11. Panlomabah nin Pānobolen

Hiyay Moises boy Aaron, binabalaan la yay Poon Paraon, a wanla, “Hinabi nan Apo Dioh a no adi mo hila po ateed palobohan a omalih ye Israelita, hilay poponganay a lālakin aanak yon Egipsio boy hilay poponganay nin aayop yo, ket matey hilan kaganaan.” Agya ha wanabay man, ahe naya po ateed tinopad Poon Paraon ye bilin nan Apo Dioh. Kaya-bay, intobol nan Apo Dioh ye pānobolen na a mamatey nin kaganaan a ponganay a lālakin aanak lan Egipsio boy kaganaan a ponganay nin aayop la.

Imbilin nan Apo Dioh kanlan Israelita, a wana, “Mamatey kawon topa o kambing a maligha boy nagtaon nin magha.

Hiyay daya na, iponah yo ha gilid ilwangan nin babaey yo omen ahe matey ye ponganay a laki ha pamilya yo. Pangayadi, iyawen yo yay laman nin topa. Ket no nawoto ana, kena yoyna. Boy mangan kawo met tinapay a homain pampalbag. Pangayadi, mag-aligwat kawoyna ta omalih kawoyna ha Egipto.”

Hilay Israelita, tinopad lay bilin nan Apo Dioh. Kananyatew a madeglem, hiyay pānobolen nan Apo Dioh, nakew ya ha kaganaan a logal a hakop nin Egipto ket pinatey na hilay kaganaan a ponganay a lakin Egipsio.

No malatngan nin pānobolen nan Apo Dioh ye baey a naponahan nin daya ye gilid ilwangan na, anlabhan naya. Kaya-bay, nakaligtah ye kaganaan a ponganay lan Israelita a laki makaoli ha daya nin topa a imponah la.

Noba hilay Egipsio, ahe hila namteg kanan Apo Dioh boy ahe la pinamtegan ye bilin na. Kaya-bay hiyay panobolen nan Apo Dioh, pinatey na hilay kaganaan a ponganay a laki, kadlan ye ponganay nin aayop la, ta ahe naponahan nin daya ye gilid ilwangan nin babaey la.

Ket hilay Egipsio, kananyatew a madeglem, tinomangih hilan tobat oli ha nalyadi ha poponganay la.

Ha natandaan nan Poon Paraon a natey hilaynay kaganaan a poponganay a lakin aanak lan Ehipsio boy aayop la, impahagyat na yay Moises boy Aaron. Hinabi na kanla, a wana, “Hikawon Israelita, omalih kawoyna ihti! Kagten yoy kaganaan a aayop yo.”

//A Bible story from: Exodus 11:1-12:32//====== 12. Panlomipay Ha Matibya a Dagat======