21. Impangako na yan Apo Dioh ye Māngiligtah

Ha hatew po, hiyay Apo Dioh, inihip nayna a mangitobol yan Māngiligtah nin tatao. Ha nagkahalanan yay Adan boy Eba, yati ye impangako nan Apo Dioh kanla. Hinabi na kanan Eba, a wana, “Maabot lanoy panaon, ket magha kanlan lahi mo ye mamitpit nin ō na nin bikat.” Hiyay bikat a nanalingo kanan Eva ha hatew, ket hiyabay ye Satanas. Hiyay andektan nin pangako nan Apo Dioh, ket hiyay lomateng a Māngiligtah a manambot kanan Satanas.

Hiyay Apo Dioh, impangako na met kanan Abraham, a wana, “Makaoli kamo, inged ko hilay kaganaan a lalahi di ha babe-lota. Yatin kangedan ket hiyay lomateng a Māngiligtah.

Hiyay Apo Dioh, impangako na met kanan Moises a mangitobol ya nin omen kana a podopita. Magha po yati kanlan pangako nan Apo Dioh a tongkol kanan Māngiligtah a lomateng.

Ha hatew, impangako na met Apo Dioh kanan Poon David, a magha kanlan aapo na ye Māngiligtah, a wana, “Hiyay impangako ko kanan Adan boy Eba, Abraham boy Moises, hiya met ateed kammo, ta mangibat ya lano kanlan aapo mo ye Māngiligtah.”

Ha hatew, hinabi nan Apo Dioh kanan Jeremias, a wana, “Manyag akon bayon kahondoan kanlan tatao. Hiyay bibilin ko, ket inholat ko ya hatew ha dadapah. Noba haanin, iholat ko yayna ha poho la. Ket hilay mamigbig kangko ye diyagen kon pagtao ko boy patawaden ko hilayna ha kakahalanan la.” Mandogi yati ha lomateng yay Māngiligtah.

Hinabi la po nin popodopita hatew a hiyay Māngiligtah, ket magha yan podopita, padi, boy poon. Hiyay podopita, magha yan taon mangiabot kanlan tatao nin nange na kanan Apo Dioh. Wanabay met lano ye diyagen nan lomateng a Māngiligtah. Ta hiyay Māngiligtah ye genap a podopita.

Hiyay Māngiligtah ket padi ya met. Hiyay padi lan Jujudio ye ampangihagpa kanan Apo Dioh ta-omen mapatawad ye kakahalanan lan tatao boy hiya met ateed ye ampangipakigwang kanla. Hiyay Māngiligtah, hadili nan laman ye ihagpa na ta-omen mapatawad ye kakahalanan lan tatao. Ta hiyay Māngiligtah ye genap a padi.

Hiyay Māngiligtah, ket poon ya met. Hiyay poon, hiya met ye ampanohga boy ampanakop kanlan tatao ha panakopan na. Hiyay Māngiligtah ye manohga kanlan tatao ihti ha babe-lota, ket matoynong ye panohga na. Boy mikno ya lano ha pamiknoan nan Poon David a kaapoapowan na boy manakop yan homain anggaan ha babe-lota. Ta hiyay Māngiligtah ye genap a poon.

Hilay popodopita, malabong a babagay ye impaltep la a mangalyadi ha bi-ay nan Māngiligtah. Impaltep nan Malakias, a wana, “Bayo lomateng ye Māngiligtah, mona ya po a lomateng ye makapalyadiyan a podopita.” Hiyay Isaias, impaltep na met, a wana, “Ianak ya lanon maghan balatang ye Māngiligtah.” Hiyay Mikas, impaltep na met, a wana, “Maianak ya lanoy Māngiligtah ha banwan Betlehem.”

Impaltep la po nin popodopita no way-omen lano ye pagbi-ay nan Māngiligtah. Hiyay Isaias, impaltep na a, “Komonin ya lanoy Māngiligtah ha plobinhyan Galilea. Ket liwaliwaen na hilay ampaglele. Boy ipatanda na a malihway hilaynay naipoh boy hilay nakapidiho.” Impaltep na po nin podopita Isaias, a wana, “Paitaahen na hila lanoy ampaghakit, omel, teek, kapkap boy lompo.”

Noba impaltep na met podopita Isaias a kapootan la ya lano boy ahe la ya balayen a hiyabay ye Māngiligtah. Impaltep na po a, “Lipotan yan maghay gayyem na.” Hiyay Zakarias, impaltep na met, a wana, “Main lanon mangipaloke kana ha alaga nin tatlompo a mital.” Hilay kanayon a popodopita, impaltep la met a, “Pateyen la yan tatao boy payhogalan lay babado na.”

Impaltep la po nin popodopita no way-omen yan matey ye Māngiligtah. Impaltep nan Isaias a, “Lod-an la yay Māngiligtah, omihen boy bogbogen laya. Pangayadi, binghoen la ya legan nakapako ya ha kodoh anggan ha matey ya. Ket matey ya ha pietan lan lowan māgkahalanan.”

Hiyay Māngiligtah, homain yan kahalanan. Noba magdiha yan teed nin pamaidap oli ta hiyabay ye mananggap nin padoha ha kakahalanan lan tatao. Olin yati, hilay tatao ket main hilaynan katanaan kanan Apo Dioh.

Hiyay kakahalanan lan tatao ye hangkan nin pagkamatey nan Māngiligtah. Noba aliwan bengat angga ihtew, ta impaltep la met nin popodopita a bi-ayen na yan oman Apo Dioh. Ket oli ha pagkamatey boy pagkabi-ay nan oman nin Māngiligtah, nignap anay tikih nan Apo Dioh a kaligtahan nin tao. Ket nandogi yaynay bayon kahondoan nan Apo Dioh kanlan tatao.

Malabong ye impakit nan Apo Dioh kanlan popodopita na tongkol kanan lomateng a Māngiligtah. Noba maigit 400 a taon po ye palabahen bayo ya lomateng ye Māngiligtah kanlan tatao ihti ha babe-lota. Ta ha panaon a intipan nan Apo Dioh, itobol na yay Apo Jesus a Māngiligtah.

//A Bible story from: Genesis 3:15; 12:1-3; Deuteronomy 18:15; 2 Samuel 7; Jeremiah 31; Isaiah 59:16; Daniel 7; Malachi 4:5; Isaiah 7:14; Micah 5:2; Isaiah 9:1-7; 35:3-5; 61; 53; Psalm 22:18; 35:19; 69:4; 41:9; Zechariah 11:12-13; Isaiah 50:6; Psalm 16:10-11//