13.

Ha nakalipay hilaynay Israelita ha Dagat a Matibya, in-ogot na hilan Apo Dioh ha mapantay a anhabtan Sinai. Yati met ateed a mapantay ye nakakitan nan Moses nin poon kayon andomlag. Ket hilay Israelita, impaideng lay totolda la ha aphayan nin mapantay.

Haanin, hinabi nan Apo Dioh kanan Moises boy kanlan Israelita, a wana, “No hombongen yoy hahabi ko boy pabliyen yoy pamakikahondo ko kanyo, ket hikawoynay pagtao ko boy maghilbi ko.”

Pangalabah nin tatlon mangaamot, hilay Israelita, naghadya hila ta omaypa yay Apo Dioh ha matondol nin mapantay Sinai, kakidlan nin kilat, kodol, anoh boy makhaw a tonoy nin tamboyok. Ket namigpig hilay tatao, ta nalimwan hila. Hiyay Moises bengat ye napalobohan a manik ihtew ha mapantay.

Ket hiyay Apo Dioh, nanyag yan kahondoan kanlan Israelita. Hinabi na kanla a, “Hikoy Dioh a Apo yo a namalihway kanyo, ha pagkaipoh yo ha Egipto. Adi kawo manggalang ha diohdiohan.

“Adi kawo manyag nin kalintatao a galangen yo, ta hiko a Dioh yo, ket maimon. “Bihaen yoy ngalan ko.” “Adi yo anliwaan ye mangaamot nin pagpainawa. Ibilang yo yan nahantowan. Ha loob nin anem a mangaamot, diyagen yon kaganaan a obda yo. Ket ha ikapiton mangaamot, magpainawa kawo ket ihipen yo ko.

“Galangen yoy bapa boy indo yo ta-omen yan komadang ye bi-ay yo. “Adi kawo ampamatey nin tao. “Adi kawo ampamabayi boy adi kawo ampakilāki. “Adi kawo manakaw. “Adi kawo ampanago. “Adi yo angkaibegan ye ahawan kanayon, baey na o hinyaman a konin na.

Inholat nan Apo Dioh hilatin mapo a bibilin ha lowan madampiyak a dapah. Malabong po ye bibilin a in-ibyay na kanla. Impangako nan Apo Dioh, a wana, “No hombongen yo hilayatin bibilin ko, kalingayen boy inged katawo. Noba no ahe, padohaan katawo.

Impatanda na po Apo Dioh kanlan Israelita no way-omen layan diyagen ye toldan man-ipadyag na kanla. Yati ye Toldan Panggalangan kana a main lowan pahen. Tabing ye pietan nin lowan pahen. Ket hiyay pinakapoon padi bengat ye malyadin homlep ihtew.

Hinyaman a makadyag nin kahalanan ket katapolan a mangihagpa yan ayop kanan Apo Dioh ha Toldan Panggalangan. Hiyay diyagen nin padi, pateyen na yay ayop haka na olamen ha pangihagpaan. Ket makaoli ha daya nin ayop a naihagpa, mapatawad ye kakahalanan na. Ket pinili na yan Apo Dioh ye katongno nan Moises a hiyay Aaron boy lalahi na a bilang papadi na.

Hilay Israelita, hinabi la, a wanla, “Apo, hombongen mi ye bibilin mo. Ket hikan bengat ye Apo mi. Noba pangayadi lan nagpangako kanan Apo Dioh, ha ahe naboyot, nagkahalanan hilan mabyat a tobat kanan Apo Dioh.

Oli ha kaboyotan nan Moses ihtew ha matondol, hilay Israelita, hinomawa hilan ampangagad kana. Hiyay dinyag la, tinipon lay giginto la haka la in-ibyay kanan Aaron. Hinabi la kana a, “Idiyagan mo kayi man nin dioh-diohan a galangen mi!”

Kaya-bay, dinyag na yan diohdiohan a kadih oybon baka, ta yabaytew ana ye pagdioh la. Haanin, inkana laynay manggalang boy mangihagpa ha diohdiohan la. Kaya-bay napoot yan tobat ye Apo Dioh. Ket labay na hilan apoen. Noba nakiingalo yay Moises kanan Apo Dioh, a wana, “Apo, adi mo hila dayi an-apoen.” Ket pinteg na met Apo Dioh. Kaya-bay ahe na hila inapo.

Ha andomoong yaynay Moses paibat ha matondol, nakit na yay dioh-diohan a kadih oybon baka a anggalangen lan Israelita. Oli ha tobat a poot na, imbegba na hilay loway madampiyak a dapah a nakaiholatan nin mapo a bibilin nan Apo Dioh.

Haanin, kingwa nan Moses ye andiohen la, ket tinamek-tamek na angga ha natapok ya haka na inhale ha lanom, ta impainom na kanlan kaganaan. Ket hiyay Apo Dioh, nangitobol yan hakit kanla. Olin yati, malabong ye nangamatey kanla.

Haanin, hiyay Apo Dioh, pinaalih na hilay Israelita ha Mapantay Sinai. Ket in-ogot na hila palakew ha logal a impangako na kanla.

//A Bible story from: Exodus 19-34//