10. Hiyay Ikamapo a Pamaidap

Ket hiyay Moises boy Aaron, nakew hilan makitongtong kanan Poon Paraon. Hinabi la kana, a wanla, “Anggalangen a Poon Paraon, katapolan a palobohan mo hilaynay Israelita a omalih, ta yati ye kalabayan nan Apo Dioh.” Noba kinomaili yan bengat ye Poon Paraon, a wana, “Ahe ko malabay, ta ahe ko ya katatanda ye Dioh yo!” Ket agna hila pinalobohan, no aliwan lalo na hilayna ingat pinaidapan ye Israelita.

Hiyay Poon Paraon, tepe makew yay Moises boy Aaron kana, anhabiyen na a, “Ahe ko hila palobohan a omalih!” Ket hiyay Apo Dioh, nangipalwah yan 10 a kalahin pamaidap kanlan Egipsio. Boy hinabi na po a, “Labay kon ipakit a omiigit ye kapalyadian ko dinan ha kapalyadian nan Poon Paraon boy diohdiohan na.”

Hiyay onan pamaidap nan Apo Dioh kanlan Egipsio, pinag-ilyadi nan daya ye lanom ha kabatowan a anhabtan Nilo. Agya wanabay man ye nalyadi, ha nakew yay Moises kanan Poon Paraon boy inawok na kana a palobohan na hilaynan Israelitan omalih, hinabi nay naman a, “Ahe ko hila palobohan a omalih!”

Hiyay kakalwan pamaidap nan Apo Dioh kanlan Egipsio ket nangitobol yan malabong a tobat a pahinga kanla. Kaya-bay hiyay Poon Paraon, hinabi na kanan Moises a, “No paalihen nin Dioh yo hilay papahinga, palobohan ko hilaynay Israelitan omalih.” Noba ha ahe hilaynay papahinga, hinabi nay naman a, “Ahe ko hila palobohan a omalih!”

Hiyay kakatlon pamaidap, nangitobol yay Apo Dioh nin titime. Ket hiyay ikaapat, nangitobol ya nin lalangew. Ket balang magha kanlan hilatin pamaidap, an-ipangako nan Poon Paraon, a wana, “No alihen nin Dioh yo hilatin pamaidap, palobohan ko hilaynay Israelitan omalih.” Nikaapat po anan okdo ye pangialih nan Apo Dioh nin pamaidap. Ket tepe an-alihen nan Apo Dioh ye pamaidap, anhabiyen nan Poon Paraon, a wana, “Ahe ko hila palobohan a omalih!” Kaya-bay, hiyay Apo Dioh, nangitobol yayna man nin pamaidap. Ket haanin, hilaynay Egipsio bengat ye nakadiha nin pamaidap. Noba hilay Israelita, homain hilan nadihaan.

Hiyay ikaliman pamaidap, namalwah yay Apo Dioh nin hakit a mamatey nin kaganaan a aayop lan Egipsio. Noba hiyay Poon Paraon, ahe na hilan teed pinalobohan ye Israelita, a wana, “Ahe ko hila palobohan a omalih!”

Hiyay ikaanem a pamaidap, hinabi nan Apo Dioh kanan Moses a, “Mangemgem kan towapok boy kadten mo kanan Poon Paraon, pangayadi ihabol mon patagay ha adapan na.” Pangayadi yatew, kinoyapeh hilaynay Egipsio. Noba hilay Israelita, ahe hila kinoyapeh. Agya wanabay ye nalyadi, ahe nan teed pinalobohan Poon Paraon ye Israelita, “Ahe ko hila palobohan a omalih!”

Hiyay ikapiton pamaidap, namaodan yay Apo Dioh nin tabolinaw a ingkamatey nin kaganaan a Egipsio a anti ha ilwah nin baey la boy nakadama nin tatanaman la. Noba ahe nangodan nin tabolinaw ha logal lan Israelita. Kaya-bay hiyay Poon Paraon, impahagyat na hilan Moses boy Aaron. Hinabi na kanla a, “Nagkahalanan ako, ipakigwang yo a patgenen naynan Apo Dioh yati. Ta palobohan ko hilaynan omalih ye Israelita.”

Noba ha tinomgen anay pangodan nin tabolinaw, nagkahalanan yayna man ye Poon Paraon ta ahe na hilay naman pinalobohan a omalih ye Israelita.

Hiyay ikawalon pamaidap, nangitobol yay Apo Dioh nin malabong a kokowangey. Ket hiyay napatla a tatanaman a ahe nadama nin tabolinaw, kinan la met nin kokowangey.

Hiyay ikahiyam a pamaidap, pinaliteh nan Apo Dioh ye logal a angkonaan lan Egipsio ha loob nin tatlon mangaamot. Kaya-bay ahe hilayna linomwah ha babaey la. Noba, ha angkonaan lan Israelita, mahnag ya.

Agya wanabay man ye nalyadi, hiyay Poon Paraon, hinabi na kanan Moises, a wana, “Ahe ko hilan teed palobohan a omalih.” Ahe na bega imbabanon Poon Paraon ye hiyam a pamaidap. Noba haanin, hiyay kalinghoyotan a pamaidap ye mamabayo nin ihip nan Poon Paraon.

//A Bible story from: Exodus 5-10//