15. Logal a Impangako nan Apo Dioh

Haanin, panaon ana a hakopen lan Israelita ye logal a impangako nan Apo Dioh kanla. Kaya-bay hiyay Josue, namili yan loway lalaki boy hinabi na kanla, a wana, “Lipayen yoy kabatowan nin Jordan boy makew kawo ha banwan Jerico. Homlep kawo ha banwa a homain ampakakit kanyo, ta maniem kawo no makhaw hila o ahe. Ha anti hilayna ihtew, nakit la a mapah-ey ye alad nin banwa. Haanin nahagana la yay babayin babayadan a nagngalan Rahab. Noba agya wanabay man ye kahahaad na, ket haanin, namteg yayna kanan Apo Dioh. Kaya-bay, hinaglapan na hilay loway maniem omen la hila ahe makit nin hohondaloh ihtew. Ket nagpangako hila met kana, a wanla, “No lomoob kayiyna, adi ka angkalimo, ta homain mapano kanyon mipapamilya.”

Hiyay panakop lan Israelita ha logal a impangako nan Apo Dioh, homain hilan liklikan no aliwan lipayen lay kabatowan nin Jordan. Hinabi nan Apo Dioh kanan Josue, a wana, “Paonaen mo hilay papadi.” Ket ha intodak layna ye bibitih lan papadi ha lanom, ket tampol yan tinomgen ye lanom ket namal-an ye danan la. Kaya-bay, nakalipay hila ha kabatowan, ta namal-an ye dinanan la.

Ha nakalipay hilaynay Israelita ha kabatowan nin Jordan, hinabi nan Apo Dioh kanan Josue, a wana, “Kobkoben yoynay banwan Jerico. Hiyay ona mon dyagen, itobol mo hilay hohondaloh boy papadi yo ta liwoden lay banwa minghan ha maghay mangaamot ha loob nin anem a mangaamot.” Ket hinombong la met ye bilin nan Apo Dioh.

Ha ikapiton mangaamot, ket nikapito la met a liniwod ye banwa. Ket ha ikapitoy nan panliwod la, hilay hohondaloh, nangha hilan makhaw ket hilay papadi met, pinatnoy lay tatamboyok la.

Ha nangha boy pinatnoy lan makhaw ye tamboyok la, nayegma ye alad nin banwa. Ket hilay Israelita, dinama lay kaganaan a makit la ha loob nin banwan Jerico, ta wanabay ye imbilin nan Apo Dioh kanla. Hiyay Rahab bengat boy papamilya na, ye ahe napano. Kaya-bay paibat kananyatew, nakitipon hilayna kanlan Israelita. Ha nabalitaan lan kanayon a tatao ha Canaan ye dinyag lan Israelita ha banwan Jerico, nalimowan hilan tobat.

Haanin main tataon Gibeonito a angkomonin ha haley lan Israelita. Nakew hilan naghabin katagowan kanlan Israelita, a wanla, “Agya po man ibat kayi ha mataang a logal, kete labay mi po ateed ye makimamagha kanyo.” Nabay ya met ye Josue agya imbilin nan Apo Dioh ha hatew a ahe hila makikamamagha kanlan tatao ihtew ha Canaan.

Ha nabalitaan lan kanayon a tatao ha Canaan ye dinyag lan Gibeonito, naymamagha hilan linomoob kanlan Gibeonito. Ket hilay Gibeonito, nangitobol hilan nangaano kanla a makew makikwan haglap kanan Josue. Hinabi la kana a, “Josue, lamoan yo kayin lomaban.”

Haanin, natandaan nan Josue a hilay Gibeonito, ket mahaley hila manayti ha angkonaan lan Israelita. Kaya-bay napoot yay Josue, ta aliwan peteg ye hinabi la kana ha hatew. Noba inihip na a, “Agya po man tinago la kayi, ket haglapan mi hilan teed, ta nakimamagha hila kammi” Kaya-bay tinipon nay hohondaloh na. Ket ha padeglem ana, kinomodang hilan palakew ha logal lan Gibeonito. Ket ha pahanib ana, ingkana laynay pamakilaban la kanlan Cananeo a kakalaban la met nin Gibeonito.

Ha pandawohong lan Israelita, hinaglapan na hilan Apo Dioh. Ket ha antomakah hilaynay kakaaway la, hiyay dinyag nan Apo Dioh, namaodan yan mangayadet a tabolinaw a mamatey kanlan kalaban lan Israelita.

Hiyay Apo Dioh, pinatgen nay tige nin mangaamot ta-omen ya magboyot ye henag na omen la mahipet nin Israelita ye kakaaway la. Ket oli kananyatin panaglap nan Apo Dioh, nanambot hilay Israelita.

Pangayadi nin panambot lan Israelita, hilay napatla a Cananeo, naymamagha hilan linomaban kanlan Israelita. Noba hiyay Josue boy hohondaloh na, hinambot la hilay Cananeo.

Pangayadi nin labanan, dinakay- dakay nan Apo Dioh kanlan labinlowan lalahi lan Israelita ye logal a impangako na. Ket balang lahi lan Israelita, nakatanggap hila nin hadili lan logal. Ket hiyay Apo Dioh, binyan na hilan katanaan ye Israelita kanlan nakapalibot kanla a tidibo ha ilwah nin Canaan.

Ha matoa yaynay Josue, tinipon na hilay kaganaan a Israelita. Ket impaihip na kanla ye bibilin boy papangako nan Apo Dioh kanla ha anti hila po ha Mapantay Sinai. Ket hiyay balang magha met, nagpangako hila, a wanla, “Magpaholong kayin mapatayaan kanan Apo Dioh boy hombongen mi ye bibilin na.”

//A Bible story from: Joshua 1-24//