23. The Birth of Jesus

Nakataning yay Maria a magpakahal ha maghay matoynong a tao a nagngalan Jose. Ha natandaan nan Jose a boktot yaynay Maria, tanda na a aliwa nayan anak, kayabay inihip na a hiklito nayan ihyay ta-omen yan ahe mipading-ey ye Maria.

Hinabi nin anghel kanan Jose, "Adi ka malimo a mangikahal kanan Maria, ta naboktot ya makaoli ha kapalyadiyan nin Ihpiditon Dioh. Manganak yan laki ket pangalanan yo yan Jesus (hiyay labay habiyen Yaweh a Mangiligtah) ta hiyabay ye mangiligtah nin tatao ha kapadohaan nin kakahalanan la.

Kaya-bay hiyay Jose ingkahal nayay Maria boy inlamo na yayna ha baey la. Noba ahe nayan nilalay anggayna ha nanganak ya.

Madanon yaynan manganak ye Maria hatew ha imbilin nin gobilno nin Roma a katapolan moli ye kaganaan a tatao ha logal lan nangaonan totoa la ta-omen magpalihta. Kayabay hiyay Jose boy Maria paibat ha Nazareth a angkonaan la, nakew hilayna ha Betlehem. Ta ihtew ye logal nan Poon David a nangonan totoa la.

Ha linomateng hilayna ha banwan Betlehem, homain hilan mapagdagohan a baey. Kayabay ihtew hilayna napakha ha apon ayop ket ihtew ya naabotan nin panganak. Ket hiyay ongi impaida nan indo ha lambangan, olita homain id-an a naitaladan kana. Ket hiyay ongi, pinangalanan layan Jesus.

Kananyatew a madegelem, ha main makandin kataangan ha Betlehem main papahtol a ampagbantay nin totopa la. Kapipikhaan main anghel a ampakapolag ye kahnagan na ye nalakit kanla ket nalimowan hila. Haanin, hinabi nin anghel kanla, "Adi kawo angkalimo ta main akon manged a balita kanyo. Haanin met ateed a mangaamot, naianak yayna ha Betlehem ye Messiah a hiyay Apo!"

"Lakwen yo yan tapolen, makit yo ya lano ye maghay ongi a nalampinan a nakaida ha lambangan." Kapipikhaan main anan malabong a anghel a ampanggalang kanan Apo Dioh a wanla, "Galangen yay Apo Dioh ha langit boy magkamain dayin katanaan ihti ha babe lota boy kanlan tataon angkaaliketan nin Dioh!"

Ha ahe naboyot, naabot hilay papahtol ha angkonaan nan Jesus. Nakit la yay Jesus a nakaida ha lambangan a omen ha hinabi nin anghel kanla. Tobat ye aliket la ket nag-odong hilayna ha totopa ket nanggalang hila kanan Apo Dioh oli ha nange boy nakit la.

Ha mataang a banwa ha dapit pihwakan, nakakit hilay lalakin mangadonong ha titige nin bitoen nin naidoma ye henag na a bitoen ha lowang. Natalohan la a yati ye pagkakitan a naianak yaynay bayon Poon lan Jujudio.

Ket hilay lalakin mangadonong ha titige nin bitoen, ha nakit layay Jesus boy indo na, nanggalang hila kanan Jesus. Dinigalowan layan mangaalaga a digalo, pangayadi noli hilayna ha logal la.

//A Bible story from: Matthew 1; Luke 2// ====== 24. Hiyay Pamawtihmo nan Juan kanan Apo Jesus ======