16. Hilay Māngona

Ha angkabi-ay ya po ye Josue, hilay Israelita anhombongen lay kalabayan nan Apo Dioh. Noba ha natey yayna, tinomgen hilayna boy ahe layna impaholong ye pangitaboy la kanlan nangapatla a lahin Cananeo. Olin yati, nipaloy hilayna kanlan Cananeo a ampanggalang ha dioh-diohan la. Aliwaynan hiyay Apo Dioh ye anggalangen la. Haanin kananyatew a panaon, homain hila po poon ye Israelita. Kaya-bay hiyay balang magha kanla, hiyay kalabayan naynan bengat ye andiyagen na.

Oli ha kabyangan nin ō lan Israelita, hiyay Apo Dioh, pinalobohan na hilan hamboten nin kakaaway la. Ket hilatin kakaaway la, tinakaw boy dinama lay babandi la. Boy pinatey la hilay nangaano kanla. Pangalabah nin nangaanoy taon a pag-idap la, nakigwang hila kanan Apo Dioh, a wanla, “Apo, ampaghehean miynay kakahalanan mi kammo. Kaya-bay patawaden mo kayi dayi. Ampakiiingalo kayi kammo a iligtah mo kayiyna kanlan kakaaway mi!”

Ket nalonoh ya met ye Apo Dioh kanla. Kaya-bay namili ya nin taon mangona kanla ha labanan ta-omen hila manambot kanlan kakaaway la. Noba ha ahe naboyot, naliwaan la yaynayna man ye Apo Dioh, ket nanggalang hilay naman ha diohdiohan. Ket haanin, impaloboh naynan Apo Dioh a hamboten la hilan Midianita.

Nahakop hilan Midianita ye Israelita ha loob nin pitoy taon. Ket ha loob nin kananyain a panaon, hilay Midianita ye ampangwa nin aapit la. Ket hilay Israelita, oli ha limo la, ampagtayo hila ha yoyokib ta-omen la hilan ahe makitan nin Midianita. Noba ha kaboyotan, nakiingalo hilayna man kanan Apo Dioh, a wanla, “Apo Dioh, ampaghehean mi ye kakahalanan mi kammo. Kaya-bay patawaden mo kayiyna man. Ampakiiingalo kayi kammo a iligtah mo kayi kanlan kalaban mi!”

Ha maghay mangaamot, intobol na yan Apo Dioh ye pānobolen na ha maghay lāki a nagngalan Gideon. Hiyay Gideon, ampagtayo yan ampanggiek, ta angkalimo ya kanlan Midianita. Hinabi nan pānobolen kanan Gideon, a wana, “Gideon, minged ka, ta hika ye mak-haw a hondaloh. Pinili na kan Apo Dioh a māngiligtah kanlan Israelita.”

Hinabi na po nin pānobolen, a wana, “Imbilin nan Apo Dioh a damaen moy andiohen nan bapa mo.” Noba hiyay Gideon, angkalimo ya kanlan tatao. Kaya-bay inagad na po ye madeglem. Ket ha madeglem ana, nilakew nan dinama boy tinamek-tamek ye andiohen nan bapa na. Pangayadi, nanyag yan pangihagpaan ha alan a nakaikonaan nin andiohen nan bapa na. Ket nangihagpa yan hagpa kanan Apo Dioh.

Kabekahan, nakit lan tatao a nadama ana ye andiohen la. Ket napoot hilan tobat. Kaya-bay nakew hila ha baey nan Gideon, ta labay la yan pateyen. Noba hinabi nan bapa nan Gideon, a wana, “Taket ta anhaglapan yoy dioh? No peteg a dioh ya, paolayan yo a hiyabay ye mamae kanan Gideon.” Oli yatin hinabi na, pinaolayan la yan peteg. Kaya-bay, naligtah yay Gideon.

Ha ahe maboyot, anti hilay naman ye Midianita a mangwa nin apit lan Israelita. Ahe mabilang-bilang ye kalabong la. Ket hiyay Gideon, hinagyat na hilay Israelita a makilaban kanlan Midianita. Noba bayo hilan linomaban, hiyay Gideon, nakikwa yan pagkakitan kanan Apo Dioh, a pamapteg a hiyabay ye gawien na a māngiligtah kanlan Israelita.

Hiyay ona nan dinyag, nangiamlak yan tapih ha lota. Pangayadi, inawok na kanan Apo Dioh, a wana, “Apo, no hikoy pinili mo, biyan mo kon pagkakitan. Palobohan mon mabaha nin ambon yatin tapih, noba hiyay lota a palibot, ket ahe ana.” Ket dinyag nan Apo Dioh ye inawok na. Ha domondon a madeglem, inawok nayna man, a wana, “Apo, no peteg a hikoy pinili mo, biyan mo ko po nin maghan pagkakitan. Palobohan mo po, a hiyay lota a palibot nin tapih ye mabaha, agya ahe anay tapih.” Ket dinyag nayna man Apo Dioh ye inawok nan Gideon.

Main 32,000 hohondaloh a Israelita ye nakew kanan Gideon. Noba hinabi nan Apo Dioh, a wana, “Bawahan mo hila, ta malabong hilan tobat.” Ket hiyay Gideon, pinaoli nay lowampo boy lowan libon hohondaloh a angkalimon makilaban. Noba hinabi nan Apo Dioh kana, a wana, “Hali po, bawahan mo po, ta malabong hila po ateed.” Kaya-bay pinaoli na hilay kanayon po angga ha tatlon gatoh anan bengat ye napatla.

Kananyatew a madeglem, hinabi nan Apo Dioh kanan Gideon, a wana, “Makew kan maniem ha kampo lan Midianita. Ket no mange moy anhabiyen la, maalih anay limo mo.” Kaya-bay hiyay Gideon, nakew yan naniem ha kampo lan Midianita. Ket ha anti yayna ihtew, nange nay maghay hondalo a antongtongen nay taynep na kanan kalamo na. Hinabi nan kalamo na, a wana, “Hiyay labay habiyen nin taynep mo, ket hamboten la kitawon Gideon.” Ha nange nan Gideon yatew, nanggalang ya kanan Apo Dioh.

Haanin, nag-odong yaynay Gideon kanlan hohondaloh na, ket binyan na hilan titimaghan tamboyok, koden boy tiyo. Pangayadi, pinalibotan lay kampo lan Midianita a angkatoloy po. Ket hilay tatlon gatoh a hohondaloh na, hinalokoban lan koden ye tiyo la omen ya ahe makit.

Ha napalibotan la hilaynay Midianita, nayngingidlan hilan namatnoy nin tamboyok la haka la pinha ye koden a nakahalokob ha tiyo la. Boy impangha la, a wanla, “Oli kanan Apo Dioh boy kanan Gideon, tawoyna!”

Ket hiyay Apo Dioh, nilimang-limang nay ihip lan Midianita ta-omen hilabay met ateed ye maypateyan ket nipapayew hilay kanayon. Hilay kanayon a Israelita, kinamat la hilan pinatey ye Midianitan nipapayew. Main maghay gatoh boy lowampo a libo a Midianita ye natey kananyatew a madeglem. Hilay napatla, intaboy la hila ha ilwah nin logal la. Ket ha wanabay, inligtah na hilan Apo Dioh ye Israelita.

Haanin, hinabi lan Israelita kanan Gideon, a wanla, “Labay mi a hikay mamoon kammi.” Noba hinabi nan Gideon kanla, awana, “Ahe ko labay a hikoy mamoon kanyo. Biyan yo ko tanan pilak a nahamham yo kanlan kaaway tawo.” Ket malabong a pilak boy balitok ye in-ibyay la kana.

Pangayadi, hiyay Gideon, nanyag yan aliwan manged ha pamilew nan Apo Dioh, ta hiyay pilak boy balitok a natanggap na, ket dinyag na yan diohdiohan. Ket oli ha diohdiohan a dinyag nan Gideon, tinomalingkokol hilay Israelita kanan Apo Dioh ket tinowad la yay Gideon a ampanggalang ha diohdiohan.

Haanin, bilang impadoha nan Apo Dioh kanlan Israelita, hinambot la hilayna man nin kakaaway la. Kaya-bay nakiingalo hilayna man kanan Apo Dioh, a wanla, “Apo Dioh, ampaghehean mi ye kakahalanan mi kammo. Kaya-bay patawaden mo kayiyna man. Ampakiiingalo kayi kammo a iligtah mo kayi kanlan kaaway mi!” Ket oli ha paghehe lan Israelita, nangitobol yayna man ye Apo Dioh nin kanayon a mangona kanla ha labanan ta-omen hila manambot kanlan kakaaway la. Yatin andiyagen lan Israelita a magkahalanan, mapadohaan, maghehe, pangayadi iligtah na hilayna man Apo Dioh, ket paoman-oman.

Ha kapopohan, hinabi lan Israelita kanan Apo Dioh, a wanla, “Apo, hilay kaganaan a titidibo ha palibot mi ket main hilan poon. Labay mi dayi Apo, a biyan mo kayi met nin pagpoon mi. Ket no malyadi dayi, matagay ya, makhaw boy makpen mangona kammi ha labanan.” Hinabi nan Apo Dioh kanla, a wana, “Ahe kon nalabayan ye hinabi yo. Noba agya wanabay man, ibyay ko kanyo ye awok yo.”

//A Bible story from: Judges 1-3; 6-8//