14. Nagbalangbalang ha wangwang

Hilay Israelita, ha natanggap laynay bibilin nan Apo Dioh ihtew ha Mapantay nin Sinai, hiyay Apo Dioh a anti ha owep, in-ogot na hilaynay Israelita ha logal a impangako na a anhabtan Canaan.

Ha hatew, impangako nan Apo Dioh a biyan na hilan lologal ha Canaan ye lalahi nan Abraham, Isaac boy Jacob. Noba ahe hila po malyadin homlep, ta main hilan latngen a malabong a tidibo ha Canaan a logal a impangako nan Apo Dioh kanla. Hilay Cananeo, ahe hila ampamteg kanan Apo Dioh, ta hiyay ampamtegan la dioh-diohan.

Hinabi nan Apo Dioh kanlan Israelita a, “Paalihen yo hilay kaganaan a Cananeo. Adi kaw ampakikakahondo kanla boy adi kawo met ampangahawa kanla. Boy katapolan a damaen yon kaganaan a diohdiohan la. Ta no ahe yon hombongen yatin bilin ko kanyo, mipaloy kawo met a manggalang ha diohdiohan la. Dat no wanabay, aliwaynan hiko ye anggalangen yo.

Haanin, namili yay Moises kanlan labinlowan lahi nan Israel nin titimaghan lāki. Ket hinabi na kanla, a wana, “Makew kawo ha logal a Canaan, noba adi kawo ampakit kanla, ta bilewen yoy logal no manged o ahe. Boy imatonan yo hila po ye tatao no makhaw ye panlaban la o makapey.”

Ket nakew hilan hinomlep ha Canaan a ahe napakit. Nangamaey hila ihtew nin apatapo a mangaamot ta mangimaton hila kanlan Cananeo. Ha nag-odong hilaynay labinlowan intobol na, hilay mapo kanla, imbalita la, a wanla, “Ihtewbay ha Canaan, ket malabong ye makan boy manged yay lota. Noba ahe kitawo malyadi a lomaban kanlan Cananeo, ta mangayadet hila boy maghen ye babanwa la. Ket hikitawo, ba-mo kitawon bengat kowangey a mangakandi kanla. Ta hilay tataon angkomonin ihtew, ket mangak-haw hila boy mangayadet ye lalaman la. No dawohongen tawo hila, ket mahambot kitawon homain hapo.”

Noba main lowa kanlan labinlowan intobol ha Canaan, a hiyay Caleb boy Josue, ket tampol lan hinabi, a wanla, “Peteg a hilay tatao ihtew, ket mangak-haw boy mangayadet hila. Noba adi kitawo angkalimon lomaban kanla! Hamboten tawo hila a homain hapo, ta lamo tawo yay Apo Dioh.”

Noba hilan kaganaan a Israelita, angkalimo hila. Kaya-bay nagdiklamo hila, a wanla, “Mamanged po dayin natey kitawoyna ihtew ha Egipto o ihti ha wangwang, dinan matey kitawon bengat ha labanan! Ket hilay aahawa tawo boy aanak tawo, ipohen la hilan kalaban tawo.” Noba hiyay Moises, Aaron, Josue boy Caleb, nakiiingalo hila kanlan Israelita, a wanla, “Adi yo ya angkontadaen ye Apo Dioh.” Noba hilay Israelita, hinabi la a, “Ahe mi labay a hikawo ye mangona kammi. Mamanged po a mag-odong kayiyna ingat ha Egipto!

Ket hilay Israelita, ondagan la yayna dayin dapah ye Moises. Ket hiyay Apo Dioh, napoot yan tobat. Kapipikhaan, hiyay kahnagan nan Apo Dioh a ampakapolag, nikakaanti yayna ha Toldan Panggalangan. Ha nakit lan Israelita ye kahnagan a ampakapolag, ket hinabi nan Apo Dioh kanan Moises, a wana, “Hilay Israelita a lowampo a taon ye edad patagay, ket ahe hilayna makahlep ha logal a impangako ko. Magbalang-balang hilayna ha wangwang angga ha matey hilayna. Noba hilay main edad a lowampo a taon a paaypa boy hiyay Josue boy Caleb bengat ye makahlep ha logal a impangako ko.”

Ha nange lan Israelita yatin hinabi nan Apo Dioh, nilomele hila. Ket nagkahalanan hilayna man, ta kingwa lay almah la boy dinawohong la hilay Cananeo, agya ahe na hilan linamoan Apo Dioh. Noba hiyay Moises, hinaad na hila, a wana, “Adi kawoyna ampakew.” Noba homain nanlenge kana.

Ket hiyay Apo Dioh, ahe na hila linamoan ye Israelitan makew makilaban kanlan Cananeo. Kaya-bay nahambot hila boy malabong ye natey kanla. Ket hilay Israelitan napatla a nakilaban, nagbalang-balang hilayna ha wangwang ha loob nin apatapo a taon.

Ha pagbalang-balang lan Israelitan napatla, ket kinalingay na hila met ateed nin Apo Dioh. Minamangaamot na hilan ambyan nin tinapay a ibat ha langit a anhabtan “manna”. Boy ambyan na hila met nin aabeng ta-omen hila makakna. Ket hiyay hapatoh la boy bado la, ahe bega nadonot ha loob nin apatapo a taon, oli ha pangalingay nan Apo Dioh kanla.

Hilay Israelita, agya anti hila ha wangwang, binyan na hilan Apo Dioh nin lanom. Noba hilay Israelita, ampaytatalabotoban la yay Moises boy Apo Dioh. Noba agya wanabay man, mikakaanti ya po ateed ye pangako nan Apo Dioh kanla a impangako na kanan Abraham, Isaac, boy Jacob ha hatew.

Maghay mangaamot, homain hilan mainom a lanom. Hinabi nan Apo Dioh kanan Moises, a wana, “Habiyen mo ha dapah a lomwah yay lanom. Pangayadi ket lomwah yan peteg ye lanom.” Noba ahe na hinombong ye bilin nan Apo Dioh kana, no aliwan binadog na yan nikalowan okdo. Kapipikhaan, linomwah yay lanom ha dapah. Kaya-bay nakainom hilaynan kaganaan ye tatao. Noba napoot yay Apo Dioh kanan Moises. Hinabi na, a wana, “Moises, ahe kayna makahlep ha logal a impangako ko kanyo, ta ahe mo hinombong ye hinabi ko kamo.”

Pangayadi nin pagbalang-balang la ha wangwang ha loob nin apatapo a taon, ket homain anan totoan angkabi-ay a nagtaon nin maigit anemapo', ta nangamatey hilaynan kaganaan ha wangwang. Haanin, in-ogot na hilayna man Apo Dioh ha anggaan nin logal a impangako na kanla. Ket pamiabot la ha anggaan nin logal a impangako nan Apo Dioh kanla, matoa yaynan tobat ye Moises.

Ha niabot hilayna ihtew, inlakew na yan Apo Dioh ye Moises ha pitondolan ta-omen na po matamolaw ye logal a impangako na kanlan Israelita. Pangayadi yatew, natey yaynay Moises. Ket hiyaynay Josue ye hinomagili a mangona. Hiyay Josue, manged yan mangona ta ampanombong ya kanan Apo Dioh.

//A Bible story from: Exodus 16-17; Numbers 10-14; 20; 27; Deuteronomy 34//