9.Hinagyat na yan Apo Dioh ye Moises

Ha natey yaynay Jose, hilay papaltido na, kinomonin hila po ha Ehipto. Ha kaboyotan nin panaon, ket linomabong hilaynay lālahi la a anhabtan Israelita.

Pangalabah nin malabong a taon, hilay Egipsio, naliwaan laynay panaglap nan Jose kanla. Boy hiyay bayon poon ha Egipto, ahe na tanda ye tongkol kanan Jose. Ket angkahindakan ya, ta malabong hilaynay Israelita.

Hilay Egipsio, pinilit la hilay Israelita a manyag nin mangatagay a baey boy maway a babanwa.

Noba ha nakit nan Poon Paraon a lalalo hilaynan anlomabong ye Israelita, ket nanyag yan bilin, a wanae, “No lāki ye maianak nin Israelita, itapon ya ha kabatwan ta-omen ya matey.”

Haanin, main maghay babayi a Israelita a nanganak nin lāki. Tanda nan babayi ye bilin nan Poon Paraon a pateyen ye balang maianak a lāki. Noba hinabi na ha hadili na a, “Itayo ko yay ongi ko legan ahe na po tanda nin Poon Paraon.”

Kaya-bay nanyag yan belyag haka na pinonahan nin lilin, ta-omon ya ahe mahlepan nin lanom. Pangayadi, ingkonin na yay ongi ha belyag ket inlakew na yayna ha gilid nin kabatowan a kataiban. Hiyay katongno nan ongi a nagngalan Miriam, anti ya met ha kabatwan, ta ambabantayan na ya, no hinyay malyadi kana.

Haanin, hiyay balatang nan Poon Paraon, nakit na yay belyag a anlompaw ha lanom. Ket impakwa na ya kanan ipoh na. Ha inlateng na ya, linokatan nan balatang nan Poon ye belyag. Ket nakit nayay ongi. Hiyay dinyag na, kingwa na yay ongi, ket pinag-anak na ya. Moises ye impangalan na kana.

Hiyay Moises, nilomake ya ha baey nan Poon lan Egipsio. Haanin, ha bayontao yayna, nagpahyal ya ha logal lan Israelita. Ket nakit na yay maghan Israelita a ampahakitan nin maghan Egipsio. Haanin, ta tanda nan Moises a kapadiho na ya a Israelita, ket hinaglapan na ya.

Ket ha nabaan nan Moises a homain ampakakit, pinatey na yay Egipsio boy in-ilbeng na ya. Noba main met manaytin nakakit nin dinyag na. Ket yatin dinyag nan Moises, nabalitaan nan Poon Paraon.

Ha natandaan nan Poon Paraon ye nalyadi, labay na yaynan pateyen ye Moises. Noba ha natandaan nan Moises a labay na yan pateyen Poon Paraon, tinomakah ya. Ket nakew ya ha mataang a logal, ket ihtewbay yayna kinomonin.

Hiyay Moises, ampagpahtol yan aayop ha wangwang a mataang ha Ehipto. Ket ihtew yayna met nakaahawa. Ket nagkaanak hilan loway laki.

Pangalabah nin apatapo a taon, legan ampagpahtol yay Moises nin topa, nakakit yan maghay makandin kayo a andomlag. Noba ahe ya met angkaolam. Kaya-bay hinaleyan na ya. Ket ha mahaley yayna, nange na yan naghabi ye Apo Dioh a anti ha makandin kayon andomlag. Hinabi na kana a, “Alihen moy ihtiping mo ta nahantowan yain a logal.”

Hinabi nan Apo Dioh a, “Moises, mag-odong ka ha Egipto, ta an-itobol kata kanlan Israelita ta omen mo hila iligtah kanlan Egipsio a nangipoh kanla. gawien katan mangiligtah kanlan Israelita a inipoh lan Egipsio.” Hinabi nan Apo Dioh yati, ta labay na a mailakew hilay Israelita ihtew ha Canaan a logal a impangako nan Apo Dioh kanla. Ta yabaytew a logal ye impangako na kanlan Abraham, Isaac boy Jacob.

Noba hiyay Moises, ahe na labay ye makew ha Egipto, ta angkalimo ya.

Ket hiyay Apo Dioh, intobol na yay Aaron a katongno nan Moises, ta-omen na ya haglapan. Hinabi nan Apo Dioh kanan Moises boy Aaron, a wana, “Adi kawo manhomoko. Magteeh kawo, ta mabyang ye tonga nan Poon Paraon.”

//A Bible story from: Exodus 1-4//