19. Hilay popodopita

Paibat po ha onan panaon, ampangitobol yay Apo Dioh nin podopita na a makew kanlan Israelita, ta hilabay ye ampangipatanda kanla nin an-ipahabi nan Apo Dioh.

Hatew ha panaon a hiyay Ahab ye poon ha Israel, hiyay Elias ye podopita nin Dioh. Hiyay Poon Ahab, ingaygay na hilay tataon manggalang ha dioh-diohan a Baal. Ket haanin, hinabi nan Elias kana, a wana, “Tandah yan ahe mangodan ha kaganaan a lologal nin Israel, agya dalaidi bengat, anggan ahe ko po habiyen a mangodan ya.” Kaya-bay napoot yan tobat ye Poon Ahab.

Hilay tatao nan Poon Ahab, antapolen la yay Elias. Noba ahe la ya nakitan ta pinatayo na yan Apo Dioh ha maghay logal a main hobol a malyadi nan pinoman. Ket tepe mahanib, main oowak a ampangilakew kana nin tinapay boy kena. Noba oli ta ahe yayna ampangodan, ket namal-an yaynay hobol a ampinoman na.

Kaya-bay hiyay Apo Dioh, intobol na yay Elias ha maghan nahyon a maahaley ha Israel. Main met bawon babayi ihtewbay a main maghay anak a lāki. Ket madanon anan maoboh ye pamangan la, oli ta naboyot anan homain odan. Noba agya wanabay man, pinaona laya po a pinakan ye Elias. Ket hiyay nalyadi, agya naboyot yay Elias ihtewbay, ahe la angkaoboh-oboh ye pamangan la, ta hiyay Apo Dioh ye ampamahbol nin pamangan la.

Pangalabah nin tatloy taon boy kagitna, hinabi nan Apo Dioh kanan Elias, a wana, “Mag-odong kayna ha Israel, ta habiyen mo kanan Poon Ahab a paodanen ko yayna.” Noba ha nakit na yan Poon Ahab ye Elias, hinabi na, a wana, “Ah! Anti kayna manayti a ampanggolo ha Israel!” Nakibat yay Elias, a wana, “Yo, hikay mapanggolo ha Israel! Ta naliwaan moy peteg a Dioh. Ket haanin, ampanggalang kayna ha dioh-diohan a Baal. Haanin, ilakew mo hilay tatao ha Mapantay nin Carmelo.””

Kaya-bay nakew yay Poon Ahab boy hilay tatao ha Mapantay nin Carmelo, lamo la hilay 450 a podopita nan Baal. Ket haanin, hinabi nan Elias kanlan kaganaan, a wana, “Paholong nayi a paoman-oman ye ihip yo tongkol kanan Apo Dioh? No hiyay Apo Dioh ye peteg a Dioh, ket paghilbiyan yo ya. Noba no hiyay Baal ye peteg a Dioh, ket hiyay anan bengat ye paghilbiyan yo!”

Pangayadi, hinabi nan podopitan Elias kanlan podopita nan Baal, a wana, “Mangwa kawon baka a pateyen yo. Ket hapoen yo ya ta ihagpa yo. Noba adi yo ya an-olamen. Ta no peteg a hiyay Baal ye Dioh, hiyabay tana ye mangolam. Ta agya hiko met lano, wanabay met ateed ye diyagen ko.” Ket dinyag lan peteg nin podopita nan Baal ye hinabi nan podopitan Elias.

Ket nakigwang hila, a wanla, “Dioh min Baal, leng-en mo kayi.” Nikahilem hilaynan ampakigwang a ampangha boy anhogat-hogaten layna ye loti la noba homain yan pakibat ye Baal.

Ket ha mahilem ana, hiyay Elias, hiyabay ana met ye nangihagpa nin hinapo a baka kanan Apo Dioh a anggalangen na. Ket hiyay dinapat na, pinabohbohan na po nin labinlowan halaw a lanom ye hagpa na. Ket naheb anan lanom ye pandongot boy palibot nin hagpa.

Pangayadi nan pinabohbohan, ket nakigwang ya, a wana, “Apo, a Dioh nan Abraham, Isaac boy Hacob, ipakit mo haanin a hika ye peteg a Dioh nin Israel boy ipakit mo met kanla a hiko ye māghilbi mo. Ket diyagen mo Apo ye awoken ko kamo ta-omen la matandaan nin tatao a hika ye peteg a Dioh.”

Kapipikhaan, nangiampag yay Apo Dioh nin apoy a paibat ha langit a nangolam nin hagpa, kayo boy dadapah angga ha kinomlang ye lota ha palibot nin pangihagpaan. Ket ha nakit lan tatao yatin nalyadi, nanalimokod hila boy hinabi la, a wanla,“Hika Apo ye peteg a Dioh! Hika Apo ye peteg a Dioh!”

Ket hinabi nan Elias kanlan tatao, a wana, “Higi! Dakpen yo hila! Adi yo hila ampaolayan a makatakah ye popodopeta nan Baal!” Kaya-bay dinakep la hila boy pinatey.

Ket hinabi na met nin Elias kanan Poon Ahab, a wana, “Tampol kaynan mag-odong ha banwa ta madanon anay malgeh a odan.” Ha ahe nagboyot, nangodan yaynan peteg nin malgeh boy makhaw ye agoot. Kaya-bay oli ha apoy a ibat ha langit boy ha malgeh a odan, ket natandaan layna a hiyay Apo Dioh ye peteg a Dioh.

Hiyay Elias, ahe ya natey ta kapipikhaan, anti yaynan tampol ha langit. Pangayadi, hiyay podopita Eliseo met ye kahagiliyan na. Boy malabong met ateed ye dinyag nan Apo Dioh a kapagtakaan makaoli kanan Eliseo. Hiyay maghan kapagtakaan a dinyag nan Apo Dioh, ket hiyay pamaitaah nan Eliseo kanan Naaman a kapitan nin hohondalon kalaban lan Israelita. Main yan hakit ha loti a ampakailoy ye Naaman. Ket nabalitaan nay tongkol kanan Eliseo. Kaya-bay pinakihabi na kanan Eliseo, a wana, “No malyadi dayi, paitaahen mo ko.” Ket haanin, intobol na yan Eliseo ye Naaman a makew ha Kabatowan nin Jordan a donglep yan mikapiton okdo.

Ha pamakange nan Naaman ye hinabi nan Eliseo, napoot ya boy ahe na labay ye makew. Noba nakew ya met ateed a dinonglep nin nikapiton okdo. Ket ha ikapiton okdon pandomlep na, ket ha kinomondolaw ya, nakit na a malinih anay loti na, ta pinaitaah na yaynan Apo Dioh.

Hilay popodopita, lanang lan an-ipatanda kanlan tatao, a wanla, “Maghehe kawoyna ha kakahalanan yo boy itgen yoynay panggalang yo ha dioh-diohan. Ta no ahe kawo magbi-ay nin matoynong boy ahe kawo manopad ha bibilin nan Apo Dioh, homain hapo a padohaan na kawo.”

Noba adi lan teed an-ibabano ye bibilin a an-ipatanda lan popodopita na. Ket ampateyan la hilay kanayon kanlan popodopita. Ket hilay kanayon, ampahakitan la hila a omen kanan podopita Jeremias. Ta ingkolbot la ya ha maalale a libon a homain lanom haka laya linakwanan, ket ihtewbay yaynan matey. Noba kinalonohan na yan Poon. Kaya-bay nilakew na yan kingwa ta-omen ya ahe matey.

Hilay popodopita, agya angkapatiyatiyaan hila, ket imbabala la po ateed ye impatanda nan Apo Dioh kanla, a wanla, “No ahe kawo maghehe ha kakahalanan yo, madama kawo.” Ket hiyay impaihip la met nin kanayon a podopita, wanae ya, “Ihipen yoy impangako nan Apo Dioh a itobol na yay Mesias a Mangiligtah kantawo!”

//A Bible story from: 1 Kings 16-18; 2 Kings 5; Jeremiah 38//