13. Ya kasunduwan Bapan Namalyari buy mani Israelita

Sên nailipay yan Bapan Namalyari ya mani Israelita sa Dagat Naudit, inawyunan nay mani Israelita sa pamita la papakun sa Bung-uy Sinai. Sabitun nuna, baydu êt nakitan Moises ya nayêpay kayuy magdêkêt-dêkêt. Ninggat ya mani Israelita sa aypan bung-uy. (Exodo 19:1-2)

Sinabin Bapan Namalyari kan Moises buy sa kaparisu nan mani Israelita, “Nu sunulun yuku buy ya pikasunduwan tamu, kay sikaw nay mani tawu ku ya magsuyu kangku.” (Exodo 19:5-6)

Pamakalibas tatluy allu, pamakayarin paglêan mani tawu, nagtabuy si Bapan Namalyari sa Bung-uy Sinai. Nangilat, nangimat, nag-asuk sa bung-uy buy dilag silan nalêngêy mamasnêg ga sênêg patutut. Nanginagin ya mani tawu gawan sa limu la. Nuwa kay si Moises ya tinulutan Bapan Namalyarin sinumukpa sa bung-uy. (Exodo 19:14-19)

Impatandan Bapan Namalyari kan Moises ya dilag yan kasunduwan sa mani Israelita. Sinabi na, “Siku si Yahweh, ya Bapan Namalyari yu. Buy sikuy niligtas kamuyu ubat sa Egiptu. Kabay agana kaw mangulimên sa kaatag.” (Exodo 20:1-3)

“Agana kaw manyag mani ribultuy ulimênên yu. Mangimun naku nu daygên yuy abitu. Agana yu gamitin na lagyu ku un ayin panggalang. Ituwad yun banal la ikapituy allu, ta abituy Allun Pagpaynawa. Mag-ubra kaw sa anêm ma allu. Nuwa sa ikapituy allu, magpaynawa kaw amên maganaka yuku.” (Exodo 20:4-11)

“Galangên yuy mani mangatwa yu. Agana kaw mamati. Agana kaw makikanayun. Agana kaw manakaw. Agana kaw maglaram. Agana yu pagnasên na asawan kaparisu yu o bali na o sabêt man na pibandiyan na.” (Exodo 20:12-17)

Insulat Bapan Namalyari ya mani utus sa ati sa luway bis-il la batu buy indin kan Moises. Dilag pun êt kaatag ga mani utus ya indin si Bapan Namalyari amên sunulun mani Israelita. Nu sunulun mani Israelitay mani utus sa ati, impangakun Bapan Namalyari ya pagpalên na sila buy allu-allun. Nuwa nu a lay naman sunulun na utus, parusan silan Bapan Namalyari. (Exodo 31:18)

Nagpadyag êt si Bapan Namalyarin gisay karagulan tolda. Binêg lay atin Toldan Pagtipunan. Dilag luway parti ya toldan ati. Gisay maragul la kurtinay pisaêtan sa luway partin ati. Ayin malyarin sumun sa ikaluway parti liban tana sa pinakapuun pari, gawan idi baydu si Bapan Namalyari. (Exodo 26:1-37)

Nu sisabêt man na asê manunul sa utus Bapan Namalyari, kaylangan yan mag-andug ayup sa arapan Toldan Pagtipunan. Patin pari ya ayup buy êwêkên nay ati sa pamiandugan. Ya dayan in-andug ga ayup, sabay ya mananip kasalanan buy mallinis kana sa arapan Bapan Namalyari. Pinilin Bapan Namalyari si Aaron, ya kakan Moises buy mani anak na amên silay magin pari. (Exodo 27:1-8; 28:1)

Nangakuy mani Israelita, ya sinabi la, “Sunulun yan na mani utus Bapan Namalyari ya kay si Bapan Namalyari ya ulimênên yan. Buy sikay ya mani tawu na.” Nuwa pamakalibas dakun umnuy allun pangaku la, nanabyat ta kasalanan la kan Bapan Namalyari. (Exodo 24:3; 32:1)

Dakun umnuy allun Moises sa bung-uy ya makisabi kan Bapan Namalyari. Asê nakaêtêng nga mani tawu kana. Kabay gintan lay gintu la kan Aaron, ta impadyag lan diyusdiyusan la amên ulimênên la. (Exodo 32:3)

Nanyag gabay si Aaron un gisay gintuy diyusdiyusan la kalupan gisay nabêlêng nga baka. Inulimên mani Israelitay diyusdiyusan buy namiandug sila baydu. Natubagtubag si Bapan Namalyari sa dinyag la buy labay na dayin patin na kaganawan Israelita. Nuwa nanalangin si Moises para kalla, ya sinabi na, “Bapan Namalyari, agana mu sila dayi patin!” Kabay a sila pinatin Bapan Namalyari. (Exodo 32:4, 6, 9-14)

Pamakalunsan Moises sa bung-uy, nakitan na mismuy mangulimên sa diyusdiyusan ya mani Israelita. Kabay nanubag ya buy imbundag nay luway bis-il la batuy pinisulatan mani utus Bapan Namalyari. (Exodo 32:19)

Pamakayari, inmêmêkmêk Moises ya diyusdiyusan buy indin na sa lanêm buy impaynêm na sa mani tawu. Buy si Bapan Namalyari yaman, namiparanas yan pamasakit kalla. Kabay nati ya malakê kalla.

Nanguman sinumukpa si Moises sa bung-uy. Nanalangin yan patawarên Bapan Namalyari ya mani tawu. Pinatawad daman Bapan Namalyari ya mani tawu. In-uman insulat Moises sa bayun batuy mani utus Bapan Namalyari. Pamakayari, nanguman inawyunan Bapan Namalyari ya mani Israelita sa pamita la papakun sa lugal la impangakun Bapan Namalyari kalla. (Exodo 32:20, 31-35; 34:4-7)

Kwentu sa Biblia ya ubat sa Exodo 19-34