3. Hiyay Lanab

Ha kaboyotan nin panaon, legan anlomabong ye tatao ihti ha babe-lota, ket ampilalo met ye kalok-an la. Olin yati, hinabi nan Apo Dioh a, “Apoen ko hilan kaganaan a angkabi-ay ha babe-lota makaoli ha lanab.”

Noba main maghay tao a ampanombong kanan Apo Dioh, ket angkaaliketan na yan Apo Dioh. Hiyabay ye Noe. Hinabi nan Apo Dioh kana a, “Noe, manyag kan mayadet a daong, ta lanaben koy babe-lota.”(Genesis 6:8-9, 13-14)

Hinabi na po Apo Dioh kanan Noe, a wana, “Hiyay kakadang nin daong a dyagen mo, ket magatoh boy apatapo a mitodoh. Lowampo boy tatlon mitodoh met ye bilal na. Ket hiyay katagay na, mapo boy tatlo met a mitodoh boy tatloy baag na. Malabong ye hilid na boy maghan bengat ye ilwangan na. Ket yatin daong, diyagen mo ya ha mangapah-ey a kayo.” Yatew ye impadyag nan Apo Dioh kanan Noe. Ket makaoli kananyatin mayadet a daong, maligtah ye papamilya nan Noe boy hilay balang padih nin kaganaan a kalahin ayop. (Genesis 6:14b-16,18)

Ket dinyag nan Noe ye impadyag nan Apo Dioh kana. Nayhahaglap hilan mitatabapa. Ket oli ha kayadetan nin daong, malabong po a taon ye napalabah bayo ya nayadi. Ket legan andyagen lan mitatabapa ye daong, anhabiyen na met nin Noe kanlan tatao a, “Main lomateng a mayadet a lanab. Katapolan a paghehean yoy kakahalanan yo kanan Apo Dioh.” Noba ahe hila namteg ye tatao kanan Noe (Gen. 7:5).

Hiyay Apo Dioh, intobol na yay Noe, a wana, “Manipon kawon malabong a pamamangan yo boy pamamangan lan aayop.” Ket ha naihadya laynan kaganaan, hinabi nan Apo Dioh kanan Noe, a wana, “Noe, homlep kawoyna ha daong. Ilamo moy ahawa mo, aanak mo boy aahawa la.” Ket wanabay ye dinyag la. Walo hilan kaganaan a hinomlep ha daong.

Ket pinahlep na met Apo Dioh ye balang padih nin balang kalahin aayop. Boy pinahlep na met Apo Dioh ye mani-piton padih nin kaganaan a kalahin aayop a malyadin ihagpa kana. Ket ha nakahlep hilaynan kaganaan, inleneb naynan Apo Dioh ye ilwangan nin daong. (Gen. 7:8-9)

Ket ha ikapiton mangaamot, ingkana nayna ye namaodan boy linomwah ye hohobol ha loob nin 40 a mangaamot boy madeglem. Ket nalipoh ye matiboen babe-lota, agya hilay mangatagay a mamatondol. (Gen. 7:11)

Ket nangamatey hilay kaganaan a angkabi-ay ha babe-lota. Hilay napatla bengat a angkabi-ay, ket hiyay Noe boy kalalamoan na ha loob nin daong. (Gen. 7:21-23)

Ha tinomgen anay odan, limay bowan po ye napalabah bayo ya inomyak ye lanab. Ha maghay mangaamot, nipatanghad yay daong nan Noe ha maghay matagay a matondol. Noba ha kanayon a pahen nin babe-lota, ket main po ateed maalale a lanom. Tatloy bowan po ye napalabah bayo ya nakakit ye Noe nin kanayon po a mamatondol. (Gen. 8:5)

Pangalabah nin apatapo a mangaamot, hiyay dinapat nan Noe, pinalpad na yay maghan owak ta-omen na matandaan no main anan namal-an a lota. Noba panlolompad naynan bengat, ta homain ya po makitan a namal-an a malyadi nan hagpaan. (Gen. 8:6-7)

Ket ha ahe naboyot, namalpad yay naman ye Noe nin maghan kalapati, omen na matandaan no namal-an anay lota. Noba nag-odong ya met ateed, ta homain ya po mahagpaan a hangan kayo. Pangalabah nin piton mangaamot, pinalpad nayay naman ye kalapati. Ha ahe naboyot, nag-odong yan main kaget a boong nin ilamon a hadiwa. Naaliket yay Noe ta natandaan na a namal-an anay lota boy antomobo anan oman ye iilamon. (Gen. 8:8-12)

Hiyay Noe, nangagad yay naman nin piton mangaamot haka na yayna man pinalpad oman ye kalapati. Ket ahe yayna nag-odong ye kalapati. Kaya-bay naihipan nan Noe, a, “Ah, kadihko main yaynan mahagpaan! Hiyay labay habiyen, angkatiyanan yaynay babe-lota.” (Gen. 8:12).

Ha pangalabah nin loway bowan, hinabi nan Apo Dioh kanan Noe, a wana, “Noe, lomwah kawoyna ha daong. Ibohan yoyna ye kaganaan a aayop ta-omen lan pon-en ye babe-lota.” Kaya-bay linomwah yay Noe boy papamilya na boy kaganaan a aayop. (Gen. 8:13-19).

Ha nakaonaoy hilaynan Noe ha daong, nanyag ya nin pangihagpaan nin olamen a hagpa kanan Apo Dioh. Ket inhagpa na kanan Apo Dioh ye kaganaan a kalahin aayop a malyadin ihagpa. Ket naaliket yay Apo Dioh. Kaya-bay in-inged na yay Noe boy papamilya na. (Gen. 8:20).

Hinabi nan Apo Dioh a, “Noe, an-ipangako ko kamo, ahe koyna lanaben oman ye babe-lota. Ahe koyna damaen ye babe-lota a makaoli ha lanab agya po man magkahalanan hilay tatao.” (Gen. 8:21).

Pangayadi, hiyay Apo Dioh, nangipakit yan bowakaw ha lowang bilang pagkakitan nin pangako na. Kaya-bay tepe main bowakaw, maihipan lan tatao boy Apo Dioh ye pangako na. (Gen. 9:12-17).

//A Bible story from: Genesis 6-8//