24.

Ha linomake yaynay Juan a anak nan Zacharias boy Elizabeth, nandogi yaynan maghilbi kanlan tatao bilang podopita nan Apo Dioh. Kinimonin ya ha wangwang, ket hiyay pamangan na polot-panilan boy kowangey. Hiyay hoot na, yadi ha labok nin kamilyo.

Malabong a tatao ye nakew kanan Juan ha wangwang, ta-omen manlenge kana. Imbabala nan Juan kanla a wana, “Paghehean yoy kakahalanan yo boy pabawtihmo kawo ta-omen na kawon patawaden nin Apo Dioh.”

Ha nange lan tatao ye babala nan Juan, malabong kanla ye naghehe nin kakahalanan la boy napabawtihmo. Malabong met a papadi lan Jujudio ye napabawtihmo kana, noba ahe la binalay o pinaghehean ye kakahalanan la.

Kayabay hinabi nan Juan kanla a, "Hikawon lalahi nin makapi! Paghehean yoy kakahalanan yo boy bayowen yoynay ogali yo, ta palagen nan Apo Dioh ye kaganaaan a poonkayon ahe ampanawa haka nayan olamen". Olin yati, makaoli kanan Juan natopad ye hinabi nan popodopita a Isaias a tongkol ha hinabi nan Apo Dioh kanan Apo Jesus a wanae, “Itobol ko yan maona kammo ye mangihabi ko a mangitaladan nin dānan mo."

Tinepet layan nangaanon Jujudio ye Juan a wanla, " Hika laweh ye Mesias"? Nakibat ya Juan, "Aliwan hiko ye Mesias, noba main domondon kangko. Madangal yan tobat ket agya manloat man bengat nin gawot hapatoh na, ahe ako malyadi."

Kabekahan, nakew ya met napabawtihmo ye Apo Jesus kanan Juan. Ket pamakakit nan Juan kanan Jesus, hinabi na a, “Bilewen yo! Anti yaynay Topa nin Dioh a mangalih nin kakahalanan nin tao ihti ha babe lota!

Hinabi nan Juan kanan Apo Jesus, “Hiko dayi ye katapolan a bawtihmowan mo. Taket ta hika ye magpabawtihmo kangko?” Noba nakibat yay Apo Jesus kana, “Higiyna, ta yabayti ye katapolan tawon diyagen ta-omen matopad ye kalabayan nan Apo Dioh.” Kayabay hiyay Juan, binawtihmowan nayay Apo Jesus, agya homain yan kahalanan.

Ha an-omawah yaynay Apo Jesus ha lanom pangayadi yan mabawtimowan, napakit ye Ihpiditon Dioh a kadih kalapati ket dinompa Kana. Haanin, paibat ha langit nange a hinabi nan Apo Dioh Kana ye wanae, "Hika ye Anak kon ampakaadoen ko a angkaaliketan kon tobat".

Bayo ya po napabawtihmo ye Apo Jesus, hinabi naynan Apo Dioh kanan Juan a, "Makit mo yan omaypa ye Ihpiditon Dioh ket dompa yan mikakaanti ha maghay tao. Hiyabay ye mamawtihmo kanyo nin Ihpiditon Dioh".

//A Bible story from: Matthew 3; Mark 1:9-11; Luke 3:1-23//