2. Nagkahalanan ye tao

Mahayaghag hilan mahayaghag ye miahawan Adan. Angkomonin hila ha matampa a pananamanan a dinyag nan Apo Dioh a impabaala na kanla. Loh-ok hila po hatew, noba ahe hila angkading-ey, ta homain po kahalanan ha babe-lota. Maheheg hilan angkomodang ha pananamanan boy ampakitongtong kanan Apo Dioh.

Noba hiyay Satanas a mapanalingo, nag-ilyadi yan bikat ha panamanan. Ha maghay mangaamot, nanepet ya kanan babayi, a wana, “Peteg laweh a hinabi nin Dioh kanyo a ‘Adi yo angkanen ye agya hinyaman a dawan kayo ihti’?”(Genesis 3:1).

Nakibat yay babayi, a wana, “Ahe! Malyadi min kanen ye hinyaman a dawan kayo, powedan bengat ha dawan kayon ampakaibyay nin tinanda tongkol ha manged boy maloke. Hinabi nan Apo Dioh kammi a, ‘Adi yo angkanen yatew o kimpaan man bengat, ta matey kawo.’” (Genesis 3:2-3)

Hinabi nan bikat, a wana, “Hi! Aliwan peteg yatew! Ahe kawo matey. Hinabi nan bengat yatew, ta no kanen yo, mag-ilyadi kawoynan omen kana a tanda nay manged boy maloke. (Genesis 3:4-5)

Haanin, ha binilew nan Eva yatew a dawan kayo, labay na yan tawayan ta angkainaman nan kanen. Boy labay nay mag-ilyadin madonong. Kaya-bay, namoti yan kinan na. Binyan na ya met ye ahawa na ket kinan na met.. (Genesis 3:6)

Ha nakan layna, natandaan la ye tongkol ha manged boy maloke boy naedepan la a loh-ok hila manayti. Ket hiyay dinapat la, nangwa hilan bobōng nin igoh a pinamahanip lan laman la. (Genesis 3:7)

Haanin, nange la a angkomodang yay Apo Dioh ha pananamanan. Kaya-bay nagtayo hila. Noba iningat na yan Apo Dioh ye lāki, a wana, “Adan, way-ihtew ka?” Nakibat yay Adan, a wana, “Apo, nange katan angkomodang ha pananamanan. Nalimo ko kamo ta loh-ok ako. Kaya-bay nagtayo ako.” (Genesis 3:8-10)

Tinepet nayan Apo Dioh, a wana, “Hinyay naghabi kamo a loh-ok ka? Nangan ka nayi nin dawan kayon imbawal kon kanen mo?” Nakibat yay Adan, a wana, “Awo, nangan ako a! Ta binyanan nakon in-ibyay mon babayin paglamo ko.” Tinepet naya met Apo Dioh ye babayi a, “Taket ta dinyag mon wanabay?” Nakibat yay Eva, a wana, “Hi! Hiyay bikat kayabay ay, tinalingo na ko.”

Hinabi nan Apo Dioh ha bikat, “Oli ha dinyag mo, padohaan kata. Ha kaganaan a aayop, hikan bengat ye magdiha nin yatin hompa. Legan angkabi-ay ka, domakap ka boy towapok yay kanen mo. Hika boy hiyay babayi, ket paykahologen ko. Wanabay met kanlan aanak mo boy aanak na. Magha kanlan lahi nan babayi ye mamitpit nin ō mo. Ket hika, tokaen moy tiked na.” (Genesis 3:14,15b)

Hinabi na met Apo Dioh kanan babayi, “Ha pagboktot mo, magdiha kan idap. Ha panganak mo, mananam kan tobat a ilab. Agya wanabay man, labay mo ya po ateed ye ahawa mo, ket hiyay ahawa mo ye manakop kamo.” (Genesis 3:15a, 16)

Hinabi na met Apo Dioh kanan lāki a, “Olita kinalalabay mon hombongen ye ahawa mo dinan ko, boy olita kinan yoy dawan imbawal ko, ket ihompa koy lota. Kaya-bay legan angkabi-ay ka, mag-idap kan maggabyon ha lota, a pangibatan nin pamopolan mo nin kanen yo. Ket olita ibat ka ha lota, no matey ka, mag-odong ka met ateed ha lota.” Ket hiyay Adan, pinangalanan na yay ahawa na nin “Eba”. Hiyay labay habiyen, “Mamyay nin bi-ay”, ta hiyay Eba ye indo nin kaganaan a tatao. Pangayadi, binyan na hilan Apo Dioh nin bado a niyadi ha katat ayop. (Genesis 3:17-21)

Hinabi nan Apo Dioh, “Hilay tao, ket omen hilayna met kantawo, ta tanda layna met ye manged boy maloke. Katapolan a ahe hila mapalobohan a mangan nin dawan kayon ampakaibyay nin bi-ay. Ta no makan la, ket ahe hilayna met matey.” Kaya-bay pinaalih na hilaynan Apo Dioh ha manged a pananamanan. Pangayadi, hiyay Apo Dioh, nangikonin yan pānobolen a magbantay ha dān paogot ha manged a pananamanan, ta-omen homain makahaley ha kayon ampakaibyay nin bi-ay.. (Genesis 3:22-24)

//A Bible story from: Genesis 3//