28. Ya Liyaki ya Mabandi

Gisay allu, dilag gisay mabandi ya pinunu ya nagdani kan Jesus buy namatang, “Mangêd da Manuru, sabêt ta sêpat kun daygên amên mabiyan nakun biyay ya ayin katganan?” Nakitbay si Jesus, “Siyan binêg muku yan mangêd ta? Ayin kaatag ga mangêd, nun a kay si Bapan Namalyari. Nu labay muy mabiyan kan biyay ya ayin katganan, sunulun muy mani utus Bapan Namalyari.”

Namatang manguman na pinunu ya mabandi, “Sabêt ta mani utus sa sêpat kun sunulun?” Nakitbay si Jesus, “Agana ka mamati, agana ka makikanayun, agana ka manakaw, agana ka êt papêtêg sa ayin kapêtêgan, galangên muy bapa buy indu mu, buy idun muy kaparisu mu kaparisun pangidu mu sa sarili mu.”

Nuwa sinabin mabandi ya pinunu, “Sinunul kinay kaganawan abiin ubat pun sabitun anak kaku. Sabêt pun êt ta sêpat kun daygên amên mabiyan nakun biyay ya ayin katganan?” Kaban pan-êlêwên Jesus sa mabandi ya pinunu, nalunus ya kana.

Nakitbay si Jesus, “Nu labay mun pakadyag kan pêtêg sa arapan Bapan Namalyari, isaliw muy kaganawan pibandiyan mu. Buy si naabli muy pera, idin mu sa mani kalulu. Sa kapamilatan abiin, mabiyan kan pibandiyan sa langit. Pamakayari, mag-udung ka buy sumunul ka kangku.”

Nuwa sên nalêngên liyaki ya abitu, namita yan malungkut gawan malakêy pibandiyan na buy a na labay matasan yan pibandiyan. Kabay nagpabukut ya kan Jesus buy inlakwanan naya.

Kabay sinabin Jesus sa mani tagasunul na, “Ya mani tawuy mabandi, masakit silan misun sa pag-arin Bapan Namalyari. Tambêng pun misun na gisay kamelyu sa lubut karayum, kaysa sa magpasakup pa mabandi sa pag-arin Bapan Namalyari.”

Nakaupapas sa mani tagasunul Jesus sa sinabi na. Kabay namatang sila, “Nu parabaydu, sisabêt ta miligtas?”

Nangêlêw si Jesus kalla buy sinabi na, “Asê madyag tawuy iligtas nay sarili na, nuwa si Bapan Namalyari, madyag nay kaganawan.”

Sinabin Pedru kan Jesus, “Parasaantu kay yaman na tagasunul mu? Inlakwanan yan nay kaganawan amên sumunul kamu. Sabêt ta gantimpala yan?”

Nakitbay si Jesus, “Nu sisabêt man na mallakwan bali na, mapatêl na, mangatwa na, o maanak na gawan sa pag-arin Bapan Namalyari, mabiyan yan igit pun kaysa sa inlakwanan na sa panawun amêsên. Buy sa panawun na lumatêng, makatanggap ya êt biyay ya ayin katganan. Nuwa malakêy idi sa ubatan ya miuna buy malakêy idi sa mumuna ya mipaubatan.”

Kwentu sa Biblia ya ubat sa Mateo 19:16-30; Marcos 10:17-31; Lucas 18:18-30