mamili nin balatang kanlan papaltido na, a mag-ilyadin mapag-ahawa nan Isaac a anak na kanan Sarah.

Ha kaboyotan nin pangomodang nan ipoh, main yan nakit a libon. Ket nagpaked ya ihtew. Ha anlolomiteh ana, anlomateng hilaynay bābayin makew manayeb. Nakigwang yay ipoh kanan Apo Dioh, a wana, “Apo Dioh, haglapan mo ko. Anti ko ihti ha haley nin libon a panayeban lan babalatang. Hiyay labay ko, no hinya dayi ye mamiyay kangkon inomen boy mamainom kanlan kakamelyo ko, ket yabaytew yaynay pagkakitan a hiyabay ye labay mon pag-ahawa nan Isaac.” Legan ampakigwang ya po, main anan linomateng ihtewbay a matampa a babayi. Rebekah ye ngalan na. Apo na yan Nahor a katongno nan Abraham. Ket hiyay Rebekah, pinainom na yay ipoh boy pinainom na hila met ye kakamelyo na.

Pangayadi nin pamainom nan Rebekah, ket noli yayna. Nakilakew ya met ye ipoh. Ha niabot hilayna ha baey, hiyay ipoh, inawok na kanlan pamilya nan Rebekah, a wana, “No malyadi dayi, makilakew yay Rebekah kangko, ta omen naya mapag-ahawan Isaac a anak nan amo ko.” Ket hiyay indo nan Rebekah, tinepet na ya met ye Rebekah, a wana, “Rebekah, makilakew ka nayi kana o ahe?” “Awo indang! Makilakew ako kana,” Ha niabot hilayna ha baey nan Abraham, nakit na yan Isaac. Ket tinanggap na ya met nin Isaac a pag-ahawa na.

Haanin, pangalabah nin panaon, natey yay Abraham. Ket hiyay kangedan a impangako nan Apo Dioh kanan Abraham, ket tanda naynan alan nin Isaac a maipalakew kana. Noba hiyay Isaac boy Rebekah, homain hila po anak. Inihip nan Isaac, a wana, “Hiyay maidap, homain kayi po anak. Way-ihtew ye kangedan ko? Way-omen akon mag-ilyadin bapa nin malabong a nanahyon?”

Ket hiyay Isaac, nakigwang ya kanan Apo Dioh, a wana, “Apo, no kalabayan mo, magkaanak kayi.” Ket tinopad nan Apo Dioh ye awok nan Isaac ha pamakigwang. Kaya-bay binomoktot yay Rebekah.

Ket kambal ye boktot nan Rebekah. Ket hinabi nan Apo Dioh kana, a wana, “Hiyay makaagat kanlan kambal a anak mo, ket paghilbiyan na yay makaydeng.”

Ket ha naianak hilayna, hiyay makaagat, matibya ya boy malabok ye lalaman na, ket pinangalanan na yan Esau. Hiyay makaydeng met, pinangalanan na yan Jacob.

//A Bible story from: Genesis 24:1-25:26//