4. Hiyay Pangako nan Apo Dioh kanan Abraham

Ha kaboyotan nin panaon pangalabah nin lanab, linomabong ana man ye tatao ihti ha babe-lota boy mamaghan kalahi po ye habi la. Noba ahe hila nanombong ha bilin nan Apo Dioh a mapaytayak-tayak hilan makew ha kaganaan a lologal ha babe-lota.. (Gen. 11:1).

Malambong hilayna. Kaya-bay napaymamaghaan lay mangipaideng nin matagay a todi, ta labay lay miabot ha langit. Nakit nan Apo Dioh yatin kapahalombangan boy tanda na a maloloke hila po lano. (Gen. 11:2-6).

Ket hiyay dinyag nan Apo Dioh, pinaylolombo nay hahabi la ta-omen hilayna ahe mapaytalohtaloh. Ket oli ta ahe hilayna angkapaytaloh, napaytayak-tayak hilaynan nakew ha kanayon a lologal. (Gen. 11:7-9).

Pangalabah nin ginatoh a taon, main maghay laki a nagngalan Abram. Ket hiyay ngalan nan ahawa na, Sarai. Hiyay Abram, kinatongtong na yan Apo Dioh, a wana, “Lakwanan moy logal mo boy hilay papaltido mo, ta makew kawon miahawa ha logal a pangiogotan ko kanyo.’’ (Gen. 12:1).

Ket hiyay Abram boy ahawa na, nanige hilan palakew ha logal a pangiogotan nan Apo Dioh kanla. Ha niabot hilayna ihtew, nagpangako yay Apo Dioh kanan Abram, a wana,

“Hilatin kaganaan a lota angga ha angkaabot nin angkakit mo, ket ibyay ko kammo a bilang tawid lan lalahi mo. (Gen. 12:7).

Ket palabongen ko hilay lalahi mo boy diyagen ko hilan mayadet a nahyon. Ket paibat haanin, hikoynay Dioh yo. Boy inged kata ta-omen la matandaan nin tatao ye ngalan mo. Inged ko hilay manginged kammo, noba toboyan ko hilay manoboy kammo. Ket makaoli ha lalahi mo, inged ko hilan kaganaan a nanahyon.(Gen 13:16).

Ket wanae ye anti ha ihip nan Abram, “Ampamtegan ko a topaden nan Apo Dioh ye kaganaan a impangako na kangko.” Kaya-bay hinabi nan Apo Dioh kanan Abram, a wana, “Oli ha pamteg mo kangko, ket an-ibilang katan matoynong.” Noba way-omen? Homain hila po a anak ye Abram. Ket no wanabay, way-omen awod a matopad ye pangako nan Apo Dioh a hiyay Abram ye pangibatan nin mayadet a nahyon?

Ha maghay mangaamot, hiyay Abram, nahagana na yay Melkizedek a maghan padi nin Katatagayan a Dioh. Ket hiyay Melkizedek, in-inged na yay Abram. Hinabi na kana, a wana, “Hiyay Apo Dioh a Katatagayan a nagkonin nin langit boy babe-lota, ket inged na ka dayi.” Ket hiyay Abram, in-ibyay na kanan Melkizedek ye ikamapo nin kaganaan a pagkonin na. (Gen. 14:18-20)

//A Bible story from: Genesis 11-15//