17. Hiyay Kahondoan nan Apo Dioh kanan David

Main lāki ha Israel a nagngalan Saulo. Matagay ya boy manged yan laki. Hiyabay ye onan pagpoon ha Israel. Hiyay Saulo, ha babayo yan nikno a manakop, manged ye andiyagen na, noba ha kaboyotan nin panakop na, nag-ilyadi yan malambong boy ahe yayna ampanombong ha kalabayan nan Apo Dioh. Ket oli ha kalok-an nan Saulo, namili yayna man ye Apo Dioh nin ihagili nan mamoon kanlan Israelita.

Ket hiyay David ye pinili nan Apo Dioh a kahagiliyan nan Saulo. Hiyay David, magha yan pahtol nin aayop. Noba bayo ya namoon kanlan Israelita, wanae ye nalyadi. Legan ampagpahtol yan topa, nakit na hilay mangatobag a aayop a mandoyong kanlan totopa na. Ket hiyay dinyag nan David, pinatey na hilay mangatobag a aayop, ta makpeh ya. Hiyay David, mapagmakaaypa ya, matoynong, boy ampamteg ya kanan Apo Dioh.

Ha bayontawo yaynay David, main hilan kalaban ye Israelita a nagngalan Goliat. Hiyay Goliat, kaginta a lāki boy magha yan magaling a hondaloh, makpeh boy mak-haw ya. Hiyay katagay na, maigit 3 mitodo! Ket agya makandi yay David, linabanan na yay Goliat. Noba hinaglapan na yan Apo Dioh ye David a namatey kanan Goliat. Agya palhiit bengat ye ginawi na, ket ingkamatey nan Goliat. Kaya-bay hilay Israelita, nakaligtah hila kanlan kalaban la.

Hiyay Poon Saulo, tobat ye imon na kanan David boy nikaano na yaynan okdon pateyen. Ha maghay mangaamot, legan antapolen nayan Saulo ye David, nakew yan nanoday ha ampagtayoan nan David. Noba hiyay Saulo, ahe na ya angkakit ye David. Noba hiyay David, angkakit na yay Saulo. Ket malyadi na yayna dayin pateyen David ye Saulo, noba ahe na dinyag, no aliwan pinapakana nay namlah nin makandi ha hoot nan badon Saulo. Ta ahe na labay ye mag-ilyadin poon makaoli ha pamatey na kana.

Ha ahe naboyot, natey yay Saulo ha maghay labanan. Ket hiyay David, nikno yaynan poon ha Israel. Manged ye pamoon na boy kalalabay la yan tatao. Hiyay David, in-inged na yan Apo Dioh. Kaya-bay nikalabong yan nanambot ha labanan. Ha hinakop nayay banwan Jerusalem, linamoan na yan Apo Dioh. Kaya-bay hiyay banwan Jerusalem ye nag-ilyadin capitolyo nin Israel. Ha panaon nin pamoon nan David, ket nag-ilyadi yan makapalyadiyan boy mabandi ye nahyon a Israel.

Hatew, ha loob nin apat gatoh a taon, hiyay Toldan Panggalangan a pikakaget lan Israelita ye anggawien lan panggalangan boy pangihagpaan nin idigalo la kanan Apo Dioh. Noba haanin, hiyay Poon David, labay nay mangipaideng nin maghen boy mayadet a panggalangan kanan Apo Dioh a anhabtan Templo.

Noba intobol na yan Apo Dioh ye propetan Natan a makew kanan Poon David. Hinabi nan Natan, “Wanae ye hinabi nan Apo Dioh kangko a habiyen ko kammo. Oli ta hondaloh ka boy nakapatey ka, aliwan hikay mamaideng nin baey nan Apo Dioh, no aliwan hiyay anak mo. Noba agya wanabay man, inged na kan teed Apo Dioh. Aliwan bengat yain, ta hilay lalahi mo, hilabay bengat ye mikno ha pamiknoan nin poon lan Israelita. Boy mangibat ya ha lahi mo ye lomateng a Māngiligtah!”

Ha nange nan David ye hinabi nan Natan, tampol yan nagpahalamat boy nanggalang kanan Apo Dioh oli ta impangako nan Apo Dioh kana a biyan na yan kangedan. Noba hilay Israelita, mangagad hila po nin malibon taon bayo ya lomateng kanla ye Māngiligtah la.

Manged ye pamoon nan David ha Israel. Matoynong ya boy in-inged na yan Apo Dioh. Agya ha wanabay man, ha kahoyotan nin pagbi-ay na, nakadiyag yan mabyat a kahalanan ha adapan nan Apo Dioh.

Ha maghay mahilem, legan anti hilay hohondaloh ha labanan, angkatoloy yay David ha baey na. Ha nimata ya, nadongawan na yay Batseba a matampa a babayi a ampalyo.

Kainghon talikokolan naya, impakwa nayay babayi. Ket ha inlateng la yay babayi, tinakeh na ya. Ha pamigantah na yan tinakeh, pinaoli na yayna. Ha ahe maboyot, impabalita nan Batseba kanan David, a wana, Yo! Maboktot akobay ket hikay bapa na.

Hiyay Batseba, main yan ahawa a magha kanlan mangagaling a hondaloh nan Poon David. Hiyay ngalan na ket Urias. Impahagyat na yan David ye Urias ha labanan ta mag-odong ya ha Israel. Ha linomateng yayna kanan Poon David, hinabi nan David kana a, “Moli ka po ha baey mo, ta id-an mo ya po ye ahawa mo.”
Hinabi nan David yati ta-omen mahabtan a hiyay Urias ye nakapaboktot kanan ahawa na. Noba hiyay Urias, ahe na labay a id-an ye ahawa na, ta an-ihipen nay kaidapan nin kalalamoan na a anti ha labanan. Kaya-bay hiyay David, hinolatan na yay opihyal nan Urias. Ket wanae ye inholat na, “Ipadongla mo yay Urias ha labanan ta-omen yan matey.” Ket hiyay opihyal, tinopad nay inholat nan David. Kaya-bay natey yay Urias ha labanan, agya po magaling ya.

Ha natey yay Urias, hiyay Poon David, pinag-ahawa na yay Batseba. Ha ahe naboyot, nanganak ya nin maghay laki. Yatin panamham nan David kanan Batseba boy pangipapatey na kanan Urias ye ingkapoot nan Apo Dioh kana. Kaya-bay intobol na yayna man ye propetan Natan kanan David, a wana, “David, nagkahalanan ka kanan Apo Dioh.” Ha nange nan David ye hinabi nan Nathan, naghehe ya, ket pinatawad na ya met nin Apo Dioh. Paibat kananyatew, agya malabong ye kaidapan a nangadihaan na, namteg ya met ateed kanan Apo Dioh.

Hiyay padoha na, natey yay anak na kanan Batseba boy nadama ya met ye pamoon na. Agya po man nakadyag yan kahalanan ha pamilew nan Apo Dioh, ket mapatayaan ya po ateed ye Apo Dioh ha pangako na kana. Haanin, nagkaanak yan oman ye David kanan Batseba nin maghay lāki, ket pinangalanan layan Solomon.

//A Bible story from: 1 Samuel 10; 15-19; 24; 31; 2 Samuel 5; 7; 11-12//====== 18. Hiyay Napikalwan Pānakopan ======