5. Hiyay Lāki a impangako nan Apo Dioh

Lowampo a taon ana ye napalabah paibat po ha nagpangako yay Apo Dioh kanan Abram, noba homain hila po ateed anak. Haanin, hiyay Apo Dioh, hinabi nayna man kanan Abram, a wana “Magkaanak kan maghay lāki, ket lomabong hila lanoy lalahi mo a omen kalabong nin bibitoen ha langit.” Ket ha nange nayna man Abram ye pangako nan Apo Dioh, ket pinamtegan naya.

Ha maghay mangaamot, hiyay Sarai, hinabi na kanan Abram, a wana, “Way-omen yati? Matoa kitayna ket homain kita po anak. Kadihko, ahe na palobohan Apo Dioh a magkamain kitan anak. Homain bali, ta anti ya met ye Hagar a ipoh ko. Takehen mo ya ta-omen ya manganak. Ket hiyay anak na, ibilang yan hadili kon anak.’’ (Gen 16:2).

Oli ha hinabi nan ahawa na, ket pinteg nan Abraham a tinakeh ye ipoh nan ahawa na a hiyay Hagar. Ket nanganak yan lāki. Ket hiyay Abram, pinangalanan na yan Ismael ye anak na kanan Hagar. Hinabi nan Abram kanan Apo Dioh, a wana, “Apo, no kalabayan mo, inged mo yay anak kon Ismael.” Ket nakibat yay Apo Dioh a, “Awo, inged ko yay Ismael olita labay mo, noba aliwan hiyabay ye labay ko a pakapitopadan nin impangako ko kammo,”

“Ket hiyay Sarah a ahawa mo, manganak ya lanon lāki a pangalanan mon Isaac. Ket hiyay anak mo kana ye pakapitopadan nin pangako ko kammo. Kaya-bay impaibat haanin, pangalanan kataynan Abraham, ket hiyay labay habiyen, ‘pangibatan nin malabong a lalahi boy nanahyon.’”

Haanin, hiyay Sarah, hiyammapo a taon nayna ha ianak na yay impangako nan Apo Dioh. Ket hiyay Abraham, magatoh ana met ye taon na. Ket pinangalanan la yan Isaac, ta wanabay ye imbilin nan Apo Dioh kanla.

Ha linomake yaynay Isaac, hinobok nan Apo Dioh ye pāmteg nan Abraham. Hinabi nan Apo Dioh kana, a wana, “Kowen mo yay Isaac a bogtong a anak mo kanan Sarah, ta ilakew mo ya ha mapantay nin Moriah, ta ihagpa mo yan bilang digalon olamen kangko.” Ket hinombong na met Abraham ye imbilin nan Apo Dioh kana.

Ket haanin, binalol na yay anak na, ket inhagpa na ya ha pangolaman, ta pateyen na ya. Noba ha pateyen na yayna ye anak na, impangha na nin pānobolen nan Apo Dioh, a wana, “Adey! Adi mo ya ampateyen ye anak mo! Ta nakit naynan Apo Dioh ye pamteg mo, boy main kan limo kana, ta ahe mo ya kinawaen a idigalo kana ye anak mo!”

Pangayadi, nakit na yan Abraham ye maghay topa a nakahaet ye hongay na ha hahanga nin kayo. Ket inihip nan Abraham a, “Ah! Yatiyna ye kahagiliyan nan Isaac a pateyen kon ihagpa kanan Apo Dioh,” Ket hiyay topa a nakahaet ye hongay na ye kingwa na a inhagpa bilang digalon olamen kanan Apo Dioh.

Pangayadi, hinabi nan Apo Dioh kanan Abraham a, “Oli ta nakit kon ahe mo yan kinawaen ye anak mon idigalo kangko, ket ipangako ko kammo a inged kata. Palabongen ko hilay lalahi mo a omen kalabong a bibitoen ha langit. Ket makaoli ha kangedan nin lahi mo, inged ko hila met ye kaganaan a papamilya ihti ha babe-lota, oli ta tinopad moy bibilin ko kammo.”

//A Bible story from: Genesis 16-22// ====== 6. Binyanan na yan Apo Dioh nin ahawa ye Isaac ======