8. Inligtah na yan Apo Dioh ye Jose boy Pamilya na

Ha matoa yaynay Jacob, intobol na yay Jose a pinakaado-ado na a anak na. Hinabi na kana, a wana, “Anak ko, lakwen mo hilan bilewen ye kakatongno mon ampagpahtol.”

Hilay kakatongno na, tanda la a hiyay Jose ye ampakaadoen nan bapa la boy tanda layna met makaoli ha taynep nan Jose a hiyabay ye mamoon lano kanla. Kaya-bay ampangimon hila kana. Ket haanin, ha linomateng yay Jose kanlan kakatongno na, dinakep la ya haka la inkolbot. Noba ha main anhomapid a ampagpanapolan, in-awah la ya ha lobot, ket inlako la ya kanlan māgpanapolan. Kinaget la ya met palakew ha Egipto.

Haanin, hilay kakatongno na, ha noli hilayna ha baey la, impakit la ye bado nan Jose kanan bapa la, a wanla, “Tatang, nakit mi yay bado nan Jose ha dān.” Ket hiyay Jacob, hinabi na a, “Adoy! Pinatey yan matobag a ayop ye anak ko!”
Olin yati, nilomele yan tobat ye bapa la.

Haanin, hilay māgpanapolan, ha niabot hilayna ha Egipto, inlako la yay Jose ha maghay mabatnang, a nagngalan Potiphar. Legan anti yay Jose ha Egipto, pinatayaan na yan amo na.

Noba hiyay ahawa nan amo na, ket hinaleyan na yay Jose ta nalabayan na ya. Noba hiyay Jose, ahe na labay ye magkahalanan kanan Apo Dioh. Kaya-bay hiyay ahawa nan Potiphar, binadaan na yay Jose. Olin yati, naipidiho ya. Noba agya anti ya ha pidihowan, ket mapatayaan yan teed. Kaya-bay in-inged na yan Apo Dioh.

Kananyatew a panaon, hiyay Paraon a Poon ha Egipto, nanaynep ya. Ket angkagolowan ya ta homain makaipalinaw kana no hinyay labay habiyen nin taynep na.

Noba hiyay Jose, tanda nay labay habiyen nin tataynep, ta an-ipatanda nan Apo Dioh kana. Ket hiyay Poon Paraon, nabalitaan na a hiyay Jose, tanda nay labay habiyen nin tataynep. Kaya-bay impakwa na yay Jose ha pidihowan, ta labay nan Poon Paraon a ipalinaw nan Jose kana ye labay habiyen nin taynep na. Ket ha anti yaynay Jose ha adapan na, hinabi nan Poon Paraon kana, a wana, “Jose, ipalinaw mo man kangko ye labay habiyen nin taynep ko.” Hinabi nan Jose kana a, “Anggalangen a Poon Paraon, impatanda nan Apo Dioh kangko ye labay habiyen nin taynep mo, wanae ya. Ha loob nin pitoy taon, manged ye popol, noba hiyay domondon a pitoy taon, ket homain anan mapopol."

Hiyay Poon Paraon, ha natandaan na yaynay labay habiyen nin taynep na, naaliket ya kanan Jose. Kaya-bay dinyag na yan ikalwan pinakamatagay a māmaala ha nahyon Egipto.

Ket hiyay Jose ye namaala kanlan ampanipon nin kaganaan a popol ha Egipto. Ket pinatipon nay popol ha loob nin pitoy taon ta-omen lano ha maabot ye pitoy taon a homain anan mapolpol, main hilan kanen. Ha nayadi anay pitoy taon nin malabong a popol, naabot anay panaon nin bitil.

Aliwan bengat ha Egipto ye ampakatanam nin tobat a bitil. Ta agya hiyay papamilya nan Jacob a anti ha Canaan a logal a impangako nan Apo Dioh ket angkabitlan hilayna met. Haanin, hiyay andiyagen nan Jose, an-ilako nay natipon a popol kanlan tatao ha Egipto, ta homain hilaynan makan.

Ket ha nabalitaan nan Jacob a anti ha Canaan a malabong ye makan ihtew ha Egipto, intobol na hilay aanak na a manaliw ihtew. Kaya-bay nakew hilay kakatongno nan Jose ha nahyon Egipto. Ha niabot hilayna ihtew, ahe la ya tanda a hiyay Jose manayti ye ampamaala ha nahyon Egipto. Noba, hiyay Jose, nabalayan na a hilabay ye kakatongno na a nangilako kana hatew.

Ket hiyay Jose, hinobok na hilay kakatongno na, omen na matandaan no naoman anay ogali la. Ha natandaan na a naoman anay ogali la, hiyay Jose, impatanda na yaynay hadili na kanla. Ket hinabi na kanla a makew hilaynan komonin ha Ehipto, ta-omen na hila mahaglapan.

Ha nakaoli hilaynay kakatongno na, imbalita la kanan bapa la, a wanla, “Tatang, angkabi-ay ya po manayti yay Jose. Anhagyaten na kitawon komonin ihtew ha Egipto ta-omen na kitawo kano mahaglapan,” Ha natandaan nan Jacob a angkabi-ay ya po ye Jose, naaliket yan tobat.

Ket hiyay Jacob, agya matoa yayna, oli ha aliket na, nakew ya ha Egipto, kalamo na hilay papamilya na. Ket kinomonin hilayna ihtew. Noba bayo yan natey ye Jacob, in-inged na hila po ye kaganaan a aanak na.

Hiyay papangako nan Apo Dioh kanan Abraham, naipalakew kanan Isaac. Ket ha natey yay Isaac, naipalakew ya met kanan Jacob. Ket ha natey yay Jacob, naipalakew ya ha labinlowan aanak na boy papamilya la. Hilatin labinlowan aanak nan Jacob ye nag-ilyadin labinlowan kalahin tidibo a anhabtan Israelita, ta aanak na hilan Jacob a anhabtan met Israel.

//A Bible story from: Genesis 37-50//