18.

Ha natey yay Poon David, hiyay anak na a Solomon ye kahagiliyan naynan manakop kanlan Israelita. Tinepet na yan Apo Dioh, a wana, “Hinyay labay mon ibyay ko kammo?” Nakibat yay Solomon, a wana, “Kadonongan dayi, Apo, ye labay ko.” Oli ta kadonongan ye inawok nan Solomon, naaliket yay Apo Dioh, ket dinyag nayan pinakamadonong a tao ha babe-lota boy pinabatnang na ya po.

Haanin, hiyay Poon Solomon, impaideng na yay Templo a Panggalangan kanan Apo Dioh ha banwan Jerusalem. Hinombong nay tikih a dinyag nan bapa na a hiyay Poon David. Ket haanin, aliwaynan Toldan Panggalangan ye ampanggalangan boy ampangihagpaan lan tatao nin idigalo la kanan Apo Dioh, no aliwan hiyaynay Timplo. Ket anti yay Apo Dioh kanlan tatao na, ta anti ya ha Timplon minamangaamot.

Noba hiyay Solomon, kalalabay na hilay babayin ibat ha lombo a lologal. Kaya-bay maigit malibo ye aahawa na. Ket hilatin babayin ibat ha lombo a lologal, pikakaget lay dioh-diohan la. Ket ha matoa yaynay Poon Solomon, nakitowad yayna met kanlan aahawa na a ampanggalang ha dioh-diohan.

Oli yatin dinyag nan Solomon, ket napoot yay Apo Dioh kana. Ket oli ha poot na, inihip na a, “No matey yaynay Solomon, pikalwaen koy panakopan Israel.”

Ha natey yaynay Poon Solomon, hiyay anak na a Rehoboam ye kahagiliyan na a nanakop kanlan Israelita. Ha maghay mangaamot, naytitipon hilay Israelita, ta magdiklamo hila kanan Poon Rehoboam a bayon Poon. Hinabi la kana a, “Tobat ye panakop nan bapa mo kammi boy mabyat ye paningil na nin bowih. Noba no makokompang ye panakop mo, pahakop kayi kammo.”

Noba hiyay Rehoboam, kamotawan ye impakibat na kanlan Israelita, a wana, “Ahe malyadin komompang. Ta no mabyat ye panakop nan bapa ko kanyo, lalalo po a mabyat ye panakop ko kanyo.”

Oli ha kabyatan nin panakop nan Poon Rehoboam, mapo kanlan lalahi nin Israel ye linomaban kana. Lowan bengat ye napatla a ampahakop kana. Hilati ye angkahabtan a, “Panakopan Juda.”

Hilay 10 a lalahin linomaban kanan Poon Rehoboam, namili hilan pagpoon la. Ket hiyay Jeroboam ye pinili la. Hilatin 10 a lalahi ye angkahabtan, “Panakopan nin Israel.”

Hiyay Jeroboam a poon ha Panakopan Israel, anhaaden na hilay malabay makew manggalang ha Timplo ha panakopan Juda. Kaya-bay ha hadili nan Panakopan ha Israel, nanyag yan loway andiohen ta-omen na hila igaygay a manggalang ha dinyag na a dioh-diohan. Ha wanabay a dinyag na, mabyat ye kahalanan na boy hilay Israelita.

Ket ha wanabay, napaykapoot ye Israel boy Juda. Ket yabay-in yaynay pinangobayan nin maheheg a paylalaban la.

Hiyay balang poon a nanakop ha Israel, ket mangaloke hila. Malabong kanlan hilatin popoon ye pinatey nin kapadiho lan Israelita. Ket hilatin Israelitan namatey kanla, labay la a hilabay anay manakop.

Hilay kaganaan a popoon a nanakop ha Israel boy kalabongan kanlan Israelita ket nanggalang hila ha dioh-diohan. Aliwan bengat yatew, ampakilaki boy ampakibabayi hila po boy an-idigalo la po ye aanak la bilang hagpa ha andiohen la.

Hilay nag-ilyadin poon ha Juda, ibat hila ha lahi nan Poon David. Ket hilay kanayon, magaling hilan poon boy ampanombong hila ha kalabayan nan Apo Dioh. Noba hilay kalabongan met, mangaloke hila boy ampanggalang hila ha dioh-diohan. Hilay nangaano kanla, an-ihagpay lay aanak la bilang digalo ha andiohen la. Ahe hilayna ampanombong kanan Apo Dioh.

//A Bible story from: 1 Kings 1-6; 11-12//