40.

Pangayadi layan inlongo-longo nin hohondaloh ye Apo Jesus, inlakew laya ha ilwah nin banwa ta-omen la yayna ipako ha kodoh. Impabatay la kana ye kodoh a pakaipakoan na.

Inlakew layan hohondaloh ye Apo Jesus ha logal a anhabtan Golgota (hiyay labay habiyen, “Logal nin Bongo”) ta ihtew laya ipako ha kodoh. Ket impako lay gagamet na boy bibitih na. Noba impakigwang nan Apo Jesus a, “Bapa ko, patawaden mo hila, ta ahe la tanda ye andyagen la.” Haanin, imbilin nan Pilato a iholat la ha pangiholatan ye wanae, “HIYAY POON LAN JUJUDIO” haka la ipako ha kodoh nan Jesus ha dapit-tagay nin ō na.

Haanin, hilay hohondaloh, kingwa lay babado nan Apo Jesus boy nanyag hilan pandaw-an lan makakwa nin babado na. Nalyadi yati ta-omen ya matopad ye impaholat nan Apo Dioh, a wanae, “Paydakayan la boy payhogalan lay hoot ko.”

Hiyay Apo Jesus, impako laya ha kodoh ha pietan nin loway mānakaw a nakapako met ha kodoh. Haanin, hiyay maghay mānakaw, inlongolongo na yay Apo Jesus a wana, “Aliwa nayi a hika ye Cristo a impangako nan Apo Dioh? Iligtah moy hadili mo boy iligtah mo kayi met!” Noba in-idlaw na yan magha a wana, “Ahe mo anhabiyen yain. Ahe ka nayi angkalimo kanan Apo Dioh? Padipadiho kitawobaynan angkapadohaan. Hikita ye katapolan lan pateyen oli ha dinyag tan kalok-an. Noba yatin tao, homain yan bega dinyag a maloke.” Pangayadi, hinabi na kanan Apo Jesus, “Apo Jesus, no anti kawoyna ha panakopan mo, adi moko dayi anliwaan.” Hinabi nan Apo Jesus kana, “Pakaleng-en mon manged ye habiyen ko. Haanin a met ateed, ilamo katayna ha pinakamanged a logal.”

Ket hilay māngona lan Jujudio boy kanayon po a tatao, inlongolongo la yay Apo Jesus a wanla, "No peteg a hika ye Anak nin Dioh, lomombah ka man ihen ha kodoh, ta iligtah moy hadili mo. No makalombah ka ihen ha kodoh, mamteg kayiyna kammo!”

Ha kaoogtowan ana, linomiteh yan kaganaan yatew a logal ha loob nin tatloy odah.

Haanin, hiyay Apo Jesus, impangha nan mak-haw a wana, “Bapa ko, nayadi ana, an-ipataya koynay kalelwa ko kammo.” Haanin, indeeng nan Apo Jesus ye ō na, ket naboytoan yaynan angeh. Kapipikhaan, nanlayon yan makhaw boy hiyay makogpan tapih a pinagkatabing ha loob Templo, nagiwak yan nagitna paibat ha tagay anggan aypa.

Makaoli ha pagkamatey nan Apo Jesus ha kodoh, ket makahaley kitawoyna kanan Apo Dioh. Ket hiyay kapitan boy hilay hohondaloh a ampagbantay kanan Apo Jesus, ha nanlayon boy ha nakit lay kaganaan a nalyadi, nalimowan hilan tobat. Kaya-bay hinabi la, a, “Peteg bay a anak yan Dioh!”

Pangayadi, hilay loway a māngona lan Jujudio a ampamteg kanan Apo Jesus a hiyay Jose a taga Arimatea boy Nicodemo, inawok lay bangkay nan Apo Jesus kanan Gobilnadol Pilato. Ket pinotot la nin tapih haka layan in-ilbeng ha bayon inyokib a pangilbengan. Pangayadi, intolin laynay mayadet a dapah a panleneb ha ilwangan nin pangilbengan.

//A Bible story from: Mateo 27:27-61; Markos 15:16-47; Lukas 23:26-56; Juan 19:17-42//====== 41. Nabi-ay yan oman ye Apo Jesus! ======