4. Ya Pangakun Bapan Namalyari

Malakêy tawun na inlumibas pamakayarin bapan dagul lanab. Inlumakêy nan manguman na mani tawu sa babun luta. Buy awlagi kay gigisay sabi ya panggamitin la. Nuwa imbis saman sunulên lay utus Bapan Namalyari ya pakapnun lan mani tawuy babun luta, niaawyun silay naman buy nag-umpisan nipaydêng gisay balayan.

Mapagpapadayêw wa mani tawu awlagi. Ayin silan pakyalam sa pansabin Bapan Namalyari. Nag-umpisan namipaydêng gisay tori ya mani tawu. Sinabi la, “Isadsad tamuy ati angga sa langit ta amên makilala kitamun malakêy tawu.” Nakitan Bapan Namalyari ya nu pawan miaawyun na mani tawu, mas malakêy madyag lay nangadadawak. (Genesis 11:4-6)

Pikakaatag Bapan Namalyari ya sabi la ta amên a sila mikakaintindi. Sa pakapakun baydu, a la maisunduy panyag lan tori buy balayan ya binêg Babel. Ya labay sabin Babel, “asê nikakaintindi”. Kabay nangapikikyat ta mani tawu sa babun luta. (Genesis 11:7-9)

Sa kinakarangan na tawun na inlumibas, pinakisabyan Bapan Namalyari ya gisay liyaki. Si lagyu na, Abram. Sinabin Bapan Namalyari kan Abram, “Abram ma, lakwanan muy lugal mu buy mani kamag-anak mu. Maku ka sa gisay lugal la ipakit ku kamu. Pagpalên kata. Daygên katan gisay maragul la bansa. Makilala ka sa magmikakanayun na lugal. Ya manawup kamu, pagpalên kuya, nuwa ya makipati kamu, isumpa kuya. Buy sa kapamilatan mu, pagpalên kuy kaganawan tawu sa buun babun luta.” (Genesis 12:1-3)

Sinunul Abram si Bapan Namalyari. Pikilaku nay asawa nay si Sarai. Pikilaku na êt ta mani ipus na. Gintan lay kaganawan pibandiyan la. Naku sila sa lugal la inturun Bapan Namalyari kalla. Ya lagyun lugal la abaytu, Canaan. (Genesis 12:4-5)

Pamakalatêng Abram sa Canaan, sinabin Bapan Namalyari kanay, “Mangêlêw ka sa palitêng mu. Ya kaganawan lutay makitan mu, idin ku kamu buy sa mani layi mu.” Kabay nanugêl lina baydu si Abram. (Genesis 12:6)

Gisay allu, nakitan Abram si Melquizedek. Si si Melquizedek, gisa yan parin Bapan Namalyari ya Makapangyarian sa Kaganawan. Pinagpalan Melquizedek si Abram. Sinabi na, “Pagpalên kan Bapan Namalyari ya Makapangyarian sa Kaganawan ya sabay ya magbandin langit buy luta.” Indin Abram kan Melquizedek ya ikamapuy baagin pibandiyan na ya nagtan na. (Genesis 14:18-20)

Malakê pun na tawun na inlumibas, nuwa si Abram buy si Sarai, ayin sila pun êt anak. Nanguman nagsabi si Bapan Namalyari kan Abram, “Makaanak kan liyaki buy ya maapu mu, kasin lakên bêtêwên sa langit.” Naniwala yabay si Abram sa pangakun Bapan Namalyari. Kabay napakadyag yan matinêk sa pangêlêw Bapan Namalyari. (Genesis 15:1-2, 5-6)

Pamakayari, nanyag kasunduwan si Bapan Namalyari kan Abram. Sinabin Bapan Namalyari kana, “Abram ma, biyan katan anak ka liyaki ya paubat sa layi mu. Idin ku kamu buy sa maapu muy lugal un Canaan.” Nuwa sa panawun na abitu, ayin pun êt anak si Abram. (Genesis 15:4)

Kwentu sa Biblia ya ubat sa Genesis 11-15